ມີ ທ່ານ ບັນດິດ ຊຸມພົນພັກດີ ຫົວໜ້າສູນສຸຂະພາບແມ່ ແລະ ເດັກ ກະຊວງສາທາລະນະສຸກ, ທ່ານ ຍຳບັດ ບັນມູນ ຫົວໜ້າໜ່ວຍງານວັກຊິນ ອົງການອະນາໄມໂລກ ປະຈໍາ ສປປ ລາວ, ທ່ານ Mohammed Yunus ຕາງໜ້າຈາກອົງການອຸຍນີເຊັບ ປະຈໍາ ສປປ ລາວ, ທ່ານ ວິສິດ ຄຳລືຊາ ຫົວໜ້າສູນສະຖິຕິ ແລະ ຂ່າວສານສາທາ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ເພື່ອການສົ່ງເສີມວຽກໃຫ້ວັກຊິນກັນພະຍາດຮອບປົກກະຕິ, ກະຊວງສາທາລະນະສຸກ ສປປ ລາວ ໄດ້ເລີ່ມນຳໃຊ້ສື່ການໃຫ້ຄວາມຮູ້ກ່ຽວກັບວັກຊິນກັນພະຍາດທີ່ດັດປັບມາຈາກ “ປຶ້ມຕິດຕາມສຸຂະພາບແມ່ ແລະ ເດັກ” ຫຼື “ປຶ້ມຫົວສີບົວ” ເພື່ອຊຸກຍູ້ປະຊາຊົນໃຫ້ພາລູກ-ຫຼານມາຮັບບໍລິການວັກຊິນກັນພະຍາດຮອບປົກກະຕິ ຊຶ່ງການຜະລິດສື່ດັ່ງກ່າວ ແມ່ນໄດ້ຮັບການສະໜັບສະໜູນຈາກອົງການອະນາໄມໂລກ (WHO), ອົງການອຸຍນີເຊັບ (UNICEF), ລັດຖະບານ ອົສຕຣາລີ ແລະ ອົງການກາວີ ພັນທະມິດວັກຊິນ. ສື່ເຫຼົ່ານີ້ ແມ່ນໄດ້ອອກແບບມາ ເພື່ອຊ່ວຍປະຊາຊົນທີ່ບໍ່ຮູ້ໜັງສື ແລະ ບັນດາຊົນເຜົ່າຕ່າງໆໂດຍສະເພາະ ຊຶ່ງໄດ້ເລີ່ມນໍາໃຊ້ເປັນທາງການຫຼັງສັບປະດາສັກວັກຊິນກັນພະຍາດສາກົນ ແລະ ເປັນການເນັ້ນຢໍ້າຄໍາໝັ້ນສັນຍາຂອງປະເທດຊາດ ໃນການປົກປ້ອງພົນລະເມືອງຂອງຕົນຈາກພະຍາດທີ່ປ້ອງກັນໄດ້ດ້ວຍວັກຊິນ.
ການຜະລິດສື່ເຫຼົ່ານີ້, ໄດ້ນຳພາໂດຍໂຄງການໃຫ້ວັກຊິນກັນພະຍາດແຫ່ງຊາດ ແລະ ສູນສະຖິຕິ ແລະ ຂ່າວສານສາທາລະນະສຸກ ກະຊວງສາທາລະນະສຸກ ຊຶ່ງໄດ້ອີງໃສ່ປຶ້ມການຕິດຕາມແມ່ແລະ ເດັກທີ່ເປັນທີ່ຮູ້ຈັກ, ເຊື່ອຖືໄດ້ ແລະ ມີໃນທຸກຄອບຄົວໃນ ສປປ ລາວ. ບັນດາສື່ ທີ່ໄດ້ຜະລິດປະກອບມີ: ຊຸດວິດີໂອພາບກາຕູນເຄື່ອນໄຫວ ແລະ ແຜ່ນພັບ. ຫົວຂໍ້ປະກອບມີ: “ຄຸນຄ່າຂອງວັກຊິນ”, “ຫຼັງຈາກລູກຂອງຂ້ອຍໄດ້ຮັບວັກຊິນກັນພະຍາດຈະເກີດຫຍັງຂຶ້ນ” ແລະ ຄວາມຮູ້ທົ່ວໄປກ່ຽວກັບ 8 ພະຍາດສໍາຄັນທີ່ສາມາດປ້ອງກັນໄດ້ດ້ວຍວັກຊິນເຊັ່ນ: ພະຍາດໝາກແດງໃຫຍ່, ໝາກແດງນ້ອຍ, ໂປລິໂອ, ຄໍຕີບ, ໄອໄກ່, ອັກເສບຕັບບີ, ມະເຮັງປາກມົດລູກ ແລະ ພະຍາດໂຄວິດ-19. ສື່ດັ່ງກ່າວມີທັງພາສາລາວ, ກຶມມຸ, ມົ້ງ, ອາຄາ ແລະ ພາສາອັງກິດ ເພື່ອຮັບປະກັນໃຫ້ສາມາດເຂົ້າເຖິງປະຊາຊົນຢ່າງກວ້າງຂວາງ ຊຶ່ງປັດຈຸບັນ, ທີມງານຈາກພະແນກສາທາລະນະສຸກແຂວງ ແລະ ຫ້ອງການສາ ທາລະນະສຸກເມືອງ ໄດ້ແປເປັນພາສາທ້ອງຖິ່ນເພີ່ມເອງ. ສໍາລັບການສື່ສານໃນພາສາຊົນເຜົ່າອື່ນໆ ແມ່ນຈະມອບໃຫ້ພະນັກງານແພດທ້ອງຖິ່ນ ຊ່ວຍແປເນື້ອໃນຂອງສື່ດັ່ງກ່າວຕາມຄວາມຈໍາເປັນ.
ໂອກາດນີ້, ທ່ານ ນາງ ວຽງຂັນ ພິໄຊ ໄດ້ເນັ້ນໜັກເຖິງຄວາມສໍາຄັນຂອງສື່ເຫຼົ່ານີ້ສຳລັບບຸກຄະລາກອນດ່ານໜ້າວ່າ: "ບຸກຄະລາກອນທາງການແພດຈະປະເຊີນກັບຄວາມທ້າທາຍໃນການອະທິ ບາຍ ເນື້ອໃນວິທະຍາສາດ ແລະ ຄວາມປອດໄພຂອງວັກຊິນ ໂດຍສະເພາະສື່ສານກັບຜູ້ທີ່ບໍ່ຮູ້ໜັງສື ຫຼື ມີອຸປະສັກດ້ານພາສາ. ສື່ໃໝ່ນີ້ຈະໃຫ້ຂໍ້ມູນທີ່ຊັດເຈນ, ມີພາບປະກອບ ແລະ ມີຂໍ້ຄວາມທີ່ເຂົ້າໃຈງ່າຍ ທີ່ກ່ຽວພັນກັບປຶ້ມຕິດຕາມສຸຂະພາບແມ່ ແລະ ເດັກ ຊຶ່ງເປັນປຶ້ມ ຫຼື ໜັງສືທີ່ປະຊາຊົນມີຄວາມຄຸ້ນເຄີຍ ແລະ ໄວ້ວາງໃຈ, ສື່ເຫຼົ່ານີ້ຈະຊ່ວຍພະນັກງານແພດ ແລະ ອົງການປົກຄອງບ້ານໃນການສົ່ງເສີມວຽກງານປ້ອງກັນສຸຂະພາບໄດ້ເປັນຢ່າງດີໃນຕໍ່ໜ້າ."
ສື່ທີ່ໄດ້ຜະລິດຂຶ້ນໃໝ່ປະກອບມີ: ຊຸດວິດີໂອພາບກາຕູນເຄື່ອນໄຫວ, ມີຫຼາຍພາສາ, ອອກແບບ ໂດຍສະເພາະສໍາລັບການເປີດໃນໂທລະສັບມືຖື ໂດຍພະນັກງານແພດໃນຂະນະລົງເຄື່ອນໄຫວໃນຊຸມຊົນ, ແຜ່ນພັບທີ່ມີຂໍ້ມູນກ່ຽວກັບວັກຊິນທັງແບບພິມ ແລະ ດີຈີຕອນ. ສື່ດັ່ງກ່າວ, ແມ່ນອອກແບບສະເພາະ ເພື່ອນໍາໃຊ້ໃນຊຸມຊົນ ແລະ ເພື່ອໃຫ້ສະດວກແກ່ພະນັກງານແພດ, ສັງຄົມ ຈະມີການເຜີຍແຜ່ ສາມາດຊອກຫາໄດ້ຢູ່ໜ້າເຟສບຸກ (Facebook) ຂອງສູນສະຖິຕິ ແລະ ຂ່າວສານສາທາລະນະສຸກ:https://shorturl.at/SR9tZ, ຊ່ອງຢູທູບ (YouTube) ຂອງໂຄງການໃຫ້ວັກຊິນກັນພະຍາດແຫ່ງຊາດ: https://shorturl.at/SqWea.
(ຂ່າວ-ພາບ: ວັນເພັງ)
ຄໍາເຫັນ