ໃນພິທີ, ສະຫາຍ ພັຕ ຄິດທະວົງ ສຸກກະເສີມ ຫົວໜ້າການທະຫານ ໂຮງຮຽນການທະຫານທ້ອງຖິ່ນ ໄດ້ສະຫຼຸບຕີລາຄາຜົນໄດ້ຮັບໃນການຈັດຕັ້ງເຝິກອົບຮົມ-ຫັດແອບໄລຍະ 3 ເດືອນໃຫ້ແກ່ທະຫານໃໝ່ທີ່ດຳລົງຊິວິດພາຍໃນໂຮງຮຽນແຫ່ງນີ້. ການຈັດຕັ້ງເຝິກອົບຮົມ-ຫັດແອບຄັ້ງນີ້, ມີນັກຮຽນທະຫານໃໝ່ເຂົ້າຮ່ວມທັງໝົດ 67 ສະຫາຍ ຍິງ 16 ສະຫາຍ, ມີໜ້າສອບເສັງຕົວຈິງ 66 ສະຫາຍ. ໃນນີ້ ລວມມີການສອບເສັງພາກການເມືອງ, ພາກສີນລະປະຍຸດ, ພາກຍຸດທະວິທີ ແລະ ພາກລະບຽບ, ແຕ່ລະພາກສະເລ່ຍແມ່ນຢູ່ໃນລະດັບຂັ້ນກາງ. ຈາກນັ້ນ, ກໍໄດ້ມອບມອບໃບຢັ້ງຢືນໃຫ້ທະຫານໃໝ່ທີ່ສຳເລັດການເຝິກອົບຮົມ-ຫັດແອບໃນຄັ້ງນີ້.
ສະຫາຍ ບຸນໂຈມ ອຸບົນປະເສີດ ໄດ້ກ່າວເຖິງຄວາມສຳຄັນຂອງກຳລັງປ້ອງກັນຊາດ, ເພາະເປັນກຳລັງປະກອບສ່ວນຢ່າງໜັກແໜ້ນໃນດ້ານຄວາມສະຫງົບຂອງທ້ອງຖິ່ນ ແລະ ຄວາມໝັ້ນຄົງຂອງປະເທດຊາດ. ກຳລັງປ້ອງກັນຊາດແມ່ນຕ້ອງໄດ້ໃກ້ຊິດຕິດແທດກັບປະຊາຊົນໃນຮາກຖານ, ຮູ້ຄວາມມຸ່ງມາດປາຖະໜາຂອງປະຊາຊົນ, ປະກອບສ່ວນຢ່າງຕັ້ງໜ້າໃນການສ້າງໃຫ້ທ້ອງຖິ່ນມີຄວາມສະຫງົບປອດໄພ, ສ້າງຮາກຖານພັກໃຫ້ມີຄວາມເຂັ້ມແຂງ ເພື່ອຂັບເຄື່ອນແນວທາງນະໂຍບາຍຂອງພັກໃຫ້ເຂົ້າສູ່ລວງເລິກໃນທ້ອງຖິ່ນຕ່າງໆຢ່າງມີປະສິດທິຜົນ, ພ້ອມນັ້ນກຳລັງ ປກຊ ຕ້ອງຮູ້ນຳພາການເມືອງ-ແນວຄິດໃຫ້ປະຊາຊົນ, ເຝິກຝົນຫຼໍ່ຫຼອມຕົນເອງໃຫ້ກາຍເປັນທະຫານຂອງປະຊາຊົນທີ່ເກັ່ງ ແລະ ມີອຸດົມການທີ່ດີ, ມີນໍ້າໃຈຮັກຊາດອັນດູດດື່ມ, ມີຈິດໃຈເຂັ້ມແຂງອາດຫານ, ເຮັດສຸດກົກສຸດປາຍ ເພື່ອປົກປ້ອງອະທິປະໄຕ ແລະ ຜືນແຜ່ນດິນອັນຄົບຖ້ວນຂອງພວກເຮົາໃຫ້ມີຄວາມສະຫງົບປອດໄພ.
(ແຫຼ່ງຂ່າວ: ແຂວງສະຫວັນນະເຂດ)
ຄໍາເຫັນ