 |
ໃນການພົບປະດັ່ງກ່າວ, ທ່ານ ຮອງລັດຖະມົນຕີ ໄດ້ສະແດງຄວາມຍິນດີຕ້ອນຮັບການຢ້ຽມຢາມ ແລະ ການພົບປະເຮັດວຽກຂອງ ທ່ານເລຂາທິການບໍລິຫານງານຂອງອົງການດັ່ງກ່າວ ພ້ອມທັງ ໄດ້ຢໍ້າຄືນຄວາມໝັ້ນໝາຍຂອງ ສປປ ລາວ ໃນການສະໜັບສະໜູນຕໍ່ເປົ້າໝາຍ ແລະ ຫຼັກການຂອງສົນທິສັນຍາ ວ່າດ້ວຍການເກືອດຫ້າມການທົດລອງອາວຸດນິວເຄລຍທຸກຮູບແບບ (CTBT).ນອກຈາກນີ້, ຍັງໄດ້ສະແດງການສະໜັບສະໜູນຂອງ ສປປ ລາວ ຕໍ່ການຫຼຸດຜ່ອນອາວຸດນິວເຄລຍ, ການບໍ່ແຜ່ຜາຍອາວຸດນິວເຄລຍ ແລະ ການສົ່ງເສີມສັນຕິພາບ ແລະ ຄວາມໝັ້ນຄົງສາກົນ.
ທັງສອງຝ່າຍໄດ້ແລກປ່ຽນທັດສະນະກ່ຽວກັບການຮ່ວມມືລະຫວ່າງ ສປປ ລາວ ແລະ CTBTO ໃນຫຼາຍດ້ານ, ລວມທັງການສ້າງຄວາມອາດສາມາດ, ການສະໜັບສະໜູນການສ້າງຕັ້ງສູນຂໍ້ມູນແຫ່ງຊາດ (National Data Centre: NDC), ຕະຫຼອດເຖິງການນຳໃຊ້ຂໍ້ມູນຈາກລະບົບຕິດຕາມຂອງ CTBTO ເພື່ອຜົນປະໂຫຍດໃນທາງສັນຕິ ເຊັ່ນ: ການຕິດຕາມແຜ່ນດິນໄຫວ, ການເຕືອນໄພພິບັດ, ການຄົ້ນຄວ້າວິທະຍາສາດ ແລະ ການຕິດຕາມສະພາບແວດລ້ອມ.
ຝ່າຍ CTBTO ໄດ້ສະແດງຄວາມຊື່ນຊົມຕໍ່ການສະໜັບສະໜູນຢ່າງຕໍ່ເນື່ອງຂອງ ສປປ ລາວ ຕໍ່ສົນທິສັນຍາ CTBT ແລະ ຍິນດີທີ່ ສປປ ລາວ ຈະສືບຕໍ່ຮ່ວມມືຢ່າງໃກ້ຊິດກັບ CTBTO ໃນອະນາຄົດ. ທັງສອງຝ່າຍຍັງໄດ້ແລກປ່ຽນຄໍາຄິດຄໍາເຫັນກ່ຽວກັບການສົ່ງເສີມການເຂົ້າເປັນພາຄີຂອງສົນທິສັນຍາໃນລະດັບສາກົນ ແລະ ໂອກາດໃນການຂະຫຍາຍການຮ່ວມມືດ້ານການຝຶກອົບຮົມ, ການພັດທະນາບຸກຄະລາກອນ ແລະ ກິດຈະກຳລະດັບພາກພື້ນ.
ການພົບປະດັ່ງກ່າວໄດ້ດຳເນີນໄປໃນບັນຍາກາດທີ່ເປັນມິດ ແລະ ສ້າງສັນ, ສະທ້ອນໃຫ້ເຫັນເຖິງຄວາມຕັ້ງໃຈຮ່ວມກັນຂອງ ສປປ ລາວ ແລະ CTBTO ໃນການສົ່ງເສີມສັນຕິພາບ, ຄວາມໝັ້ນຄົງ ແລະ ການພັດທະນາແບບຍືນຍົງ.
ອົງການສົນທິສັນຍາວ່າດ້ວຍການເກືອດຫ້າມການທົດລອງອາວຸດນິວເຄລຍທຸກຮູບແບບ (CTBTO)ໄດ້ຮັບການສ້າງຕັ້ງຂຶ້ນໃນປີ 1996, ມີສໍານັກງານໃຫຍ່ຕັ້ງຢູ່ ວຽນນາ, ປະເທດໂອຕຣິດ.ເປັນອົງການສາກົນທີ່ມີໜ້າທີ່ສົ່ງເສີມການຈັດຕັ້ງປະຕິບັດສົນທິສັນຍາ ວ່າດ້ວຍການເກືອດຫ້າມການທົດລອງອາວຸດນິວເຄລຍທຸກຮູບແບບ (CTBT) ຜ່ານການພັດທະນາລະບົບການຕິດຕາມກວດກາການລັບລອບທົບລອງອາວຸດນິວເຄລຍ, ການກວດສອບ ແລະ ການສ້າງຂີດຄວາມສາມາດໃຫ້ແກ່ລັດພາຄີເພື່ອສົ່ງເສີມໂລກທີ່ປາສະຈາກການທົດລອງອາວຸດນິວເຄລຍ.
(ຂ່າວ: ກຕທ)
ຄໍາເຫັນ