 |
ພິທີເປີດງານດັ່ງກ່າວ ໃຫ້ກຽດເປັນປະທານ ແລະ ກ່າວເປີດງານໂດຍ ທ່ານ ຕິ່ງ ເຊສຽງ ຮອງນາຍົກລັດຖະມົນຕີ ຜູ້ປະຈຳການ ຂອງ ສປ ຈີນ, ໂດຍມີບັນດາຜູ້ນຳຂັ້ນສູງ ແລະ ຜູ້ແທນຈາກພາກລັດ, ພາກທຸລະກິດ ແລະ ພາກສ່ວນຕ່າງໆ ຂອງ ອາຊຽນ ແລະ ຈີນ ເຂົ້າຮ່ວມ.
 |
ສຳລັບງານວາງສະແດງຄັ້ງນີ້ ຈັດຂຶ້ນພາຍໃຕ້ຄຳຂວັນ “ສົ່ງເສີມກາລະໂອກາດຂອງການຍົກລະດັບເຂດການຄ້າເສລີ ອາຊຽນ-ຈີນ 3.0 ເພື່ອຊີວິດທີ່ດີຂຶ້ນກວ່າເກົ່າ” (China-ASEAN Free Trade Area 3.0 Opportunity, Better Life) ຊຶ່ງສະແດງໃຫ້ເຫັນເຖິງຄວາມມຸ່ງໝັ້ນຂອງ ອາຊຽນ ແລະ ຈີນ ໃນການສືບຕໍ່ຍົກລະດັບ ແລະ ເສີມສ້າງການຮ່ວມມືດ້ານເສດຖະກິດ, ການຄ້າ ແລະ ການລົງທຶນ ໃຫ້ເກີດໝາກຜົນເປັນຮູບປະທຳຫຼາຍຂຶ້ນ.
 |
ໃນໂອກາດນີ້, ທ່ານ ສະເຫຼີມໄຊ ກົມມະສິດ ໄດ້ກ່າວປາໄສ ສະແດງຄວາມຍິນດີ ແລະ ຕີລາຄາສູງຕໍ່ການຈັດງານວາງສະແດງ (CAEXPO) ຢ່າງຕໍ່ເນື່ອງ ແລະ ໄດ້ເນັ້ນວ່າ, ການຍົກລະດັບເຂດການຄ້າເສລີ ອາຊຽນ-ຈີນ 3.0 ຈະເປັນບາດກ້າວສຳຄັນໃນການສ້າງໂອກາດໃໝ່ໃຫ້ແກ່ການຮ່ວມມື ອາຊຽນ-ຈີນ ໃນຫຼາຍຂົງເຂດທີ່ຄວນໃຫ້ຄວາມສຳຄັນ ເຊັ່ນ:
1. ດ້ານການຄ້າ ແລະ ການລົງທຶນ: ໂດຍເນັ້ນການຫັນເປັນທັນສະໄໝດ້ານການຄ້າ, ການສົ່ງເສີມເສດຖະກິດດີຈີຕອນ ແລະ ການພັດທະນາສີຂຽວຢ່າງຍືນຍົງ. 2. ການຮ່ວມມືດ້ານພະລັງງານ: ໂດຍການເພີ່ມທະວີການຮ່ວມມືໃນການຫັນປ່ຽນໄປສູ່ພະລັງງານສະອາດ, ຊຸກຍູ້ການລົງທຶນຮ່ວມໃນຂະແໜງພະລັງງານທົດແທນ, ການພັດທະນາຕົວເມືອງອັດສະລິຍະ ແລະ ໂຄງລ່າງພື້ນຖານທີ່ຍືນຍົງ; ແລະ 3. ດ້ານການຮ່ວມມືໃນການຄໍ້າປະກັນສະບຽງອາຫານ, ພະລັງງານ ແລະ ຕ່ອງໂສ້ການຜະລິດ ລະຫວ່າງ ອາຊຽນ-ຈີນ, ຜ່ານການອຳນວຍຄວາມສະດວກດ້ານການຄ້າ, ຫຼຸດຜ່ອນອຸປະສັກ ແລະ ສິ່ງກີດຂວາງທາງການຄ້າທີ່ບໍ່ແມ່ນພາສີ, ພ້ອມທັງສົ່ງເສີມພາກຈຸນລະວິສາຫະກິດ ແລະ ວິສາຫະກິດຂະໜາດນ້ອຍ ແລະ ກາງ, ການພັດທະນາເສດຖະກິດດີຈີຕອນ ແລະ ເສດຖະກິດສີຂຽວ.
 |
ສຳລັບ ສປປ ລາວ, ການຍົກລະດັບ ເຂດການຄ້າເສລີ ອາຊຽນ-ຈີນ 3.0 ຈະເປີດໂອກາດສຳຄັນໃຫ້ເຂົ້າເຖິງຕະຫຼາດຂະໜາດໃຫຍ່ຂອງຈີນ, ພ້ອມທັງຊ່ວຍເສີມສ້າງຂີດຄວາມສາມາດໃນການແຂ່ງຂັນ ແລະ ເພີ່ມທະວີການສົ່ງອອກສິນຄ້າລາວໄປຍັງຕະຫຼາດຈີນ. ພ້ອມກັນນີ້, ສປປ ລາວ ຍັງມີທ່າແຮງສຳຄັນໃນການເປັນຂົວຕໍ່ພາກພື້ນ ສຳລັບການຂົນສົ່ງສິນຄ້າ ແລະ ການໄປມາຫາສູ່ຂອງປະຊາຊົນລະຫວ່າງ ອາຊຽນ ແລະ ຈີນ. ໃນນີ້, ໂຄງການລົດໄຟ ລາວ-ຈີນ ໄດ້ກາຍເປັນໂຄງການຕົວແບບທີ່ສຳຄັນ ທີ່ນຳຜົນປະໂຫຍດອັນເປັນຮູບປະທຳມາສູ່ການພັດທະນາດ້ານເສດຖະກິດ, ການຄ້າ, ການຂົນສົ່ງ ແລະ ການເຊື່ອມໂຍງ-ເຊື່ອມຈອດພາກພື້ນ.
ທ່ານຮອງນາຍົກລັດຖະມົນຕີ ຍັງໄດ້ສະແດງຄວາມຊົມເຊີຍ ເມືອງຊາງຊູນ ແຂວງຈິລິນ ທີ່ຖືກຄັດເລືອກໃຫ້ເປັນເມືອງແຫ່ງສະເໜ່ ເພື່ອສົ່ງເສີມການຄ້າ ແລະ ການລົງທຶນຂອງ ສປ ຈີນ ປີ 2026. ສໍາລັບ ສປປ ລາວ ໄດ້ຄັດເລືອກເອົາ ແຂວງເຊກອງ ເປັນເມືອງແຫ່ງສະເໜ່ ປະຈໍາປີ 2026 ເພື່ອເປັນການດຶງດູດການຄ້າ-ການລົງທຶນ, ການທ່ອງທ່ຽວ ແລະ ການແລກປ່ຽນທາງດ້ານວັດທະນະທຳຂອງລາວ ສູ່ເວທີພາກພື້ນ ແລະ ສາກົນ. ພ້ອມນີ້, ຍັງໄດ້ເຊີນຊວນບັນດາແຂກໄປຢ້ຽມຊົມຮ້ານວາງສະແດງສິນຄ້າຈາກ ສປປ ລາວ ແລະ ຈາກອາຊຽນ ແລະ ສປ ຈີນ ໃນງານວາງສະແດງສິນຄ້າໃນຄັ້ງນີ້.
(ຂ່າວ: ຫສນຍ)
ຄໍາເຫັນ