 |
ໃນໂອກາດດັ່ງກ່າວ, ທ່ານ ທອງສະຫວັນ ພົມວິຫານ ໄດ້ຝາກຄວາມຢື້ຢາມຖາມຂ່າວ ຈາກ ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປລາວ ມາຍັງ ການນຳຂັ້ນສູງ ຂອງອິນໂດເນເຊຍ ແລະ ໄດ້ສະແດງຄວາມປິຕິຍິນດີທີ່ໄດ້ເຂົ້າຢ້ຽມຂໍ່ານັບກັບ ທ່ານ ກິບຣານ ຣາຄາບຸຫມິງ ຣາຄາ ໃນໂອກາດຢ້ຽມຢາມ ສ ອິນໂດເນເຊຍ ຢ່າງເປັນທາງການໃນຄັ້ງນີ້ຊຶ່ງເປັນຄັ້ງທໍາອິດ ພາຍຫຼັງດໍາລົງຕໍາແໜ່ງເປັນ ຮອງນາຍົກລັດຖະມົນຕີ ແລະ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ພ້ອມທັງໄດ້ແຈ້ງໃຫ້ຊາບ ກ່ຽວກັບການເຄື່ອນໄຫວພົບປະພາກສ່ວນຕ່າງໆທີ່ກ່ຽວຂ້ອງຂອງອິນໂດເນເຊຍ ເພື່ອຊຸກຍູ້ສົ່ງເສີມການຄ້າ ແລະ ການລົງທຶນສອງຝ່າຍ ແລະ ຍັງໄດ້ເເຈ້ງຜົນການພົບປະສອງຝ່າຍກັບ ທ່ານ ສຸກິໂອໂນ ລັດຖະມົນຕີກະຊວງການຕ່າງປະເທດແຫ່ງ ສ ອິນໂດເນເຊຍ ໂດຍຫຍໍ້ ຊຶ່ງສອງຝ່າຍໄດ້ເຫັນດີເປັນເອກະພາບຊຸກຍູ້ການຮ່ວມມືໃນຫຼາຍດ້ານ ເພື່ອສົ່ງເສີມການພົວພັນຮ່ວມມືສອງຝ່າຍໃນດ້ານຕ່າງໆໃຫ້ຂະຫຍາຍຕົວໃນຕໍ່ໜ້າ ໂດຍສະເພາະແມ່ນການຊຸກຍູ້ການຮ່ວມມືທາງດ້ານການຄ້າ ແລະ ການລົງທຶນລະຫວ່າງສອງປະເທດໃຫ້ຂະຫຍາຍຕົວ, ການຍົກລະດັບການພົວພັນຮ່ວມມືສອງຝ່າຍໃນຕໍ່ໜ້າລວມທັງການຮ່ວມກັນກະກຽມຈັດບັນດາກິດຈະກໍາຕ່າງໆເພື່ອສະເຫຼີມສະຫຼອງ ຄົບຮອບ 70 ປີ ແຫ່ງການສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ສ ອິນໂດເນເຊຍ ທີ່ຈະມາເຖິງ ໃນປີ 2027 ນີ້.
 |
ສອງຝ່າຍ ຍັງໄດ້ຕີລາຕາສູງຕໍ່ສາຍພົວພັນມິດຕະພາບອັນຍາວນານ ແລະ ການຮ່ວມມືຢ່າງໃກ້ຊິດລະຫວ່າງ ສປປ ລາວ ແລະ ສ ອິນໂດເນເຊຍ ໃນໄລຍະ 69 ປີຜ່ານມາ ທີ່ໄດ້ຮັບການເສີມຂະຫຍາຍຢ່າງຕໍ່ເນື່ອງ ເຫັນໄດ້ຈາກມີການແລກປ່ຽນການຢ້ຽມຢາມ ລະຫວ່າງການນໍາຂັັ້ນສູງ ແລະ ປະຊາຊົນ ຂອງສອງປະເທດ ຢ່າງເປັນປົກກະຕິ, ການຮ່ວມມືທາງດ້ານເສດຖະກິດ, ການທ່ອງທ່ຽວ ແລະ ດ້ານອຶ່ນໆກໍໄດ້ຮັບການພັດທະນາເປັນກ້າວໆ. ນອກຈາກນີ້, ສອງຝ່າຍ ຍັງເຫັນດີຊຸກຍູ້ສົ່ງເສີມການຮ່ວມມືໃນດ້ານຕ່າງໆທີ່ສອງປະເທດມີທ່າແຮງໃຫ້ຫຼາຍຂຶ້ນ ເປັນຕົ້ນແມ່ນດ້ານກະສິກໍາ, ພະລັງງານ, ການຄໍ້າປະກັນທາງດ້ານສະບຽງອາຫານ, ບໍ່ແຮ່ ແລະ ອື່ນໆ. ໃນໂອກາດນີ້, ສອງຝ່າຍ ຈະຮ່ວມກັນຈັດກອງປະຊຸມຄະນະກຳມາທິການຮ່ວມວ່າດ້ວຍການຮ່ວມມືສອງຝ່າຍ ລະຫວ່າງ ລາວ-ອິນໂດເນເຊຍ ຄັ້ງທີ 6 ຢູ່ ສປປ ລາວ ໃນໂອກາດລັດຖະມົນຕີຕ່າງປະເທດອິນໂດເນເຊຍ ຢ້ຽມຢາມທາງການ ສປປ ລາວ ໃນຕົ້ນປີ 2027 ຕາມຄຳເຊີນ ຂອງຝ່າຍລາວ.
 |
ໃນໂອກາດນີ້, ທ່ານ ທອງສະຫວັນ ພົມວິຫານ ຍັງໄດ້ຕາງໜ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຂອບໃຈຢ່າງຈິງໃຈຕໍ່ລັດຖະບານ ແລະ ປະຊາຊົນ ອິນໂດເນເຊຍ ສໍາລັບ ການສະໜັບສະໜູນ ແລະ ຊ່ວຍເຫຼືອ ໃຫ້ແກ່ ສປປ ລາວ ໃນຕະຫຼອດໄລຍະຜ່ານມາ ໂດຍສະເພາະແມ່ນການສະໜັບສະໜູນການເປັນປະທານອາຊຽນຂອງ ສປປ ລາວ ໃນປີ 2024 ທີ່ຜ່ານມາ.
ໃນຂະນະດຽວກັນ, ທ່ານ ກິບຣານ ຣາຄາບຸຫມິງ ຣາຄາ ກໍໄດ້ສະແດງຄວາມຍິນດີຕ້ອນຮັບອັນອົບອຸ່ນ ແລະ ຕີລາຄາສູງຕໍ່ການຢ້ຽມຢາມຄັ້ງນີ້ ພ້ອມທັງ ແຈ້ງໃຫ້ຊາບວ່າ: ອິນໂດເນເຊຍ ຖື ສປປ ລາວ ເປັນປະເທດເພື່ອນມິດທີ່ສຳຄັນທາງດ້ານຍຸດທະສາດ ໃນການຮ່ວມມືທາງດ້ານພະລັງງານ, ການຄໍ້າປະກັນທາງດ້ານສະບຽງອາຫານ, ກະສິກຳ ແລະ ອື່ນໆ ຊຶ່ງຈະເປັນການປະກອບສ່ວນໃນການສົ່ງເສີມສັນຕິພາບ ແລະ ຄວາມໝັ້ນຄົງພາຍໃນພາກພື້ນ ແລະ ສະແດງຄວາມຍິນດີຕໍ່ການຈະຍົກລະດັບການພົວພັນຮ່ວມມືລະຫວ່າງສອງປະເທດໃນອະນາຄົດ ຊຶ່ງຈະເປັນການປະກອບສ່ວນອັນສໍາຄັນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືດີທີ ລະຫວ່າງສອງປະເທດ ໃຫ້ນັບມື້ນັບແໜ້ນແຟ້ນຍິ່ງໆຂຶ້ນ.
ຂ່າວ-ພາບ: ກະຊວງການຕ່າງປະເທດ
ຄໍາເຫັນ