 |
ໃນໂອກາດດັ່ງກ່າວ, ທ່ານ ທອງສະຫວັນ ພົມວິຫານ ໄດ້ພົບປະ ແລະ ແລກປ່ຽນຄຳຄິດຄຳເຫັນ ກັບ ທ່ານ ເລຂາທິການໃຫຍ່ອາຊຽນ ແລະ ຄະນະກໍາມະການຜູ້ຕາງໜ້າຖາວອນປະຈໍາອາຊຽນ ກ່ຽວກັບ ການເສີມສ້າງປະຊາຄົມອາຊຽນໃຫ້ເຂັ້ມແຂງ, ສະພາບການພາກພື້ນ ແລະ ສາກົນ ທີ່ສົ່ງຜົນກະທົບຕໍ່ປະຊາຄົມ ອາຊຽນ ກໍຄື ປະເທດສະມາຊິກອາຊຽນ. ໃນນີ້, ທ່ານຮອງນາຍົກໄດ້ສະແດງຄວາມຊົມເຊີຍຕໍ່ບົດບາດຂອງ ຄະນະກໍາມະການຜູ້ຕາງໜ້າຖາວອນປະຈໍາອາຊຽນ ແລະ ກອງເລຂາອາຊຽນທີ່ໄດ້ປະກອບສ່ວນຢ່າງຕັ້ງໜ້າໃນຂະ ບວນການສ້າງປະຊາຄົມອາຊຽນ ກໍຄືການຈັດຕັ້ງປະຕິບັດວິໄສທັດປະຊາຄົມອາຊຽນ 2045 ໃຫ້ປະກົດຜົນເປັນຈິງ ດ້ວຍການຮັດແໜ້ນຄວາມສາມັກຄີ ແລະ ຍົກສູງຄວາມເປັນແກນກາງຂອງອາຊຽນ ທ່າມກາງສະພາບການຂອງພາກ ພື້ນ ແລະ ສາກົນທີ່ມີການຜັນແປຢ່າງສະຫຼັບສັບຊ້ອນ ແລະ ຄາດຄະເນໄດ້ຍາກ. ພ້ອມກັນນີ້, ທ່ານເລຂາທິ ການໃຫຍ່ອາຊຽນ ແລະ ບັນດາຜູ້ຕາງໜ້າຖາວອນປະຈໍາອາຊຽນ ກໍໄດ້ຕີລາຄາສູງຕໍ່ບົດບາດຂອງ ສປປ ລາວ ທີ່ໄດ້ປະກອບສ່ວນຢ່າງຫ້າວຫັນຕໍ່ອາຊຽນ, ລວມທັງຜົນສໍາເລັດການເປັນປະທານອາຊຽນຂອງ ສປປ ລາວ ໃນປີ 2024 ພາຍໃຕ້ຄໍາຂວັນ: ເພີີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ ຊຶ່ງມີຄວາມສອດຄ່ອງກັບ ຄວາມພະຍາຍາມຂອງອາຊຽນໃນການເພີ່ມທະວີການເຊື່ອມຈອດ ແລະ ເຊື່ອມໂຍງພາກພື້ນໃຫ້ນັບມື້ມີຄວາມ ເຂັ້ມແຂງຂຶ້ນ. ອັນສຳຄັນ, ທ່ານ ຮອງນາຍົກ ໄດ້ເນັ້ນຢ້ຳຄວາມສຳຄັນຂອງອາຊຽນ ໃນປີ 2027 ຊຶ່ງເປັນປີຄົບຮອບ 60 ປີ ແຫ່ງການສ້າງຕັ້ງອາຊຽນ ແລະ ຄົບຮອບ 30 ປີທີ່ ສປປ ລາວ ເຂົ້າເປັນສະມາຊິກອາຊຽນ.
 |
ຫຼັງຈາກນັ້ນ, ທ່ານ ທອງສະຫວັນ ພົມວິຫານ ໄດ້ພົບປະສອງຝ່າຍ ກັບ ທ່ານເລຂາທິການໃຫຍ່ອາຊຽນ ໂດຍສອງຝ່າຍໄດ້ປຶກສາຫາລືບັນດາບຸລິມະສິດຫຼັກຂອງອາຊຽນ ແລະ ຢໍ້າຄືນຄວາມໝາຍໝັ້ນເພື່ອສືບຕໍ່ສ້າງປະ ຊາຄົມອາຊຽນໃຫ້ມີຄວາມເຂັ້ມແຂງ ພ້ອມທັງແລກປ່ຽນຄໍາຄິດຄໍາເຫັນຕໍ່ບັນດາສິ່ງທ້າທາຍໃນປັດຈຸບັນ ໂດຍສະເພາະສິ່ງທ້າທາຍທາງດ້ານພະລັງງານ ແລະ ອາຫານ. ພ້ອມກັນນີ້, ທ່ານ ທອງສະຫວັນ ພົມວິຫານ ໄດ້ຕີລາຄາສູງ ແລະ ສະແດງຄວາມຂອບໃຈຕໍ່ທ່ານເລຂາທິການໃຫຍ່ອາຊຽນ ກໍຄືກອງເລຂາອາຊຽນທີ່ໄດ້ໃຫ້ການ ສະໜັບສະໜູນ, ຊ່ວຍເຫຼືອ ແລະ ໃຫ້ການຮ່ວມມືແກ່ ສປປ ລາວ ໃນໄລຍະຜ່ານມາ ໂດຍສະເພາະ ໃນການເປັນປະທານອາຊຽນ ແລະ ສະເໜີໃຫ້ທ່ານເລຂາທິການໃຫຍ່ອາຊຽນ ກໍຄືກອງເລຂາອາຊຽນສືບຕໍ່ໃຫ້ ການສະໜັບສະໜູນ ແລະ ຊ່ວຍເຫຼືອ ສປປ ລາວ ໂດຍສະເພາະໃນວຽກງານການສ້າງຂີດຄວາມສາມາດໃຫ້ ແກ່ພະນັກງານຂອງປະເທດສະມາຊິກອາຊຽນ, ລວມທັງ ສປປ ລາວ.
ໃນໂອກາດຢ້ຽມຢາມຄັ້ງນີ້, ທ່ານ ທອງສະຫວັນ ພົມວິຫານ ກໍໄດ້ມອບເຄື່ອງທີ່ລະນຶກທີ່ເປັນສັນຍາ ລັກວັດທະນະທຳຂອງ ສປປ ລາວ ໃຫ້ແກ່ທ່ານເລຂາທິການໃຫຍ່ອາຊຽນ ເພື່ອວາງສະແດງໄວ້ຢູ່ຫ້ອງວາງສະ ແດງຂອງກອງເລຂາອາຊຽນ.
ຂ່າວ: ກະຊວງການຕ່າງປະເທດ
ຄໍາເຫັນ