ທ່ານ ທອງສະຫວັນ ພົມວິຫານ ຕ້ອນຮັບເອກອັກຄະລັດຖະທູດລັດອິສຣາແອນ ປະຈໍາລາວ

ໃນໂອກາດນີ້, ທ່ານ ທອງສະຫວັນ ພົມວິຫານ ໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ຜົນສໍາເລັດການປະຕິບັດໜ້າທີ່ການທູດ ຢູ່ ສປປ ລາວ ໃນຕະຫຼອດໄລຍະເວລາເກືອບ 4 ປີ ທີ່ຜ່ານມາ ຊຶ່ງທ່ານເອກອັກຄະລັດຖະທູດ ໄດ້ປະຕິບັດໜ້າທີ່ການທູດຢ່າງຫ້າວຫັນ ໂດຍໄດ້ປະກອບສ່ວນອັນສໍາຄັນເຂົ້າໃນການເສີມຂະຫຍາຍມິດຕະພາບ ແລະ ການຮ່ວມມືທີ່ດີ ລະຫວ່າງ ສປປ ລາວ ແລະ ລັດອິສຣາແອນ ໃນໄລຍະຜ່ານມາໃຫ້ຂະຫຍາຍຕົວ ໂດຍສະເພາະການຊຸກຍູ້ສົ່ງເສີມການຮ່ວມມືທາງດ້ານການເມືອງ, ເສດຖະກິດ, ການພັດທະນາຊັບພະຍາກອນມະນຸດ ແລະ ອື່ນໆ ລວມທັງການຊຸກຍູ້ການໄປມາຫາສູ່ ລະຫວ່າງ ສອງປະເທດໃຫ້ຂະຫຍາຍຕົວ. ພ້ອມດຽວກັນນີ້, ທ່ານຮອງນາຍົກລັດຖະມົນຕີ ກໍຍັງໄດ້ສະແດງຄວາມຂອບໃຈຢ່າງຈິງໃຈຕໍ່ລັດຖະບານ ແຫ່ງ ລັດອິສຣາແອນ ທີ່ໄດ້ໃຫ້ການຊ່ວຍເຫຼືອໃນການພັດທະນາຊັບພະຍາກອນມະນຸດຜ່ານການຝຶກອົບຮົມໄລຍະສັ້ນ ໃຫ້ແກ່ນັກສຶກສາໃນຂະແໜງກະສິກຳ. ນອກຈາກນີ້, ຍັງໄດ້ເຊື້ອເຊີນບັນດານັກລົງທຶນຈາກລັດອິສຣາແອນ ເຂົ້າມາສຶກສາ ແລະ ຊອກຫາໂອກາດລົງທຶນໃນຂະແໜງການອື່ນໆທີ່ມີທ່າແຮງ ຂອງ ສປປ ລາວ ເຊັ່ນ: ອຸດສາຫະກໍາປຸງແຕ່ງກະສິກໍາ, ກະສິກໍາ, ນະວັດຕະກໍາ ແລະ ເຕັກໂນໂລຊີທີ່ທັນສະໄໝ, ພະລັງງານສະອາດ, ການທ່ອງທ່ຽວທໍາມະຊາດ ແລະ ອື່ນໆ.

ໃນໂອກາດດຽວກັນນີ້, ທ່ານ ຢາຣອນ ມາເຢີ ກໍໄດ້ສະແດງຄວາມຂອບໃຈຢ່າງຈິງໃຈມາຍັງ ລັດຖະບານ ແລະ ປະຊາຊົນລາວ ໂດຍສະເພາະ ກະຊວງການຕ່າງປະເທດ ແຫ່ງ ສປປ ລາວ ທີ່ໄດ້ໃຫ້ການສະໜັບສະໜູນ, ຊ່ວຍເຫຼືອ ແລະ ອໍານວຍຄວາມສະດວກໃນດ້ານຕ່າງໆ ໃຫ້ແກ່ການເຄື່ອນໄຫວໜ້າທີ່ການທູດຂອງຕົນ ຢູ່ ສປປ ລາວ ຈົນປະສົບຜົນສໍາເລັດຢ່າງຈົບງາມ ພ້ອມທັງສະແດງຄວາມໝາຍໝັ້ນທີ່ຈະສືບຕໍ່ປະກອບສ່ວນໃນການຊຸກຍູ້ສົ່ງເສີມສາຍພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງ ສປປ ລາວ ແລະ ລັດອິສຣາແອນ ໃຫ້ນັບມື້ນັບຈະເລີນງອກງາມຍິ່ງໆຂຶ້ນໃນຕໍ່ໜ້າ.

(ຂ່າວ: ກຕທ)