 |
ໃນໂອກກາດດັ່ງກ່າວ, ທ່ານ ວັນສີ ກົວມົວ ໄດ້ສະແດງຄວາມຕ້ອນຮັບຊົມເຊີນ ແລະ ຕີລາຄາສູງ ຕໍ່ການມາຢ້ຽມຢາມ ແລະ ເຮັດວຽກຢູ່ ສປປ ລາວ ຂອງຄະນະຜູ້ແທນ ວາລະສານກົງສ້ານ ໃນຄັ້ງນີ້ ຖືວ່າມີຄວາມໝາຍສໍາຄັນເປັນຢ່າງຍິ່ງ ເພາະເປັນການສືບຕໍ່ ແລະ ຊຸກຍູ້ສາຍພົວພັນມິດຕະພາບອັນຍິ່ງ ໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາ ຊົນສອງປະເທດລາວ-ຫວຽດນາມ ຊຶ່ງປະທານ ໂຮ່ຈິມິນ, ປະທານ ໄກສອນ ພົມວິຫານ, ປະທານ ສຸພານຸວົງ ແລະ ບັນດາການນໍາຫຼາຍຮຸ່ນໄດ້ຮ່ວມກັນສ້າງຕັ້ງ ແລະ ບຳລຸງຮັກສາໄວ້ ຈົນກາຍເປັນສາຍພົວພັນຕົວແບບທີ່ຫາຍາກໃນສາຍພົວພັນສາກົນ, ທ່ານ ວັນສີ ກົວມົວ ຍັງໄດ້ຕີລາຄາສູງຕໍ່ກັບໝາກຜົນຂອງການເສີມສ້າງການພົວພັນຮ່ວມມື ລະຫວ່າງ ວາລະສານອະລຸນໃໝ່ ຂອງພັກປະຊາຊົນ ປະຕິວັດລາວ ແລະ ວາລະສານກົງສ້ານ ຂອງພັກກອມມູນິດຫວຽດນາມ ໂດຍສະເພາະໝາກຜົນຂອງການຈັດຕັ້ງປະຕິບັດບົດບັນທຶກຊ່ວຍຈໍາ ໄລຍະປີ 2023-2027, ໂດຍສອງວາລະສານ ກໍໄດ້ພົບປະເພື່ອທົບທວນເຖິງຜົນສໍາເລັດ ຂອງທັງສອງຝ່າຍ ຢ່າງມີປະສິດທິຜົນສູງ.
ທ່ານ ຫງວຽນ ຫງັອກ ຮາ ໄດ້ສະແດງຄວາມຂອບໃຈ ຕໍ່ ທ່ານ ວັນສີ ກົວມົວ ທີ່ໄດ້ໃຫ້ການຕ້ອນຮັບຢ່າງອົບອຸ່ນ, ພ້ອມນີ້ ຍັງໄດ້ແຈ້ງຈຸດປະສົງ ໃນການມາເຄື່ອນໄຫວຢ້ຽມຢາມ ແລະ ເຮັດວຽກ ຢູ່ ສປປ ລາວ ໃຫ້ທ່ານໄດ້ຮັບຊາບ ໂດຍສະເພາະຜົນການມາເຮັດວຽກ ຮ່ວມກັບ ວາລະສານອະລຸນໃໝ່ ຂອງພັກ ປະຊາຊົນ ປະຕິວັດລາວ.
ໃນຕອນທ້າຍ, ທ່ານ ວັນສີ ກົວມົວ ກໍໄດ້ອວຍພອນໃຫ້ ທ່ານ ຫງວຽນ ຫງັອກ ຮາ ພ້ອມຄະນະຈົ່ງມີສຸຂະພາບແຂງແຮງ, ມີຄວາມຜາສຸກ ແລະ ປະສົບຜົນສຳເລັດໃນການມາເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້.
(ຂ່າວ-ພາບ: ສຳນານ)
ຄໍາເຫັນ