ໃນການດໍາເນີນກອງປະຊຸມໃຫຍ່ ຄັ້ງທີVII ຂອງຄະນະບໍລິຫານງານຊາວໜຸ່ມ ຫ້ອງວ່າການສູນກາງພັກທີ່ນະຄອນຫຼວງວຽງຈັນ, ທ່ານ ວິວັດ ພົມມະຈັນ ຕາງໜ້າໃຫ້ສະມາຊິກຊາວໜຸ່ມ ກົມເລຂານຸການ-ການນຳ ໄດ້ຮັບກຽດຈາກຄະນະປະທານກອງປະຊຸມ ຂຶ້ນນຳສະເໜີ ບາງບົດຮຽນກ່ຽວກັບການສ້າງເສດຖະກິດຄອບຄົວ ເວລານອກໂມງການ ຊຶ່ງທ່ານໄດ້ລາຍງານວ່າ: ພາຍຫຼັງທີ່ໄດ້ເຂົ້າມາສັງກັດ ຢູ່ກົມເລຂານຸການ-ການນຳ, ຫ້ອງວ່າການສູນກາງພັກ ໄດ້ຮັບຄວາມເອົາໃຈໃສ່ຢ່າງໃກ້ຊິດຕິດແທດຈາກບັນດາສະຫາຍ ຄະນະພັກ, ຄະນະນຳ ຫສພ ກໍຄື ຄະນະນຳຊາວໜຸ່ມຫ້ອງວ່າການສູນກາງພັກ ແລະ ໄດ້ຮັບການຮ່ວມມືຈາກເພື່ອນຮ່ວມງານ, ສະມາຊິກຊາວໜຸ່ມທຸກໆສະຫາຍຕະຫຼອດມາ, ແຕ່ໃນສະພາບທີ່ເສດຖະກິດ ແລະ ສິ່ງແວດລ້ອມ ຍັງບໍ່ທັນເອື້ອອໍານວຍ ເທົ່າທີ່ຄວນ ແລະ ເພື່ອສ້າງຄວາມເຂັ້ມແຂງໃຫ້ຕົນເອງ ກໍຄືຄອບຄົວ ແລະ ເພື່ອນຮ່ວມງານ ໃຫ້ໝັ້ນຄົງຂຶ້ນນັ້ນ, ຂ້າພະເຈົ້າໄດ້ພະຍາຍາມຄົ້ນຄິດຊອກຫາວິທີຕ່າງໆ ໃນການຊອກຫາລາຍໄດ້ເສີມ ໄປຄຽງຄູ່ກັບການປະຕິບັດໜ້າທີ່ວຽກງານ ໃນຍຸກທີ່ຄ່າຄອງຊີບສູງ ຖ້າອາໄສແຕ່ເງິນເດືອນພຽງຢ່າງດຽວແນ່ນອນຈະບໍ່ພຽງພໍກັບລາຍຈ່າຍຕ່າງໆ. ດັ່ງນັ້ນ, ຈຶ່ງໄດ້ຫາວິທີສ້າງລາຍໄດ້ເສີມໂດຍການຖືເອົາເວລາວ່າງ ເພື່ອຫາລາຍຮັບຕາມທ່າແຮງຂອງຕົນເອງ ຊຶ່ງແນວຄິດລິເລີ່ມ ແມ່ນຢາກໄດ້ ຢາກມີ ເພື່ອສ້າງຄວາມເຂັ້ມແຂງໃຫ້ແກ່ຕົນເອງ, ສິ່ງທີ່ຄິດໄດ້ແມ່ນຖືວ່າ ມີໄຊໄປແລ້ວເຄິ່ງໜຶ່ງ ສ່ວນທີ່ເຫຼືອແມ່ນການຈັດຕັ້ງປະຕິບັດ ເພາະວ່າການລົງທຶນແມ່ນມີຄວາມສ່ຽງ ແຕ່ຖ້າຫາກວ່າເຮົາບໍ່ກ້າລົງທຶນກໍບໍ່ເຫັນຜົນກຳໄລ, ບໍ່ກ້າເປີດໃຈກໍບໍ່ເຫັນຄວາມສຳເລັດ ຍ້ອນວ່າມີຄຳວ່າ “ພະ” ທີ່ສາມາດ ຜ່ານຜ່າໄດ້ ນັ້ນກໍຄື ພະຍາມຍາມຕາມທ່າແຮງຂອງຕົນ. ດັ່ງນັ້ນ, ຈຶ່ງຖືເອົາການປູກພືດກະສິກໍາໃຫ້ກາຍເປັນສິນຄ້າ ແລະ ຂາຍເຄື່ອງອອນລາຍ. ໃນເບື້ອງຕົ້ນ ໄດ້ນໍາເອົາຜະລິດຕະພັນຕ່າງໆ ມາລົງໂຄສະນາ ເຊັ່ນ: ອາຫານເສີມ, ເສື້ອຜ້າພື້ນເມືອງລາວ ແລະ ຜະລິດຕະພັນອື່ນໆທັງພາຍໃນ ແລະຕ່າງປະເທດ. ມາຮອດວັນທີ 6 ມິຖຸນາ 2019 ໄດ້ຕັດສິນໃຈເປີດເພສ ຮ້ານຂາຍສິ້ນໄໝອອນລາຍ ໂດຍຂາຍຜ່ານການໄລສົດ ຊຶ່ງປັດຈຸບັນນີ້ມີຜູ້ຕິດຕາມ75 ພັນຄົນໃນລະບົບເຟສບຸກ ແລະ ມາເຖິງປັດຈຸບັນນີ້ແມ່ນຫັນມາຂາຍເຄື່ອງໃຊ້ຄົວເຮືອນຕ່າງໆ; ໂດຍມີຕົ້ນທຶນໃນເບື້ອງຕົ້ນ 33 ລ້ານກີບ, ໃນນັ້ນຈ່າຍຄ່າຕົບແຕ່ງຮ້ານ ແລະ ຊື້ອຸປະກອນຕ່າງໆ15 ລ້ານກີບ ສ່ວນທີ່ເຫຼືອແມ່ນຊື້ສິ້ນໄໝ-ຜ້າ, ຈາກການຂາຍໃນມື້ທໍາອິດໄດ້ 490,000ກີບ, ເດືອນໜຶ່ງຂາຍໄດ້ 18 ລ້ານກີບ, ກໍາໄລປະມານ 5-6 ລ້ານກີບ ແລະ ຍອດຂາຍໝົດປີໄດ້ 200 ລ້ານກວ່າກີບ ໃນນັ້ນກໍາໄລປະມານ 50 ລ້ານກວ່າກີບ. ຖືວ່າພາຍໃນປີທໍາອິດແມ່ນສາມາດໃຊ້ໜີ້ທີ່ກູ້ຢຶມມາ ແລະ ຍັງມີທຶນໄວ້ໝູນວຽນໃຫ້ຫຼາຍຂຶ້ນ. ຄຽງຄູ່ກັນນັ້ນໄດ້ສູ້ຊົນ, ພະຍາຍາມ, ຊອກຮຽນ-ຮູ້ແບບແຜນ ແລະ ວິທີການບໍລິຫານທຸລະກິດການຕະຫຼາດ “ຄອດອອນລາຍ”ຕ່າງໆ ແລະ ຈາກບົດຮຽນການຂາຍຂອງຕົນເອງຕະຫຼອດມາຕາມຍຸກສະໄໝ.
ຮອດປີ 2020 ຈຶ່ງສຸມໃສ່ການລົງທຶນໃຫ້ຫຼາຍຂຶ້ນ, ແຕ່ກໍພົບອຸປະສັກຫຼາຍຢ່າງ ເປັນຕົ້ນ: ອັດຕາແລກປ່ຽນມີການເໜັງຕີງ ບວກໃສ່ສະພາບການແຜ່ລະບາດຂອງພະຍາດໂຄວິດ-19 ເຮັດໃຫ້ຍອດຂາຍຫຼຸດລົງ ແຕ່ກໍສາມາດປະຄັບປະຄອງຫັນປ່ຽນຕາມສະພາບການມາໄດ້. ນອກຈາກຂາຍເສື້ອຜ້າ, ເຄື່ອງໃຊ້ຄົວເຮືອນແລ້ວ ຍັງໄດ້ແບ່ງເວລາເຮັດການກະເສດລົ້ມລຸກ ໄລຍະສັ້ນອີກຊ່ອງທາງໜຶ່ງ ເປັນຕົ້ນ ເຮັດສວນສາລີ, ຖົ່ວແດງ ແລະ ມັນຕົ້ນ ລວມເນື້ອທີ່ທັງໝົດ ຈຳນວນ 7ເຮັກຕາ, ນັບແຕ່ເດືອນ ພຶດສະພາ- ເດືອນກັນຍາເກັບກ່ຽວສາລີໄດ້ 70ລ້ານກີບ, ເດືອນກັນຍາ-ເດືອນທັນວາ ເກັບຖົ່ວແດງ45 ລ້ານກີບ, ເກັບກ່ຽວມັນຕົ້ນໄດ້ 20ລ້ານ ລວມຍອດການຜະລິດໃນປີ2020 ໄດ້ 135 ລ້ານ, ລົບຕົ້ນທຶນໄດ້ 90 ລ້ານກີບ. ນັ້ນແມ່ຈຸດເລີ່ມຕົ້ນທີ່ສາມາດຕອບສະໜອງຜົນຜະລິດໄດ້ຕາມຄາດໝາຍທີ່ວາງໄວ້ໃນໄລຍະປີ2021 ເຖິງປັດຈຸບັນຍັງສືບຕໍ່ເຮັດໃຫ້ຫຼາຍເພີ່ມຂຶ້ນ 4 ເຮັກຕາ ລວມເປັນ 11 ເຮັກຕາ, ໃນປີ 2024 ສາມາດເກັບຜົນຜະລິດ 281 ລ້ານກີບ ບວກລົບຕົ້ນທຶນເຫຼືອ197 ລ້ານກີບ.
ລວມຍອດການຜະລິດກະສິກຳ ແລະ ຍອດການຂາຍອອນລາຍໃນທ້າຍປີ2024 ເຖິງປັດຈຸບັນ ມີຍອດຂາຍໝູນວຽນ 900 ລ້ານກີບ, ຕະຫຼອດໄລຍະການຫາລາຍໄດ້ເສີມນັ້ນ ຄອບຄົວຂ້າພະເຈົ້າ ຍັງພົບອຸປະສັກຫຼາຍຢ່າງເປັນຕົ້ນແມ່ນ ການປູກພືດກະສິກຳບັນຫາຫຼັກໆ ແມ່ນຂາດແຮງງານ ແລະ ຕົ້ນທຶນໃນການຜະລິດສູງຂຶ້ນ, ສ່ວນລາຄາຂາຍຜົນຜະລິດຊໍ້າພັດຕໍ່າ ທຽບໃສ່ຕົ້ນທຶນ ແລະ ຂອງປະເທດເພື່ອນບ້ານ, ການລົງໂຄສະນາຈ່າຍເປັນເງິນຕາຕ່າງປະເທດ ການນຳໃຊ້ວົງເງິນຕາ ທີ່ທະນາຄານກຳນົດໃຫ້ມີຈຳກັດ ອັດຕາແລກປ່ຽນມີການເໜັງຕີງ ເຮັດໃຫ້ທຸລະກິດຄອບຄົວໄດ້ຮັບຜົນກະທົບພໍສົມຄວນ ແຕ່ຕົນເອງ ແລະ ຄອບຄົວຍັງຢຶດໝັ້ນ ແລະ ພະຍາຍາມສູ້ຊົນ ອຸ່ນອ່ຽນ, ທຸ່ນທ່ຽງ ກ້າວຜ່ານວິິກິດການເຫຼົ່ານັ້ນມາໄດ້ເປັນກ້າວໆ.
ລາຍຮັບດັ່ງທີ່ກ່າວມານັ້ນ ສາມາດຊື້ດິນປຸກສ້າງໄດ້ໜຶ່ງຕອນ ແລະ ປຸກສ້າງເຮືອນ 1 ຫຼັງ, ຊື້ລົດກະບະ 1 ຄັນ, ພ້ອມນັ້ນກໍໄດ້ສົ່ງເສີມການສຶກສາຂອງນ້ອງ ແລະ ລູກແລະ ຍັງຊ່ວຍໃຫ້ຫຼາຍຄົນໄດ້ມີວຽກເຮັດງານທໍາ ແລະ ສ້າງລາຍໄດ້ໃນເວລາຫວ່າງ.
ໃນແຜນຕໍ່ໜ້າ ຈະປັບປຸງການຜະລິດພືດກະສິກຳໃຫ້ເປັນຜະລິດຕະພັນສຳເລັດຮູບເພື່ອສົ່ງອອກ ພ້ອມທັງປັບປຸງຂອດການຂາຍເຄື່ອງໃຫ້ດີຂຶ້ນກວ່າເກົ່າ ເພື່ອບໍລິການລູກຄ້າໄດ້ຢ່າງທົ່ວເຖິງ ແລະ ທັງເປັນການຮັກສາລູກຄ້າໄວ້ໃຫ້ຍືນຍົງ, ຖ້າຫາກວ່າທ່ານໃດມີຄວາມສົນໃຈ ຫຼື ມັກຮັກໃນການຜະລິດພືດກະສິກຳ ແລະ ການຂາຍສິນຄ້າທາງອອນລາຍ, ການສັ່ງເຄື່ອງຈາກຕ່າງປະເທດ, ການຍິງໂຄສະນາ ກໍສາມາດມາຮຽນຮູ້ນໍາຂ້າພະເຈົ້າແມ່ນຍິນດີຕ້ອນຮັບ ແລະ ຖອດຖອນ, ແລກປ່ຽນບົດຮຽນ ສຳລັບຜູ້ທີ່ມີຄວາມສົນໃຈ.
ຄໍາເຫັນ