ໄດ້ຈັດສາຍຮອບພິເສດຢູ່ທີ່ສູນບຳລຸງຮັກສາເຂື່ອນໄຟຟ້ານໍ້າອູຈຳກັດທີ່ນະຄອນ-ຫຼວງພະບາງ ແຂວງຫຼວງພະບາງໃນວັນທີ 19 ພະຈິກ ຜ່ານມານີ້, ໂດຍມີທ່ານ ຄໍາໄຫຼ ສີປະເສີດ ກໍາມະການສູນກາງພັກ ຮອງປະທານສູນກາງແນວລາວສ້າງຊາດຜູ້ປະຈໍາການ, ທ່ານ ບຸນເຫຼືອ ສິນໄຊວໍລະວົງ ຮອງເລຂາພັກແຂວງຮອງເຈົ້າແຂວງຫຼວງພະບາງ, ທ່ານ ຈ່າງ ເຊີ້ຜີງ ຫົວໜ້າກົງສູນຈີນປະຈໍາພາກເໜືອລາວ ພ້ອມດ້ວຍບັນດາແຂກລາວ-ຈີນເຂົ້າຮ່ວມ.
ພາຍຫຼັງສຳເລັດການຊົມຮູບເງົາ, ທ່ານຄໍາໄຫຼ ສີປະເສີດໄດ້ໃຫ້ສຳພາດວ່າ: ໂຄງການນີ້ໄດ້ເຊື່ອມສານວັດທະນະທຳຈີນໃຫ້ຄົນລາວ, ໃຫ້ໂອກາດນັກວິຊາການພາກຮູບເງົາຂອງຄົນລາວມີຄວາມຮູ້ວິຊາການຢ່າງເຂັ້ມແຂງ ແລະເປັນນັກພາກຮູບເງົາມືອາຊີບ, ຂ້າພະເຈົ້າຮູ້ສຶກພາກພູມໃຈທີ່ຊາວໜຸ່ມລາວກໍສາມາດພາກສຽງໄດ້ໃນລະດັບດີທຽບເທົ່າສາກົນ. ໃນອະນາຄົດຖ້າມີໂຄງການຮ່ວມມືໃນການສ້າງຮູບເງົາ ຫຼືວ່ານຳເອົາຮູບເງົາທີ່ມີລັກສະນະປຸກລະດົມນ້ຳໃຈຮັກຊາດ,ນ້ຳໃຈບຸກບືນສູ້ຊົນຜ່ານຜ່າຄວາມຫຍຸ້ງຍາກແມ່ນຍັງມີຄວາມຕ້ອງການໃຫ້ນຳມາເຜີຍແຜ່ເພື່ອປຸກລະດົມນ້ຳໃຈຮັກຊາດຂອງຊາວໜຸ່ມລາວເພື່ອພັດທະນາແລະສ້າງສາປະເທດຊາດອັນແສນຮັກຂອງພວກເຮົາ ຄຽງຄູ່ກັບການພັດທະນາຕົນເອງ ແລະຄອບຄົວ. ພ້ອມດຽວກັນ, ກໍຖືເປັນການແລກປ່ຽນວັດທະນະທຳລະຫວ່າງສອງຊາດລາວ-ຈີນໃຫ້ນັບມື້ເລິກເຊິ່ງກວ່າເກົ່າ.
ທ່ານ ບຸນເຫຼືອ ສີນໄຊວໍລະວົງກໍໄດ້ຕີລາຄາສູງຕໍ່ໂຄງການນີ້ວ່າ: ເທດສະການຮູບເງົາດີເດັ່ນລາວ-ຈີນແມ່ນຮູບການບັນເທີງໜຶ່ງທີ່ມີຄວາມຮູ້ແລະເປັນກຳລັງໃຈໃຫ້ຊາວໜຸ່ມຢູ່ເຂດຫ່າງໄກສອກຫຼີກທີ່ບໍ່ມີໂອກາດເຂົ້າເຖິງຮູບເງົາທີ່ດີ ໂຄງການດັ່ງກ່າວຖືວ່າໄດ້ເປີດໂອກາດໃຫ້ແກ່ຄົນລາວໄດ້ຊົມຮູບເງົາທີ່ມີຮູບແບບໃໝ່ ແລະໜ້າຕື່ນເຕັ້ນ. ພ້ອມດຽວກັນນັ້ນ,ການຮັບຊົມຮູບເງົາຄັ້ງນີ້ແມ່ນມີຄວາມເພີດເພີນ ເພາະການພາກສຽງແມ່ນເຮັດໄດ້ດີ, ເຂົ້າໃຈງ່າຍ ແລະເປັນທຳມະຊາດຫຼາຍ. ເທດສະການຮູບເງົາດີເດັ່ນລາວ-ຈີນໃນປີນີ້ໄດ້ກ້າວເຂົ້າສູ່ປີທີ 8 ແລ້ວ, ທີມສາຍໄດ້ເດີນທາງໄປຮອດໄປເຖິງປະຊາຊົນໃນເຂດຫ່າງໄກສອກຫຼີກຢູ່ທົ່ວປະເທດລາວ ເພື່ອປະກອບສ່ວນສົ່ງເສີມວັດທະນະທຳທີ່ດີເດັ່ນລາວ-ຈີນ ພ້ອມທັງມອບຮອຍຍິ້ມ ແລະສຽງຫົວໃຫ້ກັບປະຊາຊົນທ້ອງຖິ່ນ, ສ້າງຄວາມເບີກບານມ່ວນຊື່ນທາງດ້ານຈິດໃຈຫຼາຍຂຶ້ນກວ່າເກົ່າ.
ທ່ານ ຈ່າງ ເຊີ້ຜີງ ກໍໄດ້ໃຫ້ຄຳເຫັນວ່າ: ຮູບເງົາເປັນຮູບແບບສິລະປະທີ່ຂ້າມຊາຍແດນແລະພາສາໄດ້ຊຸກຍູ້ສົ່ງເສີມການແລກປ່ຽນວັດທະນະທຳອາລິຍະທຳລະຫວ່າງຈີນ-ລາວ ແລະເຊື່ອມສານຈິດໃຈຂອງປະຊາຊົນສອງຊາດ, ຫວັງວ່າເທດສະການຮູບເງົາດີເດັ່ນຈີນ-ລາວຈະສາມາດຊຸກຍູ້ການຮ່ວມມືດ້ານວັດທະນະທຳໃຫ້ກວ້າງຂວາງກວ່າເກົ່າ ແລະປະກອບສ່ວນເຂົ້າໃນການສ້າງຄູ່ຮ່ວມຊາຕາກຳຈີນ-ລາວ.ເທດສະການເດີນສາຍຮູບເງົາດີເດັ່ນລາວຈີນປີ 2024 ຍັງຈະສືບຕໍ່ເດີນສາຍຢູ່ແຂວງຫຼວງພະບາງ, ອຸດົມໄຊ, ຜົ້ງສາລີ, ຫຼວງນໍ້າທາແລະແຂວງຫົວພັນພາຍໃນເດືອນພະຈິກນີ້.
(ຂ່າວ-ພາບ: ສຸວັນລີ)
ຄໍາເຫັນ