 |
ກອງປະຊຸມຄັ້ງນີ້, ໄດ້ນໍາເອົາເອກະສານສຳຄັນຂອງພັກ 4 ສະບັບ ເພື່ອເຜີຍແຜ່ໃຫ້ຜູ້ເຂົ້າຮ່ວມໄດ້ເຊື່ອມຊຶມກຳແໜ້ນຄື: ມະຕິກອງປະຊຸມໃຫຍ່ ຄັ້ງທີ XII ຂອງພັກ, ລາຍງານການເມືອງຕໍ່ກອງປະຊຸມໃຫຍ່ຄັ້ງທີ XII ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ X (2026-2030), ບົດຄວາມເຫັນຊີ້ນໍາຂອງເລຂາທິການໃຫຍ່ ປະທານປະເທດ ກ່ຽວກັບການຈັດຕັ້ງເຊື່ອມຊຶມ ແລະ ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XII ຂອງພັກ. ຫຼັງຈາກນັ້ນ, ໄດ້ມີການແບ່ງກຸ່ມເປັນ 7 ກຸ່ມ ຕາມສາຍເພື່ອຄົ້ນຄວ້າວຽກງານວິຊາສະເພາະຕິດພັນກັບເນື້ອໃນເອກະສານທີ່ໄດ້ຮັບການເຜີຍແຜ່-ເຊື່ອມຊຶມ ໂດຍລົງເລິກວຽກງານວິຊາສະເພາະຂອງຂະແໜງທະນາ ຄານ ເພື່ອໃຫ້ມີຄວາມເຂົ້້າໃຈທີ່ເປັນເອກະພາບ, ເລິກເຊິ່ງ. ຈາກນັ້ນ, ຕາງໜ້າແຕ່ລະກຸ່ມໄດ້ຂຶ້ນລາຍງານຜົນຂອງການຄົ້ນຄວ້າ ໂດຍສະເພາະແມ່ນທິດທາງ - ເເຜນການໃນການຜັນຂະຫຍາຍແຕ່ລະວຽກເຂົ້້າສູ່ຂອດຈັດຕັ້ງປະຕິບັດ ໃຫ້ເປັນຮູບປະທໍາ ແລະ ມີປະສິດທິພາບສູງ.
ກອງປະຊຸມໃນຄັ້ງນີ້, ຍັງໄດ້ມີພິທີປະດັບຫຼຽນກາລະນຶກວັນສະຖາປະນາ ສປປ ລາວ ຄົບຮອບ 50 ປີ ໃຫ້ພະນັກງານຂະເເໜງທະນາຄານທີ່ໄດ້ປະກອບສ່ວນໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃນໄລຍະຜ່ານມາ ຊຶ່ງເປົ້າໝາຍທີ່ໄດ້ຮັບຫຼຽນດັ່ງກ່າວມີຈຳນວນທັງໝົດ 1,131 ຄົນ. ໃນນີ້, ເປັນພະນັກງານປະຈຳການ 946 ຄົນ ແລະ ພະນັກງານບຳນານ 185 ຄົນ.
 |
ໂອກາດນີ້, ສະຫາຍ ນາງ ບຸນຄຳ ວໍລະຈິດ ຍັງໄດ້ໃຫ້ກຽດມີຄຳເຫັນຊີ້ນຳຕໍ່ກອງປະຊຸມ ເພື່ອເປັນເຂັມຊີ້ທິດເຍືອງທາງໃນການເຄື່ອນໄຫວວຽກງານຂອງຂະເເໜງທະນາຄານໃນຕໍ່ໜ້າ ເພື່ອເຮັດໃຫ້ ຄພ.ທຫລ ສາມາດສືບຕໍ່ນໍາພາ-ຊີ້ນໍາການຜັນຂະຫຍາຍມະຕິກອງປະຊຸມໃຫຍ່ຄັ້ງທີ XII ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ X ກໍຄືມະຕິກອງປະຊຸມໃຫຍ່ຄັ້ງທີ V ຂອງອົງ ຄພ.ທຫລ ໃຫ້ບັນລຸຜົນສໍາເລັດຕາມແຜນການທີ່ວາງໄວ້ຢ່າງຈົບງາມ.
(ຂ່າວ: ວັນເພັງ, ຂໍ້ມູນ+ພາບ: ຫ້ອງການ ທຫລ)
ຄໍາເຫັນ