ທູດລາວເຂົ້າຮ່ວມພິທີລະນຶກວັນສິ້ນພະຊົນ ເຈົ້າຍິງໂຍ່ຍຮວາ ຣາຊະທິດາລາວ ທີ່ແຂວງນິງບິ່ງ

ຕາມການບອກເລົ່າຂອງຊາວບ້ານ ທີ່ສືບທອດກັນມາຈາກຮຸ່ນຕໍ່ຮຸ່ນຈົນເຖິງປັດຈຸບັນວ່າ: ເຈົ້າຍິງ ໂຍ່ຍຮວາ ເປັນຣາຊະທິດາຂອງລາວ ຊຶ່ງຫຼາຍຮ້ອຍປີຜ່ານມາ ໄດ້ຮັບການແຕ່ງຕັ້ງພ້ອມດ້ວຍຊ້າງຈຳ ນວນຫຼາຍຮ້ອຍໂຕ ໄປປະເທດມະຫາຫວຽດ (Đại Việt) ເພື່ອຝຶກແອບຊ້າງໃຫ້ແກ່ເຈົ້າຊີວິດ ເລ ແທງ ຕົງ ເພື່ອຕ້ານສັດຕູຮຸກຮານຈາກພາຍນອກ. ຫຼັງຈາກຝຶກແອບ ແລະ ມອບຊ້າງໃຫ້ ມະຫາຫວຽດ ແລ້ວ, ພະອົງໄດ້ເດີນທາງກັບຄືນປະເທດ ແຕ່ໂຊກບໍ່ດີໃນເວລາເດີນທາງກັບປະເທດ ພະອົງໄດ້ເຈັບປ່ວຍໜັກ ແລະ ໄດ້ສິ້ນພະຊົນຢູ່ເຂດດິນແດນພູເດັ່ນ ບ້ານຖາຍເຊີນໃນປັດຈຸບັນ, ພາຍຫຼັງພະອົງໄດ້ສິ້ນພະຊົນ, ເຈົ້າຊີວິດ ເລ ແຖງ ຕົງ ໄດ້ສັ່ງໃຫ້ເຈົ້າຖິ່ນ ແລະ ບ່າວໄພ່ ສົ່ງສະການ ແລະ ສ້າງຫໍບູຊາພະອົງຂຶ້ນຢູ່ທີ່ນັ້ນ ແລະ ສົ່ງຂ່າວໃຫ້ເຈົ້າຊີວິດລາວໄດ້ຊົງຊາບ, ເຈົ້າຊີວິດລາວ ກໍໄດ້ສັ່ງໃຫ້ແກະສະຫຼັກຮູບພະອົງໃສ່ໄມ້ແຜ່ນໜຶ່ງ ແລະ ສົ່ງໄປບ່ອນທີ່ພະອົງສິ້ນພະຊົນ ເພື່ອຈັດພິທີໄວ້ອາໄລ ແລະ ເປັນທີ່ລະນຶກແຫ່ງຄວາມຊົງຈຳເຖິງດວງວິນຍານພະອົງ ຊຶ່ງກາຍເປັນສັນຍາລັກຂອງຄວາມສາມັກຄີລະຫວ່າງສອງປະເທດ ລາວ-ຫວຽດນາມ ທີ່ມີມາແຕ່ດຶກດຳບັນ. ໃນແຕ່ລະປີ, ພໍຮອດມື້ 3 ຄ່ຳເດືອນ 3 ປະຊາຊົນຫວຽດນາມ ທັງຢູ່ທ້ອງຖິ່ນນີ້ ແລະ ເຂດໃກ້ຄຽງ ໄດ້ຈັດໃຫ້ມີພິທີລະນຶກວັນສິ້ນພະຊົນ ຊຶ່ງໄດ້ກາຍເປັນບຸນປະເພນີສືບທອດກັນມາຈົນເຖິງປັດຈຸບັນ.

ຜ່ານມາ, ກະຊວງວັດທະນະທຳ ແລະ ການທ່ອງທ່ຽວຂອງລາວ ກໍໄດ້ຈັດສົ່ງຄະນະນັກຊ່ຽວຊານ, ນັກຄົ້ນຄວ້າປະຫວັດສາດຂອງລາວ ໄປຄົ້ນຄວ້າສຳຫຼວດສະຖານທີ່ແຫ່ງນີ້ ແລະ ມີການຈັດກອງປະຊຸມເພື່ອລະດົມຄວາມຄິດຄວາມເຫັນທາງປະຫວັດສາດ ຊຶ່ງບັນດານັກຄົ້ນຄວ້າໄດ້ມີຫຼາຍຂໍ້ມູນທາງປະຫວັດ ສາດຢືນຢັນວ່າ: ເຈົ້າຍິງ ໂຍ່ຍຮວາ ແມ່ນບຸກຄົນທາງປະຫວັດສາດ ທີ່ມີຕົວຕົນແທ້ຈິງ. ແຕ່ອີງໃສ່ວັນເວລາຜ່ານໄປຫຼາຍຮ້ອຍປີ ແລະ ຮ່ອງຮອຍເອກະສານສຳຄັນຂອງຊາດລາວ ກໍຖືກທຳລາຍຈາກສັກດີນາ ແລະ ຈັກກະພັດພາຍນອກຫຼາຍຄັ້ງ ຈຶ່ງເຮັດໃຫ້ການຄົ້ນຄວ້າຈະຕ້ອງໄດ້ສືບຕໍ່ ເພື່ອສາມາດຢັ້ງຢືນວ່າ ເຈົ້າຍິງ ໂຍ່ຍຮວາ ແມ່ນລູກສາວຂອງພະອົງໃດ ທີ່ສອດຄ່ອງກັບຍຸກສະໄໝເຈົ້າຊີວິດ ເລ ແທງ ຕົງ ຂອງຫວຽດນາມ.

ຫໍໄຫວ້ເຈົ້າຍິງ ໂຍ່ຍຮວາ ຣາຊະທິດາລາວ ໄດ້ເປັນມໍລະດົກທາງວັດທະນະທຳ, ປະຫວັດສາດຂອງແຂວງນິງບິ່ງ ແລະ ປັດຈຸບັນ, ແຂວງນິງບິ່ງ ກຳລັງສະເໜີສະຖານທີ່ສັກສິດແຫ່ງນີ້ ໃຫ້ເປັນມໍລະດົກລະດັບຊາດຂອງ ສສ ຫວຽດນາມ; ໃນໂອກາດມີຄຳເຫັນຕໍ່ພິທີ, ທ່ານ ຄຳເພົາ ເອີນທະວັນ ໄດ້ກ່າວວ່າ: ຝ່າຍລາວເຫັນດີສະໜັບສະໜູນຕໍ່ການສະເໜີຂອງແຂວງນິງບິ່ງ ທີ່ສະເໜີໃຫ້ ຫໍໄຫວ້ ເຈົ້າຍິງ ໂຍ່ຍຮວາ ຣາຊະທິດາລາວ ເປັນມໍລະດົກລະດັບຊາດ ແລະ ເປັນສວນສາທາລະນະວັດທະນະທຳ-ທ່ອງທ່ຽວ ຫວຽດນາມ-ລາວ ຊຶ່ງຈະເປັນສະຖານທີ່ແຫ່ງສັນຍາລັກມູນເຊື້ອການຊ່ວຍເຫຼືອຊຶ່ງກັນ ແລະ ກັນ ທີ່ຈະດຶງດູດນັກທ່ອງທ່ຽວພາຍໃນ, ພາຍນອກ ມາແຂວງນິງບິ່ງ ໃຫ້ຫຼາຍຂຶ້ນ ແລະ ທັງເປັນການປະກອບສ່ວນສຳຄັນເຂົ້າໃນການເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ, ການຮ່ວມມືຮອບດ້ານ ແລະ ຫຸ້ນສ່ວນຍຸດທະສາດ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ ໃຫ້ໝັ້ນຄົງຂະໜົງແກ່ນຊົ່ວກາລະນານ.

(ແຫຼ່ງຂ່າວ: ຂປລ)