 |
ທ່ານ ນາງ ສຸກິດຕາ ສີສຸລາດ ຜູ້ກໍ່ຕັ້ງກຸ່ມຫັດຖະກໍາຂອງບຸກຄົນທີ່ມີຄວາມພິການ ແຂວງຫຼວງພະບາງ ໄດ້ນໍາສະເໜີຄວາມສໍາເລັດຂອງກຸ່ມ ໂດຍໄດ້ຜະລິດເຄື່ອງຫັດຖະກຳ ພ້ອມທັງສ້າງໂອກາດການຈ້າງງານແບບຍືນຍົງໃຫ້ແກ່ແມ່ຍິງ ບຸກຄົນທີ່ມີຄວາມພິການ, ປັດຈຸບັນ ໃນກຸ່ມມີສະມາຊິກ 15 ຄົນ ໃນນັ້ນ, ມີບຸກຄົນທີ່ມີຄວາມພິການ 5 ຄົນ ແລະ ແມ່ຍິງ 10 ຄົນ, ຜະລິດເຄື່ອງຫັດຖະກຳ ແລະ ສິນຄ້າທີ່ເປັນເອກະລັກຂອງຊາວຫຼວງພະບາງ ຈໍາໜ່າຍຜະລິດຕະພັນທັງພາຍໃນ ແລະ ຕ່າງປະເທດ,ໂດຍສະເພາະສົ່ງໄປຍີ່ປຸ່ນ, ສະຫະລັດອາເມຣິກາ, ຈີນ, ຫວຽດນາມ ແລະ ໄທ.
ຜົນສໍາເລັດຂອງກຸ່ມຜະລິດດັ່ງກ່າວນີ້ ເກີດຈາກການສະໜັບສະໜູນ ຂອງອົດສະຕຣາລີ ຜ່ານອົງການ RT4D, ລວມມີການຝຶກອົບຮົມ ດ້ານການຕະຫຼາດດີຈິຕອນ ແລະ ການຄ້າອອນລາຍ, ການພັດທະນາເຄື່ອງໝາຍການຄ້າ ແລະ ຫຼ້າສຸດ ແມ່ນການເຂົ້າຮ່ວມ ໂຄງການພັດທະນາ ໂອດັອບ ທີ່ໄດ້ຊ່ວຍຍົກລະດັບຄຸນນະພາບຜະລິດຕະພັນ, ເສີມສ້າງເອກະລັກຂອງສິນຄ້າ ແລະ ການບໍລິຫານທຸລະກິດ ພ້ອມທັງຂະຫຍາຍໂອກາດໃນການເຂົ້າເຖິງຕະຫຼາດລະດັບພາກພື້ນ ແລະສາກົນ.
ໂອກາດນີ້, ທ່ານ ນາງ ເມແກນ ຈອນສ ໄດ້ກ່າວວ່າ: ຂໍ້ລິເລີ່ມນີ້ ເປັນຕົວຢ່າງທີ່ດີ ສະທ້ອນໃຫ້ເຫັນວ່າ ວິສາຫະກິດທີ່ມີຮາກຖານຈາກຊຸມຊົນ ສາມາດກາຍເປັນພະລັງສໍາຄັນ ໃນການຂັບເຄື່ອນການພັດທະນາເສດຖະກິດຂອງທ້ອງຖິ່ນ ໄປຄຽງຄູ່ກັບການສົ່ງເສີມ ການມີສ່ວນຮ່ວມຂອງທຸກຄົນໃນສັງຄົມ ແລະ ການເສີມສ້າງພະລັງໃຫ້ປະຊາຊົນ.
ຄໍາເຫັນ