ທູດປະເທດມຽນມາ ມອບພະໄຕປິດົກ ແລະຄຳພີອັດຖະກະຖາໃຫ້ແກ່ ແຂວງຫຼວງພະບາງ

ທ່ານ ອູ ອອງ ໂກ ມີຄຳເຫັນວ່າ: ການມອບພະໄຕປິດົກ ແລະອັດຖະກະຖາໃຫ້ແກ່ສູນຂໍ້ມູນ ພະພຸດທະສາສະໜາຫຼວງພະບາງ ເປັນອີກກ້າວໜຶ່ງຂອງຄວາມຮ່ວມມືອັນດີລະຫວ່າງມຽນມາ ແລະແຂວງຫຼວງພະບາງ, ຫວັງວ່າ ຈະໄດ້ຮ່ວມກັນດຳເນີນໂຄງການຄວາມຮ່ວມມືຄັ້ງທີສາມ ໃນດ້ານວັນນະຄະດີ ແລະສາສະໜາ ຄື ການແປ ແລະຈັດພິມບັນທຶກການເດີນທາງຂອງຄະນະສົງຫຼວງພະບາງ ທີ່ໄດ້ເດີນທາງໄປປະເທດມຽນມາໃນປີ 1956 ເປັນພາສາມຽນມາ ແລະພາສາລາວ, ຊຶ່ງຂໍ້ລິເລີ່ມເຫຼົ່ານີ້ ຈະຊ່ວຍເສີມສ້າງສາຍສຳພັນອັນແໜ້ນແຟ້ນລະຫວ່າງຄະນະສົງຂອງມຽນມາ ແລະລາວ ສົ່ງເສີມການແລກປ່ຽນຄວາມຮູ້ດ້ານພຣະທຳ ແລະພຸດທະສຶກສາ ພ້ອມທັງສົ່ງເສີມຄວາມເຂົ້າໃຈດ້ານວັດທະນະທຳ ແລະຄວາມສຳພັນລະຫວ່າງປະຊາຊົນຂອງສອງປະເທດ ເພື່ອສືບສານມິດຕະພາບອັນດີງາມໃຫ້ຍືນຍົງຕໍ່ໄປ. ຈາກນັ້ນ ພະອາຈານໃຫຍ່ ບົວວັນ ປຸນຍະສາໂຣ ໄດ້ມີຄຳເຫັນກ່າວຮັບວ່າ: ຕະຫຼອດໄລຍະເວລາອັນຍາວນານ ຄະນະສົງລາວ ແລະຄະນະສົງມຽນມາ ໄດ້ຮັກສາສາຍສຳພັນອັນແໜ້ນແຟ້ນ ບົນພື້ນຖານ ຂອງພຣະພຸດທະສາສະໜາ ເຖຣະວາດ ທີ່ເປັນມໍລະດົກຮ່ວມຂອງປະຊາຊົນທັງສອງປະເທດ, ກາຍເປັນມິດຕະພາບ, ຄວາມເອື້ອເຟື້ອເຜື່ອແຜ່, ການເຄົາລົບເຊິ່ງກັນ ແລະກັນ, ຮ່ວມມືທຳນຸບຳລຸງພຣະພຸດທະສາສະໜາໃຫ້ຈະເລີນຮຸ່ງເຮືອງ. ພະໄຕຣປິດົກ ແລະຄໍາພີອັດຖະກະຖາ ທີ່ໄດ້ຮັບມອບໃນມື້ນີ້ ບໍ່ພຽງແຕ່ເປັນຄັງປັນຍາອັນລ້ຳຄ່າຂອງພຣະພຸດທະສາສະໜາ ຍັງເປັນສັນຍາລັກແຫ່ງສັດທາ ແລະຄວາມຮ່ວມມືອັນດີລະຫວ່າງຄະນະສົງຂອງສອງປະເທດ. ພ້ອມນີ້ ພະອາຈານໃຫຍ່ ໄດ້ຕາງໜ້າຄະນະສົງຫຼວງພະບາງສະແດງຄວາມຂອບໃຈ ແລະສຳນຶກໃນບຸນຄຸນຢ່າງສູງຕໍ່ ລັດຖະບານ ສາທາລະນະລັດສະຫະພາບມຽນມາ, ກະຊວງການຕ່າງປະເທດ, ສະຖານເອກອັກຄະລັດຖະທູດມຽນມາ ປະຈໍາ ສປປ ລາວ, ທ່ານທູດ ແລະທຸກພາກສ່ວນທີ່ໄດ້ສະໜັບສະໜູນພິທີໃນຄັ້ງນີ້.ຂ່າວ-ພາບ: ອພສ ແຂວງ