ວາງສະແດງຮູບພາບ ແລະ ປາຖະກະຖາ ວັນສ້າງຕັ້ງສາຍພົວພັນການທູດ ລາວ-ຈີນ

ໃນພິທີ, ສະຫາຍ ຄຳພັນ ເຜີຍຍະວົງ ແລະ ສະຫາຍ ນາງ ຟາງ ຫົງ ໄດ້ໃຫ້ກຽດຕັດແຖບຜ້າ ເປີດງານວາງສະແດງຮູບພາບຢ່າງເປັນທາງການ, ຮູບພາບທີ່ນຳມາວາງສະແດງຄັ້ງນີ້: ໄດ້ແບ່ງອອກເປັນ 3 ພາກ, ປະກອບມີ 75 ຮູບພາບ ຊຶ່ງແຕ່ລະຮູບພາບ ແມ່ນເພື່ອຫວນຄືນມູນເຊື້ອຄວາມສາມັກຄີທີ່ເຕັມໄປດ້ວຍຄວາມຜູກພັນ, ໄມຕີຈິດມິດຕະພາບ ແລະ ມີຊີວິດຊີວາ ຕະຫຼອດໄລຍະ 65 ປີ ຜ່ານມາ ແລະ ພ້ອມຈັບມືກັນກ້າວເດີນໄປສູ່ອະນາຄົດທີ່ສົດໃສ, ຈາກນັ້ນ, ບັນດາຜູ້ແທນໄດ້ເຂົ້າຮ່ວມຮັບຟັງການປາຖະ ກະຖາ ສະເຫຼີມສະຫຼອງວັນສ້າງຕັ້ງສາຍພົວພັນການທູດ ລາວ-ຈີນ ຄົບຮອບ 65 ປີ ແລະ ປີມິດຕະພາບລາວ-ຈີນ.

ໃນການປາຖະກະຖາຄັ້ງນີ້ ສະຫາຍ ນາງ ຟາງ ຫົງ ໄດ້ທົບທວນຄືນເສັ້ນທາງ 65 ປີຜ່ານມາສາຍພົວພັນຈີນ-ລາວ, ໄດ້ຜ່ານຜ່າການຜັນແປຂອງສະພາບການສາກົນ, ແຕ່ອຸດົມການເບື້ອງຕົ້ນຍັງບໍ່ປ່ຽນ ແປງ, ໄດ້ຜ່ານຜ່າການທົດສອບຈາກຄວາມສ່ຽງຕ່າງໆແຕ່ຍັງຄົງໜັກແໜ້ນດັ່ງຫີນຜາ, ສາມາດສ້າງເສັ້ນ ທາງແຫ່ງການຊ່ວຍເຫຼືອຊຶ່ງກັນ ແລະ ກັນຢ່າງຈິງໃຈ ແລະ ການຢູ່ຮ່ວມກັນຢ່າງສັນຕິຂອງປະເທດບ້ານໃກ້ເຮືອນຄຽງທີ່ຕ່າງຝ່າຍຕ່າງມີຜົນປະໂຫຍດ, ສ້າງເສັ້ນທາງແຫ່ງການຮຽນຮູ້ຊຶ່ງກັນ ແລະ ກັນ ແລະ ກ້າວໄປຂ້າງໜ້າຮ່ວມກັນຂອງປະເທດສັງຄົມນິຍົມ ແລະ ເປັນເສັ້ນທາງຕົວແບບແຫ່ງການຮ່ວມມືຊ່ວຍເຫຼືອແລະ ຮ່ວມກັນພັດທະນາຂອງປະເທດພວມພັດທະນາ, ສາເຫດຕົ້ນຕໍທີ່ເຮັດໃຫ້ສາຍພົວພັນຈີນ-ລາວສາມາດກ້າວຂຶ້ນສູ່ລະດັບໃໝ່ ແລະ ບັນລຸການບຸກທະລຸໃໝ່ໃນທ່າມກາງການຜັນແປຂອງສະພາບການໃນ 65 ປີຜ່ານມາ ກໍຄືການນໍາແຕ່ລະຮຸ່ນຂອງສອງພັກ, ສອງລັດຍາມໃດກໍມີວິໄສທັດກວ້າງໄກ, ຊີ້ນໍາ ແລະ ນໍາພາທາງຍຸດທະສາດດ້ວຍຕົນເອງ. ໂດຍສະເພາະໃນຊຸມປີມໍ່ໆມານີ້, ທ່ານເລຂາທິການໃຫຍ່ ສີ ຈິ້ນຜິງ ໄດ້ບັນລຸຄວາມເຫັນດີເປັນເອກະພາບທາງຍຸດທະສາດກັບການນໍາສູງສຸດຂອງລາວໃນການສ້າງຄູ່ຮ່ວມຊາຕາກຳ ຈີນ-ລາວ ແລະ ໃນປີ 2019 ແລະ 2023 ກໍໄດ້ຮ່ວມກັບສະຫາຍເລຂາທິການໃຫຍ່ ບຸນຍັງ ວໍລະຈິດ ແລະ ສະຫາຍເລຂາທິການໃຫຍ່ ທອງລຸນ ສີສຸລິດ ລົງນາມໃນແຜນປະຕິບັດງານສ້າງຄູ່ຮ່ວມຊາຕາກຳຈີນ-ລາວດ້ວຍຕົນເອງທັງສອງສະບັບ ຊຶ່ງໄດ້ກາຍເປັນທິດທາງລວມ ແລະ ແຜນຜັງໃໝ່ໃຫ້ແກ່ການຮ່ວມມືຮອບດ້ານລະຫວ່າງສອງປະເທດ, ຊຸກຍູ້ສາຍພົວພັນສອງຝ່າຍໃຫ້ກ້າວເຂົ້າສູ່ຍຸກສະໄໝໃໝ່ດ້ວຍຄວາມໄວສູງ. ໃນວັນທີ 21 ເມສາ ທີ່ຜ່ານມານີ້, ທ່ານ ສີ ຈິ້ນຜິງ ເລຂາທິການໃຫຍ່ ປະທານປະເທດຈີນ ໄດ້ພົບປະກັບສະຫາຍ ສະເຫຼີມໄຊ ກົມມະສິດ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີຜູ້ປະຈໍາການ ທີ່ເດີນທາງໄປຢ້ຽມຢາມຈີນໃນນາມທູດພິເສດຂອງສະຫາຍເລຂາທິການໃຫຍ່ ປະທານປະເທດທອງລຸນ ສີສຸລິດ ຢູ່ທີ່ປັກກິ່ງ. ໃນການພົບປະນັ້ນ, ທ່ານ ສີ ຈິ້ນຜິງ ໄດ້ຢືນຢັນຄືນວ່າ: ໃນຈຸດເລີ່ມຕົ້ນໃໝ່ຂອງປະຫວັດສາດ, ສອງຝ່າຍຈີນ-ລາວ ຕ້ອງສືບຕໍ່ຢຶດໝັ້ນທິດທາງ "16 ໂຕອັກສອນ" ແລະ ຈິດໃຈ "4 ດີ", ໂດຍຢືນຢູ່ບົນລະດັບຍຸດທະສາດທີ່ຕິດພັນກັບຊາຕາກຳຂອງສັງຄົມນິຍົມ, ເພີ່ມທະວີການປະສານງານຢ່າງໃກ້ຊິດ, ລົງເລິກການເຊື່ອມຈອດທາງຍຸດທະສາດ, ຂະຫຍາຍການຮ່ວມມືຕົວຈິງ, ຮ່ວມກັນຮັບມືກັບສິ່ງທ້າທາຍ, ແລະ ເອົາໃຈໃສ່ຈັດຕັ້ງປະຕິບັດແຜນປະຕິບັດງານ 5 ປີສະບັບໃໝ່ໃນການສ້າງຄູ່ຮ່ວມຊາຕາ ກຳຈີນ-ລາວ ໃຫ້ປະກົດຜົນເປັນຈິງ, ເພື່ອຊຸກຍູ້ການສ້າງຄູ່ຮ່ວມຊາຕາກຳຈີນ-ລາວໃຫ້ກ້າວໄປສູ່ເປົ້າໝາຍມາດຕະຖານສູງ, ຄຸນນະພາບສູງ ແລະ ລະດັບສູງຢ່າງໝັ້ນຄົງ.

ສະຫາຍ ຄຳພັນ ເຜີຍຍະວົງ ກ່າວຄຳເຫັນວ່າ: ສອງປະເທດ ລາວ-ຈີນ ເປັນປະເທດບ້ານໃກ້ເຮືອນຄຽງທີ່ມີສາຍພູ, ສາຍນ້ຳຕິດຈອດກັນ, ມີລະບອບການເມືອງ ແລະ ທິດທາງການພັດທະນາປະເທດຊາດ ທີ່ຄ້າຍຄືກັນ, ປະຊາຊົນສອງຊາດ ມີມູນເຊື້ອການພົວພັນໄປມາຫາສູ່ກັນມາແຕ່ບູຮານນະການ. ພັກປະຊາຊົນປະຕິວັດລາວ ແລະ ພັກກອມມູນິດຈີນ ມີການພົວພັນນຳກັນ ແຕ່ປີ 1959, ຫຼັງຈາກນັ້ນ 2 ປີ ສອງປະເທດ ໄດ້ສ້າງຕັ້ງສາຍພົວພັນການທູດນໍາກັນ ໃນວັນທີ 25 ເມສາ 1961. ປະທານ ເໝົາ ເຈີຕົງ, ປະທານ ໄກສອນ ພົມວິຫານ ແລະ ບັນດາຜູ້ນໍາຮຸ່ນຕ່າງໆ ລ້ວນແຕ່ໄດ້ນໍາພາເພີ່ມພູນຄູນສ້າງສາຍພົວພັນຮ່ວມມື ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ ໃຫ້ໄດ້ຮັບການຂະຫຍາຍຕົວເປັນກ້າວໆມາ, ໃນປີເລີ່ມຕົ້ນຂອງສັດຕະວັດທີ 21 (ປີ 2000), ສອງປະເທດໄດ້ລົງນາມ ໃນການຖະແຫຼງການຮ່ວມ ກ່ຽວກັບການເພີ່ມທະວີພາຄີ ລະຫວ່າງ ສອງປະເທດ ໂດຍໄດ້ກຳນົດໃຫ້ການພົວພັນສອງປະເທດ ທີ່ຂຽນເປັນໂຕໜັງສືຈີນ 16 ໂຕ ກໍຄື “ການພົວພັນຮ່ວມມືຮອບດ້ານທີ່ໝັ້ນຄົງຍາວນານ, ມີໄມຕີຈິດຖານບ້ານໃກ້ເຮືອນຄຽງ ແລະ ໄວ້ເນື້ອເຊື່ອໃຈຊຶ່ງກັນ ແລະ ກັນ”. ນັບແຕ່ນັ້ນມາ, ການພົວພັນຮ່ວມມື ລະຫວ່າງ ສອງພັກ, ສອງລັດຖະບານ ແລະ ປະຊາຊົນສອງຊາດ ລາວ-ຈີນ ກໍນັບມື້ນັບໄດ້ຮັບການເສີມຂະຫຍາຍໃຫ້ແຕກດອກອອກຜົນເລື້ອຍໆມາ, ການນໍາຂັ້ນສູງຂອງສອງຝ່າຍ ໄດ້ມີການໄປມາຫາສູ່ ພົບປະແລກປ່ຽນຄໍາຄິດຄໍາເຫັນນໍາກັນເປັນປະຈໍາທຸກປີ, ຕໍ່ມາໃນປີ 2006, ສອງປະເທດກໍໄດ້ຍົກລະດັບການພົວພັນຂຶ້ນເປັນ “ຄູ່ຮ່ວມຍຸດທະສາດຮອບດ້ານ” ແລະ 2009 ຍົກລະດັບຂຶ້ນເປັນ “ຄູ່ຮ່ວມຍຸດທະສາດຮອບດ້ານ ໝັ້ນຄົງ ຍາວນານ ຕາມທິດ 4 ດີ” (ຄື: ບ້ານໃກ້ເຮືອນຄຽງທີ່ດີ, ເພື່ອນມິດທີ່ດີ, ສະຫາຍທີ່ດີ ແລະ ຄູ່ຮ່ວມມືທີ່ດີ) ຊຶ່ງເປັນການຢັ້ງຢືນໃຫ້ເຫັນເຖິງການຂະຫຍາຍຕົວຢ່າງບໍ່ຢຸດຢັ້ງຂອງມິດຕະພາບ ແລະ ການພົວພັນຮ່ວມມື ລາວ-ຈີນ. ຫຼັງຈາກນັ້ນ ການພົວພັນຮ່ວມມື ລະຫວ່າງ ສອງພັກ, ສອງລັດ ລາວ-ຈີນ ກໍຍິ່ງສືບຕໍ່ມີບາດກ້າວໃໝ່. ມາຮອດປັດຈຸບັນ, ໂດຍພາຍໃຕ້ຄວາມເອົາໃຈໃສ່ຂອງ ສອງພັກ ແລະ ການນຳຂອງສອງປະເທດ ການພົວພັນຮ່ວມມື ລະຫວ່າງ ລາວ-ຈີນ ກໍຄື ການສ້າງຄູ່ຮ່ວມຊາຕາກຳລາວ-ຈີນ ໄດ້ສືບຕໍ່ເກີດດອກອອກຜົນຢ່າງບໍ່ຢຸດຢັ້ງ; ການຮ່ວມມືທາງດ້ານການເມືອງ ແລະ ຄວາມໝັ້ນຄົງ ລະຫວ່າງ ສອງຝ່າຍ ແມ່ນມີການຮ່ວມມືກັນຫຼາຍ ແລະ ດີທີ່ສຸດ, ສ່ວນດ້ານເສດຖະກິດ: ສປ ຈີນ ໄດ້ກາຍເປັນປະເທດອັນດັບ 1 ຂອງການລົງທຶນຕ່າງປະເທດຢູ່ລາວ, ເປັນຄູ່ຄ້າໃຫຍ່ອັນດັບ 2 ຂອງລາວ ແລະ ນັກທ່ອງທ່ຽວຈີນ ກໍເປັນອັນດັບ 2 ຂອງນັກທ່ອງທ່ຽວຕ່າງປະເທດທີ່ມາທ່ຽວຢູ່ລາວ; ນອກຈາກນັ້ນ, ຈີນ ຍັງເປັນປະເທດທີ່ມີໂຄງການຮ່ວມມືລົງທຶນອັນດັບ 1 ຢູ່ລາວ ໂດຍໄດ້ມີໂຄງການຮ່ວມມືຍຸດທະສາດທີ່ສໍາຄັນ ເຊັ່ນ: ໂຄງການທາງລົດໄຟ ລາວ-ຈີນ, ໂຄງການທາງດ່ວນ ລາວ-ຈີນ, ໂຄງການສ້າງແລວເສດຖະກິດ ລາວ-ຈີນ, ເຂດເສດຖະກິດພິເສດ ແລະ ອື່ນໆອີກ.

(ຂ່າວ-ພາບ: ສໍານານ)