ພູຜາ, ສາຍນໍ້າ, ວັດທະນະທຳ ແລະ ວິຖີຊີວິດຂອງປະຊາຊົນ ໄດ້ຫຼໍ່ຫຼອມຮາກຖານແຫ່ງການສະໜັບສະໜູນຂອງປະຊາຊົນໃຫ້ແໜ້ນແຟ້ນ. ລາວ-ຈີນ ມີຊາຍແດນຮ່ວມກັນຍາວເຖິງ 710 ກິໂລແມັດ, ປະຊາຊົນຕາມລຽບຊາຍແດນຂອງສອງປະເທດຕັ້ງຖິ່ນຖານຢູ່ຂ້າມແດນຊຶ່ງກັນ ແລະ ກັນ, ມີພາສາທີ່ສື່ສານກັນໄດ້ ແລະ ມີຂະນົບທຳນຽມປະເພນີທີ່ໃກ້ຄຽງກັນ. ໃນໄລຍະ “ປີມິດຕະພາບລາວ-ຈີນ” ປີ 2026, ສອງປະເທດໄດ້ຈັດກິດຈະກຳຫຼາກຫຼາຍຮູບແບບ ເຊັ່ນ: ງານສະແດງສິລະປະ - ວັນນະຄະດີ, ສັບປະດາຮູບເງົາ ແລະ ການແລກປ່ຽນຊາວໜຸ່ມ. ຖະແຫຼງການຮ່ວມຄັ້ງນີ້ໄດ້ສະເໜີໂຄງການ “ພັນ ແລະໝື່ນ” ສໍາລັບການຮ່ວມມືດ້ານຊັບພະຍາກອນມະນຸດ; ໂດຍມີເປົ້າໝາຍຮອດປີ 2028 ໃຫ້ມີນັກຮຽນລາວ ຈໍານວນ 10,000 ຄົນຕໍ່ປີ ເດີນທາງມາສຶກສາຢູ່ຈີນ, ຝຶກອົບຮົມບຸກຄະລາກອນປະເພດຕ່າງໆ 3,000 ຄົນ ແລະ ສືບຕໍ່ເຊັນແຜນປະຕິບັດການຮ່ວມມືດ້ານວັດທະນະທຳ ແລະ ການທ່ອງທ່ຽວ; ສິ່ງນີ້ໄດ້ຍົກລະດັບຮາກຖານແຫ່ງການສະໜັບສະໜູນຈາກປະຊາຊົນຈາກຄວາມໄດ້ປຽບຕາມທຳມະຊາດ ໃຫ້ກາຍເປັນການແລກປ່ຽນສອງທາງທີ່ຂັບເຄື່ອນໂດຍກົນໄກລະບອບ, ພ້ອມທັງໃຫ້ຄວາມເອົາໃຈໃສ່ຊີວິດການເປັນຢູ່ຂອງປະຊາຊົນໃນຮູບແບບ “ນ້ອຍແຕ່ງາມ”, ເພື່ອໃຫ້ຜົນສໍາເລັດແຫ່ງການຮ່ວມມືອຳນວຍປະໂຫຍດ ໃຫ້ແກ່ປະຊາຊົນທົ່ວໄປຈຳນວນຫຼາຍຂຶ້ນ.
ການຮ່ວມກັນປົກປັກຮັກສາຄວາມໝັ້ນຄົງ ເພື່ອຄວາມສະຫງົບສຸກຂອງພາກພື້ນ. ລາວ ແລະ ຈີນ ສືບຕໍ່ຮັກສາການຮ່ວມມືຢ່າງໃກ້ຊິດໃນຂົງເຂດການບັງຄັບໃຊ້ກົດໝາຍ ແລະ ຄວາມໝັ້ນຄົງ. ສອງຝ່າຍໄດ້ສືບຕໍ່ດໍາເນີນມາດຕະການທີ່ເຂັ້ມງວດໃນການປາບປາມອາຊະຍາຂ້າມຊາດ ກ່ຽວກັບ ການພະນັນຂ້າມແດນ ແລະ ການສໍ້ໂກງຜ່ານເຄືອຂ່າຍໂທລະຄົມ-ອິນເຕີເນັດ, ຊ່ວຍຮັກສາສະຖຽນລະພາບທາງສັງຄົມ ແລະ ປົກປ້ອງຄວາມປອດໄພດ້ານຊັບສິນຂອງປະຊາຊົນໃນເຂດຊາຍແດນຂອງສອງປະເທດ ໄດ້ຢ່າງມີປະສິດທິຜົນ. ພາຍໃຕ້ກົນໄກການລາດຕະເວນ ແລະ ການບັງຄັບໃຊ້ກົດໝາຍຮ່ວມຕາມແມ່ນໍ້າຂອງ, ລາວ ແລະ ຈີນ ໄດ້ຮ່ວມກັບບັນດາປະເທດໃນລຸ່ມນໍ້າ ເພື່ອຮັກສາຄວາມປອດໄພຂອງເສັ້ນທາງແລ່ນເຮືອ. ໃນເດືອນກັນຍາ 2025, ຜູ້ນໍາຂອງສອງ ປະເທດໄດ້ປະກາດຢ່າງຊັດເຈນທີ່ຈະເພີ່ມທະວີການຮ່ວມມືດ້ານປ້ອງກັນຊາດ, ການບັງຄັບໃຊ້ ກົດໝາຍ ແລະ ຄວາມໝັ້ນຄົງ ໃຫ້ມີຄວາມເລິກເຊິ່ງຍິ່ງຂຶ້ນ ຊຶ່ງສະແດງໃຫ້ເຫັນເຖິງລະດັບຄວາມເລິກຂອງການຮ່ວມມື ແລະ ການເຫັນດີຮ່ວມກັນທາງຍຸດທະສາດຂອງສອງຝ່າຍ ໃນຂົງເຂດຄວາມໝັ້ນຄົງທີ່ບໍ່ແມ່ນແບບດັ່ງເດີມ. ການຮ່ວມມືດ້ານຄວາມໝັ້ນຄົງຊຸດນີ້ດໍາເນີນເພື່ອຮັບໃຊ້ຜົນປະໂຫຍດສຸກຮ່ວມກັນຂອງປະຊາຊົນສອງປະເທດ, ບໍ່ໄດ້ແນໃສ່ຝ່າຍທີ່ສາມ ແລະ ບໍ່ຖືກລົບກວນໂດຍຝ່າຍທີສາມ; ໂດຍໃນພາກພື້ນອາຊີຕາເວັນອອກສ່ຽງໃຕ້ ຊຶ່ງເປັນແນວໜ້າຂອງການແຂ່ງຂັນລະຫວ່າງປະເທດມະຫາອຳນາດ, ການຮ່ວມມືດັ່ງກ່າວໄດ້ສະເໜີແນວທາງການ ຮ່ວມມືດ້ານຄວາມໝັ້ນຄົງທີ່ແຕກຕ່າງຈາກການປະເຊີນໜ້າກັນລະຫວ່າງຄ້າຍ.
ການຮ່ວມມືຫຼາຍຝ່າຍສະທ້ອນອຸດົມການແຫ່ງຄວາມສະເໝີພາບ. ໃນບັນດາກົນໄກພາກພື້ນ ເຊັ່ນ: ການຮ່ວມມືລ້ານຊ້າງ-ແມ່ຂອງ, ການຮ່ວມມືຈີນ-ອາຊຽນ ແລະ ສັນຍາຄູ່ຮ່ວມມືເສດຖະກິດຮອບດ້ານລະດັບພາກພື້ນ (RCEP); ຝ່າຍຈີນສະໜັບສະໜູນຝ່າຍລາວໃຫ້ມີບົດບາດຢ່າງຫ້າວຫັນ, ຂະນະທີ່ຝ່າຍລາວກໍສະໜັບສະໜູນຂໍ້ລິເລີ່ມການພັດທະນາໂລກ, ຂໍ້ລິເລີ່ມຄວາມໝັ້ນຄົງໂລກ, ຂໍ້ລິເລີ່ມອາລິຍະທຳໂລກ ແລະ ຂໍ້ລິເລີ່ມການປົກຄອງໂລກ. ສອງປະເທດຍັງສືບຕໍ່ ຮັກສາການສື່ສານປະສານງານທີ່ດີໃນອົງການພະຫຸພາຄີ ເຊັ່ນ: ອົງການສະຫະປະຊາຊາດ. ການປະສານຮ່ວມມືຢ່າງສະເໝີພາບລະຫວ່າງປະເທດໃຫຍ່ ແລະ ປະເທດນ້ອຍ ຢູ່ເທິງເວທີສາກົນ ເຊັ່ນນີ້, ເປັນການສະທ້ອນຢ່າງເປັນຮູບປະທຳຂອງປະຊາຄົມຄູ່ຮ່ວມຊາຕາກຳລາວ-ຈີນ ໃນລະດັບການປົກຄອງໂລກ. ເມື່ອຫວນຄືນ 65 ປີຜ່ານມາ, ນັບແຕ່ການສະໜັບສະໜູນຊຶ່ງກັນ ແລະ ກັນໃນໄລຍະຕົ້ນ ແຫ່ງການສ້າງສາຍພົວພັນທາງການທູດ ຈົນກ້າວສູ່ການເປັນຄູ່ຮ່ວມມືຍຸດທະສາດຮອບດ້ານ, ແລະ ຕໍ່ມາກ້າວສູ່ການສ້າງປະຊາຄົມຄູ່ຮ່ວມຊາຕາກຳ ລາວ-ຈີນ ທີ່ເຂັ້ມແຂງໜຽວແໜ້ນໃນທຸກສະພາບການຂອງຍຸກໃໝ່, ບົດຮຽນພື້ນຖານຂອງສາຍພົວພັນລາວ-ຈີນ ໄດ້ປະກົດໃຫ້ເຫັນຢ່າງຊັດເຈນ, ຖືເອົາການຮັບຮູ້ຮ່ວມກັນດ້ານລະບອບເປັນພື້ນຖານແຫ່ງຄວາມໄວ້ວາງໃຈ, ຖືເອົາຖືເອົາການເຄົາລົບຜົນປະໂຫຍດຫຼັກຂອງກັນ ແລະ ກັນເປັນກົນໄກແຫ່ງຄວາມໝັ້ນຄົງ, ເຊື່ອມໂຍງໂຄງລ່າງພື້ນຖານເປັນແນວທາງນໍາແຫ່ງການພັດທະນາ, ຖືເອົາການຍົກລະດັບໂຄງສ້າງ ການຄ້າເປັນແກນຫຼັກຂອງການຮ່ວມມື, ຖືເອົາການແລກປ່ຽນດ້ານວັດທະນະທໍາ-ປະຊາຊົນເປັນຮາກຖານທາງສັງຄົມ, ແລະ ຖືເອົາໂຄງສ້າງລະບອບຫຼາຍລະດັບເປັນຫຼັກປະກັນໃນການຜັນຂະຫຍາຍໃຫ້ເກີດຜົນ. ພາຍໃຕ້ການນໍາພາທາງຍຸດທະສາດຂອງຜູ້ນຳສອງປະເທດ, ການສ້າງປະຊາຄົມຄູ່ຮ່ວມຊາຕາກຳລາວ-ຈີນຈະສືບຕໍ່ລົງເລິກຢ່າງບໍ່ຢຸດຢັ້ງ ແລະ ຈະຊ່ວຍປະກອບສ່ວນກໍາລັງແຫ່ງການປະຕິບັດໃຫ້ແກ່ການສ້າງປະຊາຄົມຄູ່ຮ່ວມຊາຕາກຳຂອງມວນມະນຸດຫຼາຍຂຶ້ນ.
ຄໍາເຫັນ