ການສົນທະນາໄດ້ຈັດຂຶ້ນ ພາຍໃຕ້ຫົວຂໍ້ ກ່ຽວກັບການແຂ່ງຂັນດິຈິຕອນໃນຂະແໜງກະສິກຳ(Youth4Laos Digital Agriculture challenge) ຊຶ່ງມີບັນດາຊາວໜຸ່ມນັກສຶກສາຈາກປະເທດຍີ່ປຸ່ນ, ສ ເກົາຫຼີ ແລະ ສປປ ລາວ ມາຮ່ວມກັນຄົ້ນຄວ້າ ແລະ ສະເໜີວິທີການນໍາໃຊ້ດິຈິຕອນ ເພື່ອປັບປຸງການພັດທະນາຂະແໜງກະສິກຳຂອງຄອບຄົວຊາວກະສິກອນຂະໜາດນ້ອຍໃນ ສປປ ລາວ.
ທ່ານ ນາງ ພະກາວັນ ພິດສະໄໝ, ຫົວໜ້າກົມແຜນການ ແລະ ການຮ່ວມມື, ກະຊວງກະສິກຳ ແລະ ສິ່ງແວດລ້ອມ, ໄດ້ເນັ້ນໜັກເຖິງບົດບາດ ແລະ ຄວາມສຳຄັນຂອງການມີສ່ວນຮ່ວມຂອງຊາວໜຸ່ມໃນການພັດທະນາຂະແໜງກະສິກຳ. ທ່ານໄດ້ຊີ້ໃຫ້ເຫັນວ່າ ຊາວໜຸ່ມໃນປັດຈຸບັນບໍ່ພຽງແຕ່ເປັນຜູ້ນຳໃນອະນາຄົດເທົ່ານັ້ນ, ແຕ່ພວກເຂົາຍັງເປັນນັກປະດິດສ້າງ ທີ່ຫ້າວຫັນ ພ້ອມດ້ວຍພະລັງແຮງ ແລະ ວິໄສທັດທີ່ຈຳເປັນເພື່ອພັດທະນາລະບົບອາຫານແບບຍືນຍົງ.
ທ່ານນາງ ລີຫານາ ລາຊາ, ຜູ້ອຳນວຍການໃຫຍ່ ປະຈຳພາກພື້ນ IFAD ປະຈຳພາກພື້ນອາຊີ ແລະ ປາຊີຟິກ ກ່າວວ່າ: ໂຄງການ ແລະ ກິດຈະກຳ ໃນການສົ່ງເສີມຊາວໜຸ່ມໃນການພັດທະນາ ໃນ ສປປ ລາວ (Youth4Laos) ສາມາດເປັນຕົວແບບທີ່ສຳຄັນ ຢູ່ບ່ອນອື່ນໆ ໃນພາກພື້ນ, ແລະ ໄດ້ຍົກໃຫ້ເຫັນບົດບາດອັນສຳຄັນທີ່ນັກປະດິດສ້າງຊາວໜຸ່ມມີບົດບາດໃນການຂະແໜງກະສິກຳ, ໂດຍສະເພາະໃນການຫັນປ່ຽນກະສິກຳແບບດັ້ງເດີມໄປສູ່ທຸລະກິດກະສິ ກຳທີ່ທັນສະໄໝ ທີ່ມີແຫຼ່ງຂໍ້ມູນທີ່ສຳຄັນ ເພື່ອຮັບໃຊ້ໃນການວາງແຜນ ແລະ ຈັດຕັ້ງປະຕິບັດຢ່າງເປັນລະບົບ.
ທ່ານນາງ ໄຊລີ ມາເທີ, ຫົວໜ້າຫ້ອງການປະສານງານອົງການສະຫະປະຊາຊາດປະຈຳ ສປປ ລາວ, ໄດ້ເໜັ້ນໜັກເປັນພິເສດກ່ຽວກັບຄວາມສຳຄັນຂອງການລົງທຶນໃສ່ໄວໜຸ່ມວ່າ ຊຶ່ງເປັນພື້ນຖານຂອງການພັດທະນາແບບຍືນຍົງ. ທ່ານ ຍັງໄດ້ເນັ້ນໜັກກ່ຽວກັບບົດບາດອັນສຳຄັນຂອງໄວໜຸ່ມໃນການນຳສະເໜີວິທີແກ້ໄຂທີ່ມີນະວັດຕະກຳທີ່ສ້າງຄວາມເຂັ້ມແຂງ ແລະ ສາມາດປັບຕົວເຂົ້າໃນການປ່ຽນແປງຂອງດິນຟ້າອາອາກາດ.
ທ່ານນາງ ເອນີກາ ບາຊູ, ຜູ້ອຳນວຍການໃຫຍ່ ຄົນໃໝ່ ຂອງອົງການ IFAD ປະຈຳ ສປປ ລາວ ໄດ້ນຳສະເໜີລາຍລະອຽດກ່ຽວກັບວຽກງານທີ່ ອົງການ IFAD ໄດ້ປະຕິບັດຮ່ວມກັບບັນດາຊາວໜຸ່ມຢູ່ທົ່ວໂລກ ເພື່ອສະໜອງທັກສະການຄຸ້ມຄອງທຸລະກິດ, ຄວາມເປັນຜູ້ນຳ, ແລະ ທັກສະດ້ານວິຊາການທີ່ຈຳເປັນເພື່ອເສື່ອມໂຍ່ງເຂົ້າກັບຕະຫຼາດທີ່ມີການແຂ່ງຂັນ.
ກ່ອນງານປຶກສາຫາລື, ບັນດາຊາວໜຸ່ມໄດ້ໄປຢ້ຽມຢາມຄອບຄົວຊາວກະສິກອນໃນບ້ານໂພລາດ, ເມືອງຈອມເພັດ, ແລະ ບ້ານນາຊາວ, ເມືອງຫຼວງພະບາງ ແຂວງຫຼວງພະບາງ, ຊຶ່ງເຮັດວຽກຮ່ວມກັບໂຄງການຊົນລະກະເສດ ແລະ ການຜະລິດເປັນສິນຄ້າ ຂອງຊາວກະສິກອນຂະໜາດນ້ອຍ (PICSA) ທີ່ໄດ້ຮັບການສະໜັບສະໜູນດ້ານການເງິນຈາກ ອົງການ IFAD, ເພື່ອເບິ່ງກິດຈະກຳຊົນລະປະທານ, ເຕັກນິກກະສິກຳ ເພື່ອປັບຕົວຕໍ່ການປ່ຽນແປງສະພາບອາກາດ ແລະ ການນໍາເຕັກໂນໂລຊີການສື່ສານ ແລະ ຂໍ້ມູນຂ່າວສານເຂົ້າໃນການພັດທະນາ.
ພິເສດ, ຍັງມີບັນດານັກສຶກສາຈາກມະຫາວິທະຍາໄລແຫ່ງຊາດເຊອຸນ, ສ ເກົາຫຼີ ແລະ ສະໂມ ສອນຊາວໜຸ່ມ IFAD ຍີ່ປຸ່ນ ແລະ ນັກສຶກສາຈາກຄະນະກະເສດສາດ, ມະຫາວິທະຍາໄລແຫ່ງຊາດລາວ ໄດ້ເດີນທາງໄປຍັງບ້ານຕ່າງໆ ພ້ອມກັບໄດ້ຮຽນຮູ້ໂດຍກົງຈາກຊາວກະສິກອນລາວ ກ່ອນທີ່ຈະນຳສະເໜີຄຳແນະນຳຂອງເຂົາເຈົ້າຕໍ່ກຸ່ມຜູ້ເຂົ້າຮ່ວມທີ່ຫຼາກຫຼາຍໃນຕອນເຊົ້າມື້ຕໍ່ມາ, ລວມທັງການນຳຈາກບັນດາກະຊວງຕ່າງໆ, ຜູ້ຕາງໜ້າຈາກສະຖານທູດ, ບັນດາຄູ່ຮ່ວມພັດທະນາ ແລະ ອົງການຈັດຕັ້ງສັງຄົມ.
ໂຄງການ Youth4Laos ມີຈຸດປະສົງເພື່ອກະຕຸ້ນການລິເລີ່ມຕ່າງໆທີ່ມີສ່ວນຮ່ວມຢ່າງຫ້າວຫັນຂອງຊາວໜຸ່ມໃນການພັດທະນາລະບົບກະສິກຳ ແລະ ອາຫານ, ກຳນົດທິດທາງພື້ີນຖານການພັດທະນາໃນອະນາຄົດທີ່ມີຄວາມຍືນຍົງ ພ້ອມທັງສອດຄ່ອງກັບເປົ້າໝາຍການພັດທະ ນາແບບຍືນຍົງ ແລະ ແຜນພັດທະນາເສດຖະກິດ-ສັງຄົມແຫ່ງຊາດຂອງ ສປປ ລາວ.
ໂຄງການ Youth4Laos Digital Agriculture Challenge ແມ່ນປະສານງານ ໂດຍ ອົງການ IFAD ຮ່ວມກັບລັດຖະບານ ສປປ ລາວ, ມະຫາວິທະຍາໄລແຫ່ງຊາດລາວ, ມະຫາວິທະຍາໄລແຫ່ງຊາດເຊອຸນ ສ ເກົາຫຼີ ແລະ ສະໂມສອນຊາວໜຸ່ມ IFAD ຍີ່ປຸ່ນ. ໂຄງການດັ່ງກ່າວນີ້ ແມ່ນສົ່ງເສີມນະວັດຕະກໍາດິຈິຕອນທີ່ປະດິດສ້າງໂດຍຊາວໜຸ່ມ ເພື່ອການຫັນປ່ຽນຊົນນະບົດທີ່ມີຄວາມຮອບດ້ານ ແລະ ທົນທານຕໍ່ການປ່ຽນແປງຂອງດິນຟ້າອາກາດໃນ ສປປ ລາວ, ສອດຄ່ອງກັບບຸລິມະສິດແຫ່ງຊາດ ແລະ ບຸລິມະສິດ ໃນຂອບການຮ່ວມມື ພາຍໃຕ້ IFAD14.
ບັນດາບົດນຳສະເໜີ ຂອງບັນດາຊາວໜຸ່ມ ຈາກ ສາມປະເທດ ທີ່ຊະນະເລີດແມ່ນມີລາຄາຖືກ ແລະ ຖືກອອກແບບມາສຳລັບສະພາບຊົນນະບົດທີ່ໂທລະສັບ ແລະ ການເຂົ້າເຖິງອິນເຕີເນັດຍັງມີຂໍ້ຈຳກັດ. ບັນດາບົດນຳສະເໜີເຫຼົ່ານີ້ລວມມີ:
· ການບໍລິການໃຫ້ຄໍາປຶກສາທາງສຽງ ທີ່ເປັນພາສາລາວ ແລະ ພາສາຂະມຸ, ແກ່ຊາວກະສິກອນ ໂດຍຜ່ານໂທລະສັບມືຖືທົ່ວໄປ ເພື່ອໃຫ້ຜູ້ປູກເຂົ້າໄດ້ຮັບຂໍ້ມູນ ແລະ ຄໍາເຕືອນກ່ຽວກັບນໍ້າຖ້ວມ ແລະ ຄໍາແນະນໍາກ່ຽວກັບການປູກພືດຜົນໂດຍບໍ່ຕ້ອງອ່ານ ຫຼື ໃຊ້ອິນເຕີເນັດ;
· ລະບົບການເກັບຊື້ເຂົ້າໜຽວຢູ່ຂັ້ນຊຸມຊົນ ຊຶ່ງປະສານງານໂດຍໄວໜຸ່ມ ແລະ ແມ່ຍິງໂດຍໃຊ້ເຄື່ອງມືດິຈິຕອນ ທີ່ງ່າຍດາຍ, ເພື່ອໃຫ້ຊາວກະສິກອນສາມາດຂາຍເຂົ້າໜຽວໄດ້ໃນປະລິມານຫຼາຍຮ່ວມກັນ ແລະ ເຈລະຈາລາຄາທີ່ດີກວ່າກັບຜູ້ຊື້ໃນນະຄອນຫຼວງວຽງຈັນ;
· ຝຶກອົບຮົມ "ນັກຂ່າວດິຈິຕອນ" ໄວໜຸ່ມໃນບ້ານຕ່າງໆເພື່ອຊ່ວຍຄົວເຮືອນຊາວກະສິ ກອນຂາຍໂດຍກົງຜ່ານສື່ສັງຄົມ ແລະ ນຳໃຊ້ລະບົບການຈ່າຍເງິນແຫ່ງຊາດ Lao QR, ຫຼຸດຜ່ອນການເພິ່ງພາພໍ່ຄ້າຄົນກາງ;
· ການປ່ຽນສິ່ງເສດເຫຼືອອິນຊີຈາກຄົວເຮືອນ, ຕະຫຼາດ ແລະ ຟາມໃນວິທະຍາເຂດໃຫ້ກາຍເປັນຕົວອ່ອນແມງວັນດຳສຳລັບເປັນອາຫານໄກ່ ແລະ ເປັນປຸ໋ຍອິນຊີ, ໂດຍໄດ້ຮັບການສະໜັບສະໜູນຈາກວິດີໂອການຮຽນຮູ້ລະຫັດ QR ເປັນພາສາລາວ ແລະ ເຊັນເຊີອຸນຫະພູມ ແລະ ຄວາມຊຸ່ມຊື່ນລາຄາຖືກ;
· ການເກັບຮັກສາບັນທຶກດິຈິຕອນເພື່ອຊ່ວຍໃຫ້ຊາວກະສິກອນລາວຕອບສະໜອງຄວາມຕ້ອງການດ້ານເອກະສານສຳລັບການຮັບຮອງອິນຊີ ແລະ ເຂົ້າເຖິງຕະຫຼາດທີ່ມີມູນຄ່າສູງໃນຕ່າງປະເທດ.
ສອງຂໍ້ສະເໜີແມ່ນມາຈາກນັກສຶກສາຄະນະກະເສດສາດ, ວິທະຍາເຂດນາບົງ, ມະຫາວິທະຍາ ໄລແຫ່ງຊາດລາວ.
(ແຫຼ່ງຂ່າວ:UN)
ຄໍາເຫັນ