 |
ທ່ານ ຂັນຕີ ສີລະວົງສາ ໄດ້ຕີລາຄາສູງຕໍ່ການມາພົບປະແລກປ່ຽນຖອດຖອນບົດຮຽນໃນຄັ້ງນີ້, ເພື່ອເຮັດໃຫ້ສອງແຂວງ ໄດ້ມີການພົບປະ, ປຶກສາຫາລື ແລະ ແລກປ່ຽນບົດຮຽນຮ່ວມກັນ ກ່ຽວກັບການຄຸ້ມຄອງ, ການບູລະນະ, ການສ້ອມແປງ ແລະ ການຟື້ນຟູຍົກລະດັບເສັ້ນທາງຫຼວງແຫ່ງຊາດ ທີ່ນໍາໃຊ້ເຂົ້າໃນການຂົນສົ່ງແຮ່ທາດ, ຂົນສົ່ງເຄື່ອງ-ອຸປະກອນໄຟຟ້າພະລັງງານລົມ ແລະ ອື່ນໆ ເພື່ອຮັບປະກັນໄດ້ທາງດ້ານເຕັກນິກ, ມີຄວາມຍຸຕິທໍາຕໍ່ຜູ້ປະກອບການ ແລະ ການຊົມໃຊ້ຂອງສັງຄົມ.
ທ່ານ ແກ້ວປະເສີດ ແກ້ວມະນີວົງ ຮອງຫົວໜ້າພະແນກໂຍທາທິການ ແລະ ຂົນສົ່ງແຂວງເຊກອງ ລາຍງານໃຫ້ຮູ້ວ່າ: ແຂວງເຊກອງ ມີເສັ້ນທາງຫຼວງແຫ່ງຊາດ 4 ເສັ້ນ ຄື: ທາງ 1I, 1H, 16E ແລະ ທາງ 16B ລວງຍາວທັງໝົດ 209 ກິໂລແມັດ. ໃນນີ້, ເສັ້ນທາງທີ່ມີການຂົນສົ່ງໜັກຜ່ານຫຼາຍກວ່າໝູ່ແມ່ນ ເສັ້ນທາງ 16E ແລະ 16B ມີການເປ້ເພເສຍຫາຍ, ປະຊາຊົນໄດ້ຮັບຜົນກະທົບ, ການໄປ-ມາພົບຄວາມຫຍຸ້ງຍາກ. ສະນັ້ນ, ເພື່ອແກ້ໄຂບັນຫາດັ່ງກ່າວ ການນໍາແຂວງ ກໍຄືຂະແໜງການກ່ຽວຂ້ອງ ຈຶ່ງໄດ້ລົງຕິດຕາມ ກວດກາ, ຈັດກອງປະຊຸມປຶກສາຫາລື ແລະ ຕົກລົງເປັນເອກະພາບຍົກລະດັບເສັ້ນທາງ 16B ແຕ່ເຂດບ້ານດາກເຕິຣບ ເມືອງດາກຈຶງ ແຂວງເຊກອງ ຫາ ຊາຍແດນລາວ-ຫວຽດນາມ ຈາກມາດຕະຖານເກົ່າ 9,1 T/ເພົາ ຂຶ້ນເປັນ 11 T/ເພົາ ໂດຍເພີ່ມຊັ້ນ Basecourse 15 cm, ໜ້າທາງປູອັດສະຟານຄວາມໜາ 5 ຊມ, ກວ້າງ 8 ມ (ສະເພາະຊ້ວງຕົວເມືອງກວ້າງ 14 ມ) ແລະ ໄດ້ສະເໜີໃຫ້ບໍລິສັດປະກອບສ່ວນເປັນເງິນ, ມາຮອດປັດຈຸບັນ ໄດ້ຮັບການປັບປຸງແກ້ໄຂ ເຮັດໃຫ້ການໄປ-ມາສະດວກສະບາຍດີຂຶ້ນ.
(ແຫຼ່ງຂ່າວ: ແຂວງເຊກອງ)
ຄໍາເຫັນ