ອຸດົມການຮ່ວມກັນແມ່ນສາຍພົວພັນທາງຈິດໃຈທີ່ເຂັ້ມແຂງທີ່ສຸດໃນສາຍພົວພັນ ລະຫວ່າງສອງພັກ ແລະ ສອງປະເທດ. ສອງພັກລ້ວນແຕ່ມີໜ້າທີ່ປະຫວັດສາດໃນການເຮັດໃຫ້ປະຊາຊົນມີຄວາມຜາສຸກ ເຮັດໃຫ້ປະເທດຊາດມີການພັດທະນາ ແລະ ເຮັດໃຫ້ມະນຸດມີຄວາມກ້າວໜ້າ, ພ້ອມທັງຖືເອົາການຢຶດໝັ້ນ ແລະ ເພີ່ມທະວີການນຳພາຂອງພັກເປັນຫຼັກແຫ່ງການຢຶດຖື. ສອງພັກໄດ້ອີງໃສ່ເວທີສາກົນໄກຕ່າງໆ ເຊັ່ນ: ກອງປະຊຸມສຳມະນາທິດສະດີ ແລະ ຊຸດຝຶກອົບຮົມພະນັກງານເປັນຕົ້ນ, ໄດ້ມີການແລກປ່ຽນຢ່າງເລິກເຊິ່ງ ກ່ຽວກັບບັນດາຫົວຂໍ້ຫຼັກ ເຊັ່ນ: ການກໍ່ສ້າງພັກ ແນວທາງການປົກຄອງປະເທດ ແລະ ບໍລິຫານການເມືອງເປັນຕົ້ນ, ຊຸກຍູ້ການແລກປ່ຽນບົດຮຽນດ້ານການປົກຄອງພັກ ແລະ ປົກຄອງປະເທດ ໄດ້ຮັບ ໝາກຜົນອັນອຸດົມສົມບູນ.
ການຮ່ວມກັນຊອກຄົ້ນເສັ້ນທາງແຫ່ງຄວາມທັນສະໄໝທີ່ເໝາະສົມກັບສະພາບຂອງແຕ່ລະປະເທດ ແມ່ນວຽກງານຍຸກສະໄໝລາວ-ຈີນ ໃນຖານະເປັນສະຫາຍຮ່ວມເດີນທາງແຫ່ງ ສັງຄົມນິຍົມ. ສອງປະເທດມີໄລຍະການພັດທະນາ ແລະ ຊັບພະຍາກອນທີ່ແຕກຕ່າງກັນ, ແຕ່ຈຸດໝາຍໃນການສະແຫວງຫາການພັດທະນາແບບເພິ່ງຕົນເອງ ແລະ ການເພີ່ມທະວີສະຫວັດດີພາບຂອງປະຊາຊົນ ມີການສອດຄ່ອງກັນຢ່າງສູງ. ສອງຝ່າຍຖືເອົາການພັດທະນາເປັນເສົາຫຼັກ, ໄດ້ແລກປ່ຽນບົດຮຽນໃນຂົງເຂດການພັດທະນາຊົນນະບົດການພັດທະນາແບບສີຂຽວ ແລະ ການຫັນແບບດີຈີຕອນເປັນຕົ້ນ ຊຶ່ງບັນດາເສັ້ນທາງປະຕິບັດທີ່ມີສີສັນພິເສດຂອງແຕ່ລະປະເທດ ໄດ້ເຮັດໃຫ້ພາບພົດແຫ່ງຄວາມທັນສະໄໝຂອງສັງຄົມນິຍົມ ມີຄວາມຫຼາກຫຼາຍ ແລະ ອຸດົມສົມບູນຂຶ້ນ.
ຄວາມໄວ້ເນື້ອເຊື່ອໃຈທາງດ້ານການເມືອງແບບລະດັບສູງແມ່ນການສະທ້ອນອັນສຳຄັນ ຂອງແນວຄິດ “ສະຫາຍທີ່ດີ”. ທ່ານ ສີຈິ້ນຜິງ ເລຂາທິການໃຫຍ່ ໄດ້ສະເໜີຄວາມເຫັນ 4 ຂໍ້ ກ່ຽວກັບການຊຸກຍູ້ສາຍພົວພັນ ລາວ-ຈີນ ແລະ ການສ້າງຄູ່ຮ່ວມຊາຕາກຳຂອງສອງປະເທດ ຄື: ຢຶດໝັ້ນທິດທາງສັງຄົມນິຍົມ ເພີ່ມທະວີການຮ່ວມມື ແລະ ຕ່າງຝ່າຍຕ່າງມີຜົນປະໂຫຍດ ເສີມຂະຫຍາຍມິດຕະພາບອັນເປັນປະເພນີລະຫວ່າງປະຊາຊົນ ແລະ ເພີ່ມທະວີການປະສານງານດ້ານນະໂຍບາຍການຕ່າງປະເທດ. ຂໍ້ສະ
ເໜີດັ່ງກ່າວໄດ້ຊີ້ທິດໃຫ້ການສ້າງຄວາມໄວ້ເນື້ອເຊື່ອໃຈທາງການເມືອງແບບລະດັບສູງໃຫ້ໝັ້ນຄົງ. ສອງຝ່າຍມີຄວາມເຂົ້າໃຈຢ່າງເລິກເຊິ່ງໃນບັນຫາທີ່ສອງຝ່າຍເອົາໃຈໃສ່ໃຫ້ຄວາມສໍາຄັນ ແລະ ໃຫ້ການສະໜັບສະໜູນຢ່າງເຂັ້ມແຂງຕໍ່ກັນໃນບັນຫາທີ່ກ່ຽວພັນກັບຜົນປະໂຫຍດອັນເປັນແກນກາງຂອງສອງຝ່າຍ, ຮ່ວມກັນພັດທະນາ ດ້ວຍການຮ່ວມມື ແລະ ຕ່າງຝ່າຍຕ່າງມີຜົນປະໂຫຍດ, ຮ່ວມກັນປະເຊີນໜ້າກັບສິ່ງທ້າທາຍ ດ້ວຍຄວາມສາມັກຄີ ແລະ ການປະສານງານ ເພື່ອປະກອບສ່ວນເຂົ້າໃນພາລະກິດອັນສູງສົ່ງໃນການພັດທະນາ ແລະ ຄວາມກ້າວໜ້າຂອງມະນຸດ.
ທ່ານ ສີຈິ້ນຜິງ ເລຂາທິການໃຫຍ່ ໄດ້ກ່າວວ່າ: ຈີນຍາມໃດກໍຖືລາວເປັນທິດທາງສຳຄັນ ໃນການທູດກັບປະເທດໃກ້ຄຽງ, ສະໜັບສະໜູນຢ່າງເຂັ້ມແຂງຕໍ່ເສັ້ນທາງສັງຄົມນິຍົມທີ່ສອດຄ່ອງກັບສະພາບຕົວຈິງຂອງລາວ, ຈະຮ່ວມກັບຝ່າຍລາວ ເພື່ອສືບທອດມິດຕະພາບອັນເປັນປະເພນີ, ເພີ່ມທະວີການຮ່ວມມື ແລະ ຕ່າງຝ່າຍຕ່າງມີຜົນປະໂຫຍດ, ສາມັກຄີ ແລະ ປະສານງານຢ່າງໃກ້ຊິດ, ຊຸກຍູ້ສາຍພົວພັນ ລາວ-ຈີນ ໃຫ້ບັນລຸການກ້າວກະໂດດຂັ້ນໃໝ່. 65 ປີ ທີ່ຮ່ວມທຸກຮ່ວມສຸກນຳກັນ, ນັບແຕ່ “ສາຍພົວພັນຄູ່ຮ່ວມມືຍຸດທະສາດຮອບດ້ານ” ຈົນເຖິງ “ຄູ່ຮ່ວມຊາຕາກຳ ລາວ-ຈີນ” ແລະ ກ້າວສູ່ການຮ່ວມກັນສ້າງ “ຄູ່ຮ່ວມຊາຕາກຳລາວ-ຈີນທີ່ເຂັ້ມແຂງໜຽວແໜ້ນໃນທຸກສະພາບການຂອງຍຸກໃໝ່” ນັ້ນ ຊຶ່ງໄດ້ສະແດງໃຫ້ເຫັນພາລະໜ້າທີ່ຂອງສອງພັກ ແລະ ສອງປະເທດ ໃນການປະຕິບັດຕົວຈິງຂອງຄູ່ຮ່ວມມືທີ່ດີ.
ການເຊື່ອມຈອດເຊື່ອມໂຍງໄດ້ຊຸກຍູ້ການຮ່ວມມືດ້ານຄວາມສາມາດການຜະລິດ ກະຕຸ້ນກໍາລັງບົ່ມຊ້ອນດ້ານການພັດທະນາພາກພື້ນ. ນັບຕັ້ງແຕ່ການເປີດນຳໃຊ້ທາງລົດໄຟລາວ-ຈີນ, ການຂົນສົ່ງທັງຜູ້ໂດຍສານ ແລະ ສິນຄ້າໄດ້ມີການຂະຫຍາຍຕົວຢ່າງຕໍ່ເນື່ອງ, ຜົນສະທ້ອນຂອງ "ຊ່ອງທາງທອງຄໍາ" ນັບມື້ນັບເພີ່ມຂຶ້ນ ຊຶ່ງກຳລັງຊຸກຍູ້ໃຫ້ທັງສອງຝ່າຍດຳເນີນການຮ່ວມມືໃນການພັດທະນາແບບສີຂຽວຕາມແລວທາງ "ການກວດກາປະຕູດຽວ ຄັ້ງດຽວ” ແລະ ການສ້າງແລວທາງເສດຖະກິດລາວ-ຈີນ ເພື່ອບັນລຸເປົ້າໝາຍທີ່ຫັນຈາກປະເທດທີ່ບໍ່ມີຊາຍແດນຕິດກັບທະເລເປັນປະເທດເຊື່ອມໂຍງເຊື່ອມຈອດໃນພາກພື້ນ. ໂຄງການເຊື່ອມຕໍ່ສາຍສົ່ງໄຟຟ້າ 500 ກິໂລໂວນ ລາວ-ຈີນ ໄດ້ເລີ່ມດຳເນີນງານມີການສົ່ງໄຟຟ້າສະອາດ 3 ຕື້ກິໂລວັດຊົ່ວໂມງຕໍ່ປີ ຊຶ່ງເປັນການຊຸກຍູ້ການຫັນປ່ຽນແບບສີຂຽວຂອງພາກພື້ນ. ສອງປະເທດໄດ້ສ້າງພື້ນຖານການພັດທະນາຮ່ວມກັນໃຫ້ແຂງແກ່ນ ດ້ວຍຮູບແບບການເຊື່ອມຈອດທີ່ຫຼາກຫຼາຍ ຊຶ່ງລວມມີການເຊື່ອມຕໍ່ທາງບົກ-ທາງທະເລ ແລະ ການຊ່ວຍເຫຼືອດ້ານພະລັງງານຊຶ່ງກັນ ແລະ ກັນ. ຂະຫຍາຍຂອບເຂດການຮ່ວມມືແບບໃໝ່ ບຳລຸງສ້າງກຳລັງຂັບເຄື່ອນການຂະຫຍາຍຕົວໃໝ່.
ສອງຝ່າຍຖືເອົາແຜນການພັດທະນາ 5 ປີສະບັບໃໝ່ເປັນພື້ນຖານ, ເຊື່ອມຕໍ່ກັບຍຸດທະສາດການພັດທະນາຢ່າງຖືກຕ້ອງ ຊຸກຍູ້ການຮ່ວມມືໃຫ້ຂະຫຍາຍໄປສູ່ຂົງເຂດໃໝ່ ເຊັ່ນ: ເສດຖະກິດດີຈີຕອນ ປັນຍາປະດິດ (AI), ແຮ່ທາດແບບສີຂຽວ ແລະ ອື່ນໆ. ການຄົ້ນຄວ້າພັດທະນາ ແລະ ການນໍາໃຊ້ແບບຈຳລອງພາສາລວມຂອງລາວ (LaoAI) ໄດ້ເປັນສັນຍາລັກທີ່ສະແດງໃຫ້ເຫັນວ່າ: ການຮ່ວມມືດ້ານເຕັກໂນໂລຊີຂອງສອງປະເທດໄດ້ກ້າວເຂົ້າສູ່ໄລຍະໃໝ່ແບບປັນຍາປະດິດ. ຂົງເຂດກະສິກໍາທັນສະໄໝ ກິດຈະການລັດຖະບານແບບເອເລັກໂຕຣນິກຫຼຸດຜ່ອນຄວາມທຸກຍາກດ້ວຍວິທະຍາສາດ ແລະ ເຕັກໂນໂລຊີ ແລະ ອື່ນໆ ໄດ້ຮັບຜົນສຳເລັດການຮ່ວມມືຢ່າງຕໍ່ເນື່ອງ. ການຄ້າເອເລັກໂຕຣນິກຂ້າມແດນໄດ້ເປີດຕະຫຼາດຈີນໃຫ້ແກ່ຜະລິດຕະພັນກະສິກຳທຳມະຊາດຂອງລາວ, ການຍົກເວັ້ນພາສີ ແລະ ລົດໄຟຂະບວນຕ່ອງໂສ້ຄວາມເຢັນໄດ້ນຳສົ່ງກາເຟ ແລະ ເຂົ້າສານໄປເຖິງຜູ້ບໍລິໂພກໂດຍກົງ, ຕົ້ນທຶນການຂົນສົ່ງໄດ້ຮັບການຫຼຸດລົງຢ່າງຫຼວງຫຼາຍ, ລາຍຮັບຂອງຊາວກະສິກອນເພີ່ມຂຶ້ນຫຼາຍເທົ່າ. ການຮ່ວມມືດ້ານພະລັງງານສະອາດໄດ້ຮັບການຊຸກຍູ້ຢ່າງເລິກເຊິ່ງ, ໂຄງການພະລັງງານໄຟຟ້າແສງຕາເວັນຂອງຖານພະລັງງານສະອາດພາກເໜືອຂອງລາວໄດ້ສຳເລັດການກໍ່ສ້າງ ແລະ ເປີດນຳໃຊ້, ການພັດທະນາ ແລະ ການປຸງແຕ່ງແຮ່ທາດສີຂຽວໄດ້ເລັ່ງລັດການຈັດຕັ້ງປະຕິບັດ, ທ່າແຮງດ້ານຊັບພະຍາກອນຈະຫັນສູ່ກຳລັງແຮງອຸດສາຫະກຳ, ສືບຕໍ່ສ້າງກຳລັງແຮງໃໝ່ໃຫ້ແກ່ຄວາມທັນສະໄໝຂອງສອງປະເທດ.
ການເພີ່ມທະວີການປະສານງານໃນການບໍລິຫານທົ່ວໂລກ ເພື່ອສະແດງໃຫ້ເຫັນເຖິງຄວາມຮັບຜິດຊອບຂອງຄູ່ຮ່ວມມືທີ່ດີ. ຈີນ ແລະ ລາວ ຍາມໃດກໍຢຶດໝັ້ນລັດທິຫຼາຍຝ່າຍ, ຮັກສາການປະສານງານຢ່າງໃກ້ຊິດພາຍໃຕ້ຂອບຫຼາຍຝ່າຍ ເຊັ່ນ: ສະຫະປະຊາຊາດ ການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ ຈີນ-ອາຊຽນ ເປັນຕົ້ນ. ສອງຝ່າຍໄດ້ຮ່ວມກັນຈັດຕັ້ງປະຕິບັດຂໍ້ລິເລີ່ມວ່າດ້ວຍການພັດທະນາທົ່ວໂລກ ຂໍ້ລິເລີ່ມວ່າດ້ວຍຄວາມໝັ້ນຄົງທົ່ວໂລກ ຂໍ້ລິເລີ່ມວ່າດ້ວຍອາລິຍະທຳທົ່ວໂລກ ແລະ ຂໍ້ລິເລີ່ມວ່າດ້ວຍການບໍລິຫານທົ່ວໂລກ, ຄັດຄ້ານຢ່າງເດັດຂາດຕໍ່ການກະທຳແບບເຈົ້າອຳນາດ ແລະ ການປະເຊີນໜ້າກັນລະຫວ່າງຄ້າຍ, ປົກປັກຮັກສາສິດຜົນປະໂຫຍດຮ່ວມຂອງບັນດາປະເທດກໍາລັງພັດທະນາ. ຈີນ ແລະ ລາວ ຮ່ວມກັນໃນການຈັດຕັ້ງປະຕິບັດຖະແຫຼງການວ່າດ້ວຍການປະຕິບັດຂອງບັນດາຝ່າຍຢູ່ທະເລຈີນໃຕ້ຢ່າງຮອບດ້ານ ແລະ ມີປະສິດທິຜົນ, ຊຸກຍູ້ໃຫ້ບັນລຸກົດແຫ່ງການປະພຶດຢູ່ທະເລຈີນໃຕ້ໂດຍໄວ, ປົກປັກຮັກສາສັນຕິພາບ ແລະ ສະຖຽນລະພາບໃນພາກພື້ນ ເພື່ອປະກອບສ່ວນເຂົ້າໃນການສ້າງສະຖຽນລະພາບໃຫ້ແກ່ຂະບວນການແບບຍຸຕິທຳ ແລະ ສົມເຫດສົມຜົນຂອງລະບຽບສາກົນ ດ້ວຍການປະສານງານຍຸດທະສາດ ທີ່ກວ້າງກວ່າຂອບເຂດສອງຝ່າຍ.
ຄໍາເຫັນ