 |
ທີ່ກະຊວງສາທາລະນະສຸກ ວ່າ: ວັນແພດລາວແມ່ນວັນໜຶ່ງທີ່ມີຄວາມໝາຍເປັນປະຫວັດສາດອັນລໍ້າຄ່າຂອງຂະແໜງການສາທາລະນະສຸກ ເປັນວັນສ້າງຂະບວນການກິດຈະກໍາຕ່າງໆເພື່ອລະນຶກເຖິງຜົນງານ ແລະ ຍ້ອງຍໍສັນລະເສີນຄຸນງາມຄວາມດີຂອງແພດລາວໃນສະໄໝຕໍ່ສູ້ກູ້ຊາດກໍຄືສະໄໝປົກປັກຮັກສາ ແລະ ສ້າງສາປະເທດຊາດ; ການແພດລາວ ໄດ້ກໍາເນີດຂຶ້ນຜ່ານຂະບວນວິວັດແຫ່ງການເຕີບໃຫຍ່ຂອງການແພດໃນແຕ່ລະສະໄໝມາແຕ່ດຶກດໍາບັນ ແລະ ຕິດພັນກັບການຕໍ່ສູ້ກູ້ຊາດແຕ່ລະໄລຍະ. ໃນປີ 1963 ສະໜາມຮົບຕໍ່ສູ້ກູ້ຊາດຕ້ານພວກລ່າເມືອງຂຶ້ນແບບໃໝ່ໄດ້ເປີດກວ້າງອອກທົ່ວປະເທດ, ເຂດປົດປ່ອຍກໍນັບມື້ນັບຂະຫຍາຍຕົວ, ແພດໝໍ ໃນໄລຍະນັ້ນແມ່ນນອນຢູ່ໃນການຈັດຕັ້ງຂອງເສນາຮັກ ແລະ ໄດ້ເຮັດໜ້າທີ່ຂອງຕົນໃນການຮັກສາ ແລະ ປິ່ນປົວພະຍາດ ໃຫ້ແກ່ພະນັກງານນັກຮົບ ແລະ ປະຊາຊົນບັນດາເຜົ່າ.
ເມື່ອສູນກາງພັກມີນະໂຍບາຍ “ສ້າງເຂດປົດປ່ອຍໃຫ້ເປັນລັດໜຶ່ງ” ໃນວັນທີ 18 ມິຖຸນາ1965 ໄດ້ຕົກລົງແຍກຂະແໜງສາທາລະນະສຸກອອກເປັນ 2 ການຈັດຕັ້ງຄື: ເສນາຮັກເພື່ອຮັບໃຊ້ກອງທັບ ແລະ ສາທາລະນະສຸກສູນກາງ ເພື່ອຮັບໃຊ້ພົນລະເຮືອນ; ກອງປະຊຸມສາທາລະນະສຸກທົ່ວປະເທດ ຄັ້ງທີ II ວັນທີ 11 ມີນາ 1987, ທ່ານປະທານ ໄກສອນ ພົມວິຫານ ຜູ້ນໍາທີ່ແສນເຄົາລົບຮັກ ໄດ້ສະເໜີໃຫ້ຄະນະເລຂາທິການສູນກາງພັກ ແລະ ສະພາລັດຖະມົນຕີ ເລືອກເອົາມື້ໃດມື້ໜຶ່ງທີ່ມີຄວາມໝາຍປະຫວັດສາດເປັນ “ວັນແພດລາວ”. ຈາກແນວຄິດຊີ້ນໍາຂອງປະທານ ໄກສອນ ພົມວິຫານ ແລະ ເຫດຜົນທີ່ໄດ້ກ່າວມານັ້ນກະຊວງສາທາລະນະສຸກໄດ້ນໍາສະເໜີລັດຖະບານ ແລະ ສະພາແຫ່ງຊາດຊຸດທີ VII ແລະ ໄດ້ຮັບການເຫັນດີໃຫ້ບັນຈຸເຂົ້າໃນກົດໝາຍວ່າດ້ວຍການປິ່ນປົວ ສະບັບປັບປຸງ ເລກທີ 58/ສພຊ, ລົງວັນທີ 24 ທັນວາ 2014, ໝວດ 10 ມາດຕາ 76 ຊຶ່ງໄດ້ກໍານົດເອົາ ວັນທີ 18 ມິຖຸນາ ເປັນ “ວັນແພດລາວ” ແລະ ຕໍ່ມາຕາມກົດໝາຍວ່າດ້ວຍສາທາລະນະສຸກ ສະບັບເລກທີ 38/ສພຊ, ລົງວັນທີ 17 ກໍລະກົດ 2023 ພາກທີ IX ມາດຕາ 56 ລັດກຳນົດເອົາວັນແພດລາວ ວັນທີ 18 ມິຖຸນາ ເປັນ “ວັນສາທາລະນະສຸກ”. ການສະເຫຼີມສະຫຼອງວັນສາທາລະນະສຸກ 18 ມິຖຸນາເປັນການປູກຈິດສໍານຶກໃຫ້ແກ່ພະນັກງານແພດໝໍ, ພະຍາບານ, ພະນັກງານສາທາລະນະສຸກລາວຮຸ່ນສືບທອດໄດ້ຮໍ່າຮຽນເອົາແບບຢ່າງອັນດີງາມຂອງແພດໝໍ ແລະ ພະນັກງານສາທາລະນະສຸກຮຸ່ນກ່ອນ,ອອກແຮງຝຶກຝົນຫຼໍ່ຫຼອມສ້າງຕົນເອງໃຫ້ພຽບພ້ອມໄປດ້ວຍຄຸນສົມບັດ, ສິນທໍາປະຕິວັັດ, ຈັນຍາທໍາວິຊາຊີບ ແລະ ຄວາມຊໍານານງານດ້ານວິຊາສະເພາະເພື່ອເປັນນັກຮົບເສື້ອຂາວປະຕິວັດຂອງພັກ, ກາຍເປັນແພດແຫ່ງຊາດ ແລະ ແພດປະຊາຊົນຢ່າງສົມກຽດສັກສີ; ຄະນະພັກ, ຄະນະນໍາກະຊວງສາທາລະນະສຸກ ພ້ອມດ້ວຍພະນັກງານສາທາລະນະສຸກ ໃນທົ່ວປະເທດມີຄວາມເອກອ້າງທະນົງໃຈ, ມີຄວາມເບີກບານມ່ວນຊື່ນຕໍ່ການໝູນວຽນມາຂອງວັນແພດລາວ ຫຼື ວັນສາທາລະນະສຸກ.
 |
ທ່ານ ບຸນແຝງ ພູມມະໄລສິດ ໄດ້ສະແດງຄວາມຮູ້ບຸນຄຸນ ຕໍ່ຜູ້ນໍາພັກ-ລັດຮຸ່ນກ່ອນ ແລະ ຮຸ່ນປັດຈຸບັນທີ່ໄດ້ໃຫ້ການສຶກສາອົບຮົມພະນັກງານແພດໝໍ ພ້ອມທັງຊີ້ທິດເຍືອງທາງໃນການພັດທະນາວຽກງານສາທາລະນະສຸກ ນັບແຕ່ມື້ສ້າງຕັ້ງສາທາລະນະສຸກສູນກາງ ໃນວັນທີ 18 ມິຖຸນາ 1965 ມາເຖິງປັດຈຸບັນ. ສໍາລັບການສະເຫຼີມສະຫຼອງ ວັນສາທາລະນະສຸກໃນປີນີ້ໄດ້ແຈ້ງໃຫ້ຂະແໜງການສາທາລະນະສຸກ ນັບແຕ່ສູນກາງຮອດແຂວງ ແລະ ນະຄອນຫຼວງ ໃຫ້ມີການເຄື່ອນໄຫວວຽກ ເປັນຕົ້ນໃຫ້ຈັດຕັ້ງການໂຮມຊຸມນຸມເຜີຍແຜ່; ສະເຫຼີມສະຫຼອງວັນແພດລາວ ຫຼື ວັນສາທາລະນະສຸກ ໃຫ້ເປັນຂະບວນການຟົດຟື້ນ ແລະ ຈັດສໍາພາດຄວາມຮູ້ສຶກຂອງແພດຜູ້ອາວຸໂສ, ພະນັກງານຫຼັກແຫຼ່ງ, ຊ່ຽວຊານ, ບຸກຄົນ, ວຽກດີຄົນເດັ່ນ ແລະ ພະນັກງານບໍານານຕໍ່ວັນສາທາລະນະສຸກຜ່ານບັນດາສື່ມວນຊົນ; ໃຫ້ຈັດກິດຈະກໍາຕ່າງໆທີ່ເໝາະສົມເຊັ່ນ: ກວດສຸຂະພາບໃຫ້ຜູ້ສູງອາຍຸໂດຍບໍ່ເສຍຄ່າ, ສ້າງຂະບວນການທໍາລາຍແຫຼ່ງເພາະພັນຍຸງລາຍ ແລະ ອະນາໄມສາມສະອາດ, ຈັດກອງປະຊຸມວິຊາການແລະ ອື່ນໆ; ໃຫ້ຕິດຄໍາຂວັນ, ປ້າຍໂຄສະນາຢູ່ສໍານັກງານ ແລະ ສະຖານທີ່ບໍລິການສາທາລະນະສຸກນັບແຕ່ວັນທີ 14 ມິຖຸນາ 2025 ເປັນຕົ້ນໄປ; ສໍາລັບເນື້ອໃນຄໍາຂວັນ ແລະ ປ້າຍໂຄສະນາມີຄື: ຊົມເຊີຍວັນສາທາລະນະສຸກ ວັນທີ 18 ມິຖຸນາ ຢ່າງສຸດໃຈ; ໃຫ້ສົມທົບອໍານາດການປົກຄອງແຕ່ລະຂັ້ນໃນການປະສານງານ ແລະ ຈັດຕັ້ງປະຕິບັດສະເຫຼີມສະຫຼອງວັນສາທາລະນະສຸກໃຫ້ມີເນື້ອໃນ ແລະ ຄວາມໝາຍ, ມີການນໍາໃຊ້ງົບປະມານແບບປະຢັດມັດທະຍັດ ແລະ ຖືກຕ້ອງຕາມກົດໝາຍ ແລະ ລະບຽບການຕ່າງໆ.
ຕອນທ້າຍ, ທ່ານ ບຸນແຝງ ພູມມະໄລສິດ ໄດ້ຕາງໜ້າໃຫ້ຄະນະພັກ, ຄະນະນໍາ ແລະ ພະນັກງານ-ລັດຖະກອນສາທາລະນະສຸກ ຂໍອວຍພອນໃຫ້ແກ່ວັນສາທາລະນະສຸກ ເປັນວັນແຫ່ງຄວາມສາມັກຄີຮັກແພງ, ເປັນວັນທີ່ກະຕຸກຊຸກຍູ້ໃຫ້ພະນັກງານແພດໝໍ, ພະຍາບານ, ພະນັກງານສາທາລະນະສຸກລາວທຸກຄົນ ອອກແຮງຝຶກຝົນຫຼໍ່ຫຼອມພັດທະນາຕົນເອງໃຫ້ພຽບພ້ອມໄປດ້ວຍຄຸນສົມບັດສິນທໍາປະຕິວັັດ, ຈັນຍາບັນ-ຈັນຍາທໍາວິຊາຊີບ ແລະ ຄວາມຊໍານານງານດ້ານວິຊາສະເພາະ ເພື່ອສະໜອງການບໍລິການທີ່ມີຄຸນນະພາບ ແລະ ທົ່ວເຖິງ ແກ່ປະຊາຊົນລາວບັນດາເຜົ່າ ໃນຂອບເຂດທົ່ວປະເທດ ແລະ ອວຍພອນໄຊອັນປະເສີດ ໃຫ້ຜູ້ນໍາພັກ-ລັດ, ພະນັກງານ-ລັດຖະກອນ ສາທາລະນະສຸກທຸກສາຂາວິຊາຊີບ ຕະຫຼອດຮອດປະຊາຊົນລາວບັນດາເຜົ່າ ຈົ່ງມີສຸຂະພາບເຂັ້ມແຂງ, ພ້ອມກັນປະກອບສ່ວນຕາມບົດບາດຂອງຕົນ ໃນການພັດທະນາການແພດລາວ ໃຫ້ມີຄວາມກ້າວໜ້າ ແລະ ທັນສະໄໝຂຶ້ນໄປເລື້ອຍໆ.
ຊົມເຊີຍວັນສາທາລະນະສຸກວັນທີ 18 ມີຖຸນາຢ່າງສຸດໃຈ !
(ຂໍ້ມູນ: ກະຊວງສາທາລະນະສຸກ)
ຄໍາເຫັນ