 |
ອາກາດຮ້ອນເອົ້າເກີດມີອຸນຫະພູມສູງຈະສົ່ງກະທົບຕໍ່ສຸຂະພາບຂອງຄົນເຮົາເຊັ່ນ: ເຮັດໃຫ້ອິດເມື່ອຍ, ໄຂ້ແດດ ຫຼື ລົມແດດ, ເຈັບຫົວ, ປວດຮາກ, ຮາກ, ຫິວນໍ້າຫຼາຍ, ສັບສົນ ຫຼື ກະວົນກະວາຍ, ວິນຫົວ ແລະ ເຖິງຂັ້ນຮ້າຍແຮງ ຈະມີອາການຊັກ ຫຼື ໝົດສະຕິ ແລະ ເປັນຕະລາຍເຖິງຂັ້ນເສຍຊີວິດໄດ້. ດັ່ງນັ້ນ, ເຮົາທຸກຄົນຕ້ອງຮູ້ວິທີປ້ອງກັນຕົນເອງ ແລະ ຄົນໃນຄອບຄົວ ໂດຍສະເພາະຢູ່ພາຍໃນເຮືອນ ເພື່ອໃຫ້ອາກາດເຢັນລົງຄວນເປີດປ່ອງຢ້ຽມໃນຕອນກາງຄືນ, ປິດປ່ອງຢ້ຽມ ປ່ອງທີ່ຖືກກັບແສງແດດໂດນກົງໃນຕອນກາງເວັນ, ປິດອຸປະກອນໄຟຟ້າໃຫ້ຫຼາຍທີ່ສຸດເທົ່າທີ່ຈະເປັນໄປໄດ້, ຖ້າທ່ານໃຊ້ເຄື່ອງປັບອາກາດ ຫຼື ເປີດແອ ໃຫ້ປິດປະຕູ ແລະ ປ່ອງຢ້ຽມ ເພື່ອຊ່ວຍປະບັດພະລັງງານໄຟຟ້າ. ພ້ອມນັ້ນ, ຄວນຫຼີກລ່ຽງການອອກໄປນອກເຮືອນ ຫຼື ອາຄານ ແລະ ເຮັດກິດຈະກໍາໜັກໆເວລາອາກາດຮ້ອນສູງ, ພະຍາຍາມຊອກບ່ອນຢູ່ທີ່ຫຼີກເວັ້ນຈາກແສງແດດ ຄວນຢູ່ບ່ອນທີ່ມີຮົ່ມເຢັນ, ດື່ມນໍ້າເປັນປະຈໍາ ແລະ ດື່ມຊ້າໆ, ຫຼີກລ່ຽງດື່ມເຄື່ອງດື່ມທີ່ມີທາດນໍ້າຕານ, ທາດເຫຼົ້າ ຫຼື ສານຄາເຟອິນສູງ, ອາບນໍ້າເຢັນ, ໃຊ້ເຄື່ອງນຸ່ງທີ່ບາງ, ໃສ່ສະບາຍ, ຖ້າເປັນໄປໄດ້ໃຫ້ໃຊ້ເວລາ 2-3 ຊົ່ວໂມງ/ມື້ ຢູ່ບ່ອນທີ່ມີອາກາດເຢັນດີ ແລະ ອື່ນໆ.
 |
ເຖິງຢ່າງໃດກໍຕາມໃນແຕ່ລະມື້ຄວນຕິດຕາມເບິ່ງອາການຄົນອ້ອມຂ້າງ ລວມເຖິງຕົນເອງ ແລະ ສະມາຊິກໃນຄອບຄົວ ຫຼື ຮູ້ສຶກບໍ່ສະບາຍມີອາການ: ວິນຫົວ, ອ່ອນເພຍ, ກະວົນກະວາຍ, ຫິວນໍ້າຫຼາຍ, ເຈັບຫົວ ຕ້ອງໄປພົບແພດໝໍໃກ້ບ້ານທ່ານເຊັ່ນ: ໂຮງໝໍເມືອງ, ແຂວງ, ສູນກາງ, ສຸກສາລາ ແລະ ອື່ນໆ ທີ່ໃຫ້ບໍລິການດ່ວນທີ່ສຸດ.
 |
(ຂໍ້ມູນ: ກະຊວງສາທາລະນະສຸກ)
ຄໍາເຫັນ