 |
ໃນພິທີ, ທ່ານ ອາລຸນໄຊ ສູນນະລາດ ໄດ້ກ່າວວ່າ: ຍາມໃດ, ເວລາໃດ, ພັກລັດຖະບານລາວ ນັບແຕ່ຂັ້ນສູນກາງ ຮອດທ້ອງຖີ່ນ ກໍໄດ້ໃຫ້ຄວາມສຳຄັນໃນການສົ່ງເສີມການບໍລິຈາກເລືອດແບບສະໝັກໃຈ ບໍ່ຮຽກຮ້ອງສີ່ງຕອບແທນ, ເພື່ອຊ່ວຍຊີວິດຂອງເພື່ອນມະນຸດດ້ວຍກັນ. ສໍາລັບຄໍາຂວັນ ຂອງວັນຜູ້ບໍລິຈາກເລືອດໂລກປີນີ້, ໄດ້ຖືກກຳນົດຂື້ນ ຢ່າງມີຄວາມເປັນເອກະພາບໃນທົ່ວທຸກມຸມໂລກ ແລະມີຄວາມໝາຍວ່າ: “21 ປີ ແຫ່ງການສະເຫຼີມສະຫຼອງການໃຫ້, ໃຫ້ເລືອດ, ໃຫ້ຊີວິດ, ຂອບໃຈຜູ້ບໍລິຈາກເລືອດທຸກທ່ານ” (21 years of celebrating giving: thank you, blood donors! 14 June 2025).
 |
ການຈັດງານ ຄັ້ງນີ້, ເພື່ອສະເຫຼີມສະຫຼອງວັນຜູ້ບໍລິຈາກເລືອດໂລກ 14 ມິຖຸນາ ຮ່ວມກັບປະຊາຄົມໂລກໃຫ້ເປັນຂະບວນການທີ່ຟົດຟຶ້້ນ, ເປັນການສະແດງເຖີງຄວາມຮູ້ບຸນຄຸນ ຂອບອົກຂອບໃຈແກ່ຜູ້ບໍລິຈາກເລືອດທີ່ໄດ້ຊ່ວຍຊີວິດຂອງຄົນເຈັບ, ເພື່ອປູກຈິດສໍານຶກ, ການໂຄສະນາປຸກລະດົມໃຫ້ສັງຄົມ, ມວນຊົນທຸກຊັ້ນຄົນໃຫ້ປະກອບສວ່ນເຂົ້າໃນການບໍລິຈາກເລືອດແບບສະໝັກໃຈບໍ່ຮຽກຮ້ອງສີ່ງຕອບແທນໃຫ້ຫຼາຍຂຶ້ນ ແລະ ມີເລືອດສໍາຮອງໄວ້ໃນການຕອບສະໜອງແກ່ຄົນເຈັບໃຫ້ພຽງພໍ, ປອດໄພ ແລະ ທັນເວລາ. ຈາກນັ້ນ, ໃນພິທີຍັງໄດ້ມີການອະທິບາຍຄຸນປະໂຫຍດ ແລະ ຄວາມສຳຄັນຂອງເລືອດຕໍ່ຮ່າງກາຍຂອງຄົນເຮົາ. ປັດຈຸບັນໃນໂລກບໍ່ທັນມີໂຮງງານຜະລິດເລືອດໄດ້ ມີແຕ່ການໃຫ້ຈາກຄົນສູ່ຄົນເທົ່ານັ້ນ. ໃນພິທີຍັງມີການສະແດງສິລະປະວັນນະຄະດີ ເຊັ່ນ: ລໍາສີພັນດອນ, ລະຄອນເວທີ ທີ່ມີເນື້ອໃນສ່ອງແສງເຖິງຜົນດີໃນການບໍລິຈາກເລືອດ, ໄປພ້ອມໆກັບການຮັບບໍລິຈາກເລືອດ ໂດຍມີບຸກຄົນ ແລະ ການຈັດຕັ້ງເຂົ້າຮ່ວມທັງໝົດ 810 ຄົນ. ມີຜູ້ສະໝັກໃຈບໍລິຈາກເລືອດທັງໝົດ 170 ຄົນ ຍິງ 63 ຄົນ. ສາມາດບໍລິຈາກເລືອດຕົວຈິງໄດ້ 111 ຄົນ ຍິງ 35 ຄົນ.
(ຂ່າວ: ເກດສະໜາ ແກ້ວສຸວັນນະແສງ)
ຄໍາເຫັນ