ຈີນ​ ເລັ່ງ​ສ້າງ​ຄວາມ​ເຂັ້ມ​ແຂງ​ດ້ານ​ອິນ​ເຕີ​ເນັດ ​ເພື່ອ​ສ້າງ​ປະ​ໂຫຍດ​ໃຫ້​ແກ່​ປະ​ເທດ​ຊາດ ​ແລະ ສ້າງ​ຄວາມ​​ສຸກ​ໃຫ້ແກ່ປະ​ຊາ​ຊົນ

ໃນວັນທີ 19 ເມສາ 2016, ທ່ານ ສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນໄດ້ເປັນປະທານກອງປະຊຸມສົນທະນາວຽກງານຄວາມປອດໄພທາງອິນເຕີເນັດ ແລະ ເຕັກໂນໂລຊີຂໍ້ມູນຂ່າວສານ ພ້ອມທັງກ່າວຄຳປາໄສສຳຄັນໂດຍເນັ້ນໜັກໃຫ້ຊຸກຍູ້ການສ້າງສາປະເທດໃຫ້ເຂັ້ມແຂງດ້ານອິນເຕີເນັດ, ຊຸກຍູ້ການພັດທະນາວຽກງານຄວາມປອດໄພທາງອິນເຕີເນັດ ແລະ ເຕັກໂນໂລຊີຂໍ້ມູນຂ່າວສານ ເພື່ອເຮັດໃຫ້ອິນເຕີເນັດສ້າງຜົນປະໂຫຍດໃຫ້ແກ່ປະເທດຊາດ ແລະ ສ້າງຄວາມສຸກໃຫ້ແກ່ປະຊາຊົນຫຼາຍກວ່າເກົ່າ.

ພາຍໃຕ້ການຊີ້ນຳຢ່າງມີວິທະຍາສາດຈາກແນວຄວາມຄິດສຳຄັນຂອງທ່ານ ສີຈິ້ນຜິງ ກ່ຽວກັບປະເທດເຂັ້ມແຂງດ້ານອິນເຕີນັດ, ວຽກງານຄວມປອດໄພທາງອິນເຕີເນັດ ແລະ ເຕັກໂນໂລຊີຂໍ້ມູນຂ່າວສານຂອງຈີນໄດ້ຮັບຜົນສຳເລັດສຳຄັນອັນໃໝ່, ການສ້າງສາປະເທດໃຫ້ເຂັ້ມແຂງດ້ານອິນເຕີເນັດໄດ້ມີບາດກ້າວໃໝ່ຢ່າງໜັກແໜ້ນ.

ນັບແຕ່ຈີນປະຕິບັດແຜນພັດທະນາເສດຖະກິດ-ສັງຄົງແຫ່ງຊາດ 5 ປີ ຄັ້ງທີ14 (2021-2025) ເປັນຕົ້ນມາ, ເຕັກໂນໂລຊີຂໍ້ມູນຂ່າວສານມີບົດບາດພົ້ນເດັ່ນຂຶ້ນໃນການສ້າງຄວາມເຂັ້ມແຂງໃຫ້ແກ່ການພັດທະນາທີ່ມີຄຸນນະພາບສູງຄື: ຜົນສຳເລັດດ້ານການປະດິດສ້າງຕ່າງໆເຊັ່ນ: ການຄົ້ນຄວ້າລ່ວງໜ້າ ແລະ ການທົດລອງເຕັກນິກ 6G ໄດ້ຮັບການຊຸກຍູ້ຢ່າງໜັກແໜ້ນ, ວິທະຍາສາດເຕັກໂນໂລຊີກວັນຕຳ, ເຕັກໂນໂລຊີການເຊື່ອມຕໍ່ສະໝອງມະນຸດກັບຄອມພິວເຕີເປັນຕົ້ນໄດ້ປາກົດອອກຢ່າງບໍ່ຢຸດຢັ້ງ; ຈີນໄດ້ສ້າງສຳເລັດພື້ນຖານໂຄງລ່າງອິນເຕີເນັດຂະໜາດໃຫຍ່ທີ່ສຸດໃນໂລກ, ຍອດມູນຄ່າເສດຖະກິດດີຈີຕອນຄອງອັນດັບສອງຂອງໂລກໃນຫຼາຍປີຕິດຕໍ່ກັນ; ນະໂຍບາຍກ່ຽວກັບເຕັກໂນໂລຊີຂໍ້ມູນຂ່າວສານສ້າງຜົນປະໂຫຍດໃຫ້ປະຊາຊົນໄດ້ຮັບການລົງເລິກປະຕິບັດຢ່າງຕໍ່ເນື່ອງ, ການກໍ່ສ້າງດ້ານການບໍລິຫານລັດດ້ວຍເອເລັກໂຕຣນິກ ແລະ ຊົນນະບົດດີຈີຕອນໄດ້ຊຸກຍູ້ການປະຕິບັດເຂົ້າສູ່ລວງເລິກ.

ຖ້າຢາກພັດທະນາວຽກງານຄວາມປອດໄພທາງອິນເຕີເນັດ ແລະ ເຕັກໂນໂລຊີຂໍ້ມູນຂ່າວສານກໍຕ້ອງຜັນຂະຫຍາຍແນວຄິດການພັດທະນາທີ່ຖືປະຊາຊົນເປັນໃຈກາງ. ໃນກອງປະຊຸມສົນທະນາເມື່ອ 10 ປີກ່ອນ, ທ່ານ ສີຈິ້ນຜິງ ໄດ້ເນັ້ນໜັກວ່າ: “ສະໜອງການບໍລິການດ້ານຂໍ້ມູນຂ່າວສານທີ່ເປັນປະໂຫຍດ, ເຂົ້າເຖິງໄດ້ ແລະ ມີປະສິດທິຜົນໃຫ້ແກ່ປະຊາຊົນ, ເຮັດໃຫ້ປະຊາຊົນນັບເປັນຕື້ຄົນມີຄວາມຮູ້ສຶກໄດ້ຮັບຜົນປະໂຫຍດຫຼາຍຂຶ້ນໃນການຮ່ວມກັນຊົມໃຊ້ໝາກຜົນຂອງການພັດທະນາອິນເຕີເນັດ.”

ຈີນ ໄດ້ສ້າງເວທີແລກປ່ຽນຂໍ້ມູນທີ່ເປັນການເຊື່ອມຕໍ່ອິນເຕີເນັດຫຼາຍຊັ້ນ ແລະ ເປັນເອກະພາບກັນໃນທົ່ວປະເທດ, ຜ່ານຈາກການ “ໃຊ້ຂໍ້ມູນໃຫ້ຫຼາຍເພື່ອບັນລຸເປົ້າໝາຍຫຼຸດການແລ່ນເອກະສານຂອງປະຊາຊົນໃຫ້ໜ້ອຍລົງ”; “ອິນເຕີເນັດ+” ໄດ້ເຊື່ອມໂຍງເຂົ້າກັບຫຼາຍຂົງເຂດເຊັ່ນ: ການສຶກສາ, ການລ້ຽງດູຜູ້ເຖົ້າເປັນຕົ້ນ; ຜະລິດຕະພັນໃໝ່ ແລະ ຮູບແບບທຸລະກິດໃໝ່ດ້ານອິນເຕີເນັດເຊັ່ນ: ເສດຖະກິດແບ່ງປັນ, ການອອກເດີນທາງແບບອັດສະລິຍະ, ການຊຳລະເງິນແບບເຄື່ອນທີ່ (mobile payment) ເປັນຕົ້ນໄດ້ປະກົດອອກຢ່າງບໍ່ຢຸດຢັ້ງ…ວຽກງານຄວາມປອດໄພທາງອິນເຕີເນັດ ແລະ ເຕັກໂນໂລຊີຂໍ້ມູນຂ່າວສານຂອງຈີນໄດ້ສຸມໃສ່ການແກ້ໄຂຈຸດອ່ອນດ້ານຊີວິດການເປັນຢູ່ຂອງປະຊາຊົນ, ປັບປຸງການບໍລິການສາທາລະນະໃຫ້ດີຂຶ້ນ, ການບໍລິການດ້ານຂໍ້ມູນຂ່າວສານທີ່ເປັນປະໂຫຍດ, ເຂົ້າເຖິງໄດ້ ແລະ ມີປະສິດທິຜົນນັ້ນກຳລັງສ້າງຜົນປະໂຫຍດ ແລະ ສ້າງຄວາມສຸກໃຫ້ແກ່ປະຊາຊົນຫຼາຍກວ່າເກົ່າ.

ວັນທີ 1 ມິຖຸນາ 2017, ກົດໝາຍວ່າດ້ວຍຄວາມປອດໄພທາງອິນເຕີເນັດສາທາລະນະລັດ ປະຊາຊົນຈີນ ໄດ້ຖືກປະກາດໃຊ້ຢ່າງເປັນທາງການ.

ຊຸມປີຜ່ານມານີ້, ສະພາບທາງອິນເຕີເນັດຂອງຈີນມີທ່າອ່ຽງຂະຫຍາຍຕົວໄປສູ່ທິດທາງທີ່ດີ ແລະ ປອດໃສຫຼາຍຂຶ້ນກວ່າເກົ່າ, ກຳແພງປ້ອງກັນຄວາມປອດໄພທາງອິນເຕີເນັດແຫ່ງຊາດໝັ້ນແກ່ນກວ່າເກົ່າ, ປະຊາຊົນຈຳນວນມະຫາສານມີຄວາມຮູ້ສຶກວ່າໄດ້ຮັບຜົນປະໂຫຍດ, ມີຄວາມສຸກ ແລະ ມີຄວາມປອດໄພເພີ່ມຂຶ້ນຢ່າງບໍ່ຢຸດຢັ້ງໃນໂລກອອນລາຍ.

ເດືອນທັນວາ ປີ 2015, ໃນກອງປະຊຸມອິນເຕີເນັດໂລກຄັ້ງທີ 2 ທີ່ຈັດຂຶ້ນຢູ່ຕາແສງອູ່ເຈີ້ນ ແຂວງເຈີ້ຈ່ຽງ ຈີນ ຊຶ່ງເປັນສະຖານທີ່ຖາວອນ ສຳລັບການຈັດກອງປະຊຸມອິນເຕີເນັດໂລກ, ທ່ານ ສີຈິ້ນຜິງ ໄດ້ສະເໜີແນວຄວາມຄິດສຳຄັນກ່ຽວກັບ “ການສ້າງປະຊາຄົມຮ່ວມຊາຕາກຳທາງອິນເຕີເນັດ” ຢ່າງປະດິດສ້າງ.

ໃນໄລຍະປະຕິບັດແຜນການ 5 ປີ ຄັ້ງທີ 14, ພາຍໃຕ້ການຊີ້ນຳ-ນຳພາຈາກແນວຄວາມຄິດດັ່ງກ່າວ, ຈີນໄດ້ມີສ່ວນຮ່ວມຢ່າງເລິກເຊິ່ງ ແລະ ຊຸກຍູ້ການຄຸ້ມຄອງສາກົນທາງອິນເຕີເນັດ, ສະເໜີ “ຂໍ້ລິເລີ່ມການບໍລິຫານປັນຍາປະດິດທົ່ວໂລກ” ແລະ “ຂໍ້ລິເລີ່ມການຮ່ວມມືດ້ານການໄຫຼວຽນຂອງຂໍ້ມູນຂ້າມຊາຍແດນທົ່ວໂລກ” ແລະ ອື່ນໆ, ກອງປະຊຸມອິນເຕີເນັດໂລກ ຊຶ່ງເປັນອົງການຈັດຕັ້ງສາກົນໄດ້ຮັບການຈັດຕັ້ງຂຶ້ນ ພ້ອມທັງປະຕິບັດງານຢ່າງມີປະສິດທິພາບສູງ, ເຮັດໃຫ້ການພົວພັນຄູ່ຮ່ວມມືທົ່ວໂລກທາງອິນເຕີເນັດ ໄດ້ຂະຫຍາຍຕົວຢ່າງຮອບດ້ານ, ແນວຄວາມຄິດຂອງຈີນໄດ້ເປັນທີ່ຍອມຮັບຢ່າງກວ້າງຂວາງຈາກປະຊາຄົມໂລກ.

ຢູ່ອາຊີຕາເວັນອອກສ່ຽງໃຕ້, ວິສາຫະກິດຈີນ ໄດ້ປະກອບສ່ວນເຂົ້າໃນການສ້າງໂຮງໝໍອັດສະລິຍະ 5G ແຫ່ງທຳອິດຂອງອາຊຽນ; ຢູ່ອາເມຣິກາລາຕິນ, “ເສັ້ນທາງສາຍໃໝດິີຈີຕອນ” ໄດ້ເຊື່ອມສານເຂົ້າໃນການພັດທະນາ ດ້ວຍການປະດິດສ້າງຂອງທ້ອງຖິ່ນດັ່ງກ່າວ… ຜ່ານຈາກການແບ່ງປັນບົດຮຽນການພັດທະນາ, ເພີ່ມທະວີການຮ່ວມມືດ້ານເຕັກໂນໂລຊີ, ຈີນໄດ້ຈັບມືກັບບັນດາປະເທດໃນໂລກ ກ້າວໄປສູ່ຍຸກດີຈີຕອນທີ່ດີງາມກວ່າເກົ່າ.

ແຜນພັດທະນາເສດຖະກິດ-ສັງຄົງແຫ່ງຊາດ 5 ປີຄັ້ງທີ 15 (2026-2030) ຂອງຈີນໄດ້ກຳນົດແຜນຍຸດທະສາດຢ່າງລະອຽດເຊັ່ນ: “ບົ່ມເພາະ ແລະ ພັດທະນາອຸດສາຫະກຳພັດທະນາໃໝ່ ແລະ ອຸດສາຫະກຳລ້ຳຍຸກໃຫ້ເຕີບໃຫຍ່ຂະຫຍາຍຕົວ”, “ຊຸກຍູ້ການເສີມສ້າງຄວາມເຂັ້ມແຂງດ້ວຍເຕັກໂນໂລຊີດີຈີຕອນ ແລະ ອັດສະລິຍະຢ່າງຮອບດ້ານ” ເປັນຕົ້ນ, ພ້ອມທັງເນັ້ນໜັກຢ່າງຊັດເຈນວ່າ “ເລັ່ງສ້າງປະເທດໃຫ້ເຂັ້ມແຂງດ້ານອິນເຕີເນັດ.”

ເມື່ອຢືນຢູ່ຈຸດເລີ່ມຕົ້ນໃໝ່ໃນປະຫວັດສາດ, ຈີນຈະອອກແຮງຊຸກຍູ້ການພັດທະນາວຽກງານຄວາມປອດໄພທາງອິນເຕີເນັດ ແລະ ເຕັກໂນໂລຊີຂໍ້ມູນຂ່າວສານຢ່າງມີຄຸນນະພາບສູງ, ເພື່ອຂຽນປະຫວັດສາດໜ້າໃໝ່ທີ່ສະຫງ່າລາສີກວ່າເກົ່າບົນຂະບວນການໃໝ່ແຫ່ງການສ້າງສາປະເທດໃຫ້ເຂັ້ມແຂງ ແລະ ຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງປະຊາຊາດຈີນ.