ຈີນ​ ທີ່​ໝັ້ນ​ຄົງ​ຈະ​ເປັນ​ພອນ​ໃຫ້​ແກ່​ໂລກ

ຈີນ ມີຫຼັກໝັ້ນເດັດດ່ຽວໃນການປົກປ້ອງການປົກຄອງຕາມກົດໝາຍສາກົນ ແລະ ຄັດຄ້ານລັດທິມະຫາອຳນາດ. ໃນຖານະເປັນປະເທດໃຫຍ່ທີ່ມີນ້ຳໃຈຮັບຜິດຊອບ, ຈີນມີຈຸດຢືນໃນການປົກປ້ອງຖານະແກນກາງຂອງອົງການສະຫະປະຊາຊາດ, ປົກປ້ອງໝາກຜົນແຫ່ງໄຊຊະນະຂອງສົງຄາມໂລກຄັ້ງທີ 2 ແລະ ສ້າງໂລກທີ່ມີຫຼາຍຂົ້ວທີ່ສະເໝີພາບ ແລະ ເປັນລະບຽບຮຽບຮ້ອຍ. ເດືອນກັນຍາປີກາຍນີ້, ທ່ານ ສີຈິ້ນຜິງ ປະທານປະເທດຈີນໄດ້ສະເໜີຂໍ້ລິເລີ່ມວ່າດ້ວຍການບໍລິຫານທົ່ວໂລກໃນກອງປະຊຸມສຸດຍອດຂອງອົງການຮ່ວມມືຊຽງໄຮ້ ທີ່ຈັດຂຶ້ນຢູ່ນະຄອນທ່ຽນສິນຂອງຈີນໂດຍກ່າວເນັ້ນໜັກເຖິງ 5 ຫຼັກການສຳຄັນຄື: ຄວາມສະເໝີພາບດ້ານອະທິປະໄຕ, ການປົກປ້ອງສາກົນດ້ວຍກົດໝາຍ, ລັດທິຫຼາຍຝ່າຍ, ຖືຄົນເປັນກົກແລະ ຖືການເຄື່ອນໄຫວເປັນການນຳພາ ຊຶ່ງໄດ້ຊີ້ທິດເຍືອງທາງໃຫ້ແກ່ການປັບປຸງການບໍລິຫານທົ່ວໂລກໃຫ້ສົມບູນຂຶ້ນ ແລະ ໄດ້ຮັບການສະໜັບສະໜູນຢ່າງວ່ອງໄວຈາກ 150 ກວ່າປະເທດ ແລະ ອົງການຈັດຕັ້ງສາກົນ.

ໃນຂະນະດຽວກັນ, ຈີນ ໄດ້ພະຍາຍາມຢ່າງບໍ່ລົດລະເພື່ອຊຸກຍູ້ການພັດທະນາຮ່ວມກັນ ແລະ ຕໍ່ຕ້ານລັດທິປົກປ້ອງການຄ້າ. ໃນໄລຍະ 5 ປີຜ່ານມາ, ຈັງຫວະການເຕີບໂຕດ້ານເສດຖະກິດຂອງຈີນສະເລ່ຍ 5.4% ຕໍ່ປີ, ອັດຕາປະກອບສ່ວນຕໍ່ການເຕີບໂຕຂອງເສດຖະກິດໂລກໄດ້ຮັກສາຢູ່ທີ່ປະມານ 30% ຊຶ່ງຫຼາຍກວ່າຜົນລວມຂອງກຸ່ມ 7 ປະເທດຕາເວັນຕົກ. ໃນ 5 ປີຂ້າງໜ້ານີ້, ຈີນຈະສືບຕໍ່ຊຸກຍູ້ການເປີດປະຕູສູ່ພາຍນອກໃນລະດັບສູງຢ່າງຕໍ່ເນື່ອງ, ເປັນ “ໂຮງງານໂລກ” ທີ່ດີ ແລະ ກໍເປັນ “ຕະຫຼາດໂລກ” ເຊັ່ນດຽວກັນ ເພື່ອສືບຕໍ່ເປັນພະລັງຂັບເຄື່ອນທີ່ໝັ້ນທ່ຽງທີ່ສຸດສຳລັບການເຕີບໂຕຂອງເສດຖະກິດໂລກ.

ໃນປີໃໝ່ນີ້, ຜູ້ນຳສູງສຸດຂອງຈີນຈະເດີນທາງໄປຢ້ຽມຢາມຫຼາຍປະເທດທີ່ສຳຄັນ, ການພົວພັນລະຫວ່າງຈີນ-ອາເມຣິກາ ຈະກ້າວເຂົ້າສູ່ “ປີສຳຄັນ” ເຊັ່ນດຽວກັນ, ຈີນຈະເປັນເຈົ້າພາບຈັດກອງປະຊຸມບໍ່ເປັນທາງການຂອງຜູ້ນຳເອເປັກຄັ້ງທີ 33 ແລະ ກອງປະຊຸມສຸດຍອດຈີນ-ປະເທດອາຣັບ ຄັ້ງທີ 2… ໃນໂລກທີ່ເຕັມໄປດ້ວຍຄວາມປັ່ນປ່ວນວຸ່ນວາຍ, ຈີນທີ່ໝັ້ນຄົງບໍ່ພຽງແຕ່ຈະເປັນພອນໃຫ້ແກ່ປະຊາຊົນຈີນເທົ່ານັ້ນ, ກໍຍັງເປັນພອນໃຫ້ແກ່ປະຊາຊົນໂລກອີກດ້ວຍ.