 |
ສຳລັບດັດຊະນີຄຸນນະພາບອາກາດ (AQI) ຈະມີຫຼາຍລະດັບທີ່ບົ່ງບອກເຖິງມົນລະພິດທາງອາກາດ ຊຶ່ງຄວາມອັນຕະລາຍ ແລະ ວິທີປ້ອງກັນຂອງຄົນແຕ່ລະກຸ່ມກໍເຊັ່ນດຽວກັນ. ດັ່ງນັ້ນ, ກຸ່ມທີ່ມີຄວາມສ່ຽງສູງ: ຖ້າຄ່າຂອງດັດຊະນີຄຸນນະພາບອາກາດສູງເກີນກວ່າ 51, ທ່ານຄວນຫຼຸດຜ່ອນການໃຊ້ເວລາອອກໄປກາງແຈ້ງ, ໃສ່ຜ້າອັດປາກ-ດັງ N95, ຖ້າມີເງື່ອນໄຂຄວນໃຊ້ເຄືອງຟອກອາກາດພາຍໃນເຮືອນ ແລະ ຄວນເຮັດຄວາມສະອາດປ່ຽນແຜງຟອກອາກາດ ເພື່ອໃຫ້ແນ່ໃຈວ່າເຄື່ອງນັ້ນຍັງເຮັດວຽກໄດ້ດີ; ຫຼີກລ່ຽງພື້ນທີ່ໆມີການສັນຈອນໜາແໜ້ນ, ເຂດທີ່ມີຝຸ່ນລະອອງໃນການກໍ່ສ້າງ, ເຂດທີ່ມີການເຜົາໄໝ້; ຄວນໄປໃຊ້ຖະໜົນ ແລະ ເສັ້ນທາງທີ່ບໍ່ມີການຈາລາຈອນແອອັດ ຫຼື ໄລຍະລົດແລ່ນບໍ່ຫຼາຍ ເພື່ອຫຼີກລ່ຽງມົນລະພິດຈາກການສັນຈອນ. ສິ່ງສໍາຄັນເມື່ອມີອາການຫາຍໃຈຍາກ, ວິນຫົວ-ປວດຮາກ, ເຈັບໜ້າເອິກ, ອາການລະຄາຍເຄືອງຕາ ແລະ ຄໍຢ່າງຮຸນແຮງໃຫ້ໄປປຶກສາແພດ ຫຼື ໄປໂຮງໝໍໃກ້ບ້ານທ່ານໂດຍດ່ວນ.
 |
ໃນປີ 2019 ໃນທົ່ວໂລກ ມີຜູ້ເສຍຊີວິດກ່ອນໄວອັນຄວນຍ້ອນມົນລະພິດທາງອາກາດ 4.2 ລ້ານຄົນ. ມົນລະພິດທາງອາກາດເກີດຈາກການເຜົາໄໝ້ການກະສິກໍາ ແລະ ການຈູດຂີ້ເຫຍື້ອ, ຄວັນຈາກໂຮງຈັກໂຮງງານ ແລະ ອື່ນໆ ທັງຢູ່ໃນເມືອງ ແລະ ເຂດຊົນນະບົດ ຈຶ່ງເຮັດໃຫ້ມີຄວາມສ່ຽງສູງ ສົ່ງຜົນກະທົບຕໍ່ສຸຂະພາບຄົນເຮົາ ແລະ ຍັງເປັນສ່ວນໜຶ່ງເຮັດໃຫ້ມີການປ່ຽນແປງສະພາບດິນຟ້າອາກາດ.
 |
 |
(ຂໍ້ມູນ: ກະຊວງສາທາລະນະສຸກ)
ຄໍາເຫັນ