ຫາລືວຽກງານຫັນໂຮງໝໍເປັນເຈົ້າຕົນເອງ

ກອງປະຊຸມຄັ້ງນີ້, ຈັດຂຶ້ນເພື່ອປຶກສາຫາລືກ່ຽວກັບການຫັນໂຮງໝໍຂັ້ນສູນກາງ ແລະ ໂຮງໝໍແຂວງເປັນເຈົ້າຕົນເອງ ພ້ອມທັງຮັບຟັງຜົນສຳເລັດ ສິ່ງທ້າທາຍ ແລະ ບົດຮຽນທີ່ຖອດຖອນໄດ້ຈາກການຫັນ 3 ໂຮງໝໍສູນກາງຄື: ໂຮງໝໍມະໂຫສົດ, ເສດຖາທິລາດ ແລະ ໂຮງໝໍມິດຕະພາບ ທີ່ທົດລອງປະຕິບັດມາແລ້ວ ເປັນຕົ້ນຜູ້ເຂົ້າຮ່ວມໄດ້ຮັບຟັງການມີຄຳເຫັນຂອງທ່ານລັດຖະມົນຕີ. ຈາກນັ້ນ, ຮັບຟັງການນໍາສະເໜີກ່ຽວກັບຄວາມໝາຍ-ຄວາມຄາດຫວັງຂອງກະຊວງສາທາລະນະສຸກໃນການຫັນໂຮງໝໍເປັນເຈົ້າຕົນເອງ ດຳລັດວ່າດ້ວຍການຫັນຫົວໜ່ວຍວິຊາການເປັນເຈົ້າຕົນເອງ ລາຍງານສະພາບການຈັດຕັ້ງປະຕິບັດການເຮັດທົດລອງຫັນໂຮງໝໍເປັນເຈົ້າຕົນເອງຂອງໂຮງໝໍມະໂຫສົດ, ເສດຖາທິລາດ ແລະ ໂຮງໝໍມິດຕະພາບ, ຂັ້ນຕອນການສ້າງຄວາມກົມກຽວໃນການເຮັດທົດລອງ, ຂັ້ນຕອນໃນເບື້ອງຕົ້ນ ແລະ ການເລັ່ງວຽກງານຫັນໂຮງໝໍເປັນເຈົ້າຕົນເອງ, ນໍາສະເໜີນິຕິກຳ ແລະ ກົດລະບຽບດ້ານການເງິນທີ່ກ່ຽວຂ້ອງກັບການຫັນຫົວໜ່ວຍວິຊາການມາເປັນເຈົ້າຕົນເອງ, ການປ່ຽນຖ່າຍດ້ານຊັບພະຍາກອນມະນຸດ, ຈັດຕັ້ງພະນັກງານທີ່ກ່ຽວຂ້ອງກັບການຫັນຫົວໜ່ວຍວິຊາການເປັນເຈົ້າຕົນເອງຂອງໂຮງໝໍ ແລະ ອື່ນໆ.

ປັດຈຸບັນ, ກະຊວງສາທາລະນະສຸກກຳລັງກະກຽມຫັນ 2 ໂຮງໝໍສູນກາງ ແລະ 10 ໂຮງໝໍແຂວງເປັນເຈົ້າຕົນເອງ. ດັ່ງນັ້ນ, ການຈັດກອງປະຊຸມຄັ້ງນີ້, ໄດ້ມີການແລກປ່ຽນບົດຮຽນ ແລະ ປະສົບການທີ່ຈັດຕັ້ງປະຕິບັດໃນຜ່ານມາຂອງກົມກ່ຽວຂ້ອງກໍຄື 3 ໂຮງໝໍສູນກາງ ເພື່ອໃຫ້ເຫັນດ້ານດີ, ດ້ານສະດວກ ແລະ ສິ່ງທ້າທາຍຕ່າງໆ ເພື່ອພ້ອມກັນປັບປຸງແກ້ໄຂ ແລະ ເປັນບົດຮຽນນຳໄປຈັດຕັ້ງປະຕິບັດໃຫ້ບັນດາໂຮງໝໍທີ່ກຳລັງກະກຽມຫັນໄປເປັນເຈົ້າຕົນເອງໃນອະນາຄົດມີຜົນສຳເລັດເປັນກ້າວໆ. ຂ່າວ: ວຽງຈັນໃໝ່