ຫັນໂຮງໝໍມິດຕະພາບເປັນເຈົ້າຕົນເອງ ຍົກສູງຄຸນນະພາບການບໍລິການ-ຄວາມຍືນຍົງຮັບໃຊ້ສັງຄົມ

ທ່ານ ສອນໄຊ ລາດຊະວົງ ຍັງໃຫ້ຮູ້ຄວາມຈຳເປັນຂອງການຫັນໂຮງໝໍມິດຕະພາບ ໄປສູ່ການກຸ້ມຕົນເອງ ຕາມທິດທາງຂອງລັດຖະບານ ໂດຍມີຈຸດປະສົງເພື່ອຍົກສູງຄຸນນະພາບການບໍລິການໃຫ້ຄົນເຈັບ ກໍຄືຜູ້ມາຮັບການບໍລິການປົກກະຕິ ແລະ ທົ່ວໄປ; ເພື່ອໃຫ້ການນຳໃຊ້ຊັບພະຍາກອນທີ່ມີໃຫ້ເກີດປະສິດທິພາບ, ປະສິດທິຜົນຫຼາຍຂຶ້ນ ແລະ ມີຄວາມຍືນຍົງ; ເພື່ອສ້າງລາຍຮັບຈາກຄົນເຈັບວີໄອພີ/ສ້າງຄວາມເຊື່ອໝັ້ນ-ຄວາມໝັ້ນໃຈ ທີ່ຈະເປັນການດຶງດູດຄົນເຈັບຜູ້ທີ່ມີຄວາມສາມາດ ແລະ ເງື່ອນໄຂໄປໂຮງໝໍເອກະຊົນ/ ຄລີນິກເອກະຊົນໃນລາວ ຫຼື ຕ່າງປະເທດ ໃຫ້ກັບເຂົ້າມາໃຊ້ບໍລິການ ທີ່ໂຮງໝໍລັດ; ເພີ່ມການບໍລິການບົ່ມຊ້ອນການບໍລິການທີ່ເປັນທາງເລືອກ ທີ່ຈະເປັນການສ້າງລາຍຮັບຈາກຜູ້ທີ່ມີຄວາມສາມາດ ມີເງື່ອນໄຂຈ່າຍໄດ້ ຈະເຮັດໃຫ້ໂຮງໝໍມີລາຍຮັບເພີ່ມຂຶ້ນ ເພື່ອມາພັດທະນາໂຮງໝໍ ແລະ ຊຸກຍູ້-ຈູງໃຈພະນັກງານໃນໂຮງໝໍ ໃຫ້ມີລາຍຮັບເພີ່ມ ແລະ ມີຊີວິການເປັນຢູ່ດີຂຶ້ນ; ເພື່ອຫຼຸດຜ່ອນການສະໜອງງົບປະມານພາກປົກກະຕິຈາກລັດ ຖະບານ; ການຫັນໂຮງໝໍເປັນເຈົ້າຕົນເອງໄປສູ່ການກຸ້ມຕົນເອງ ຕາມທິດທາງຂອງລັດຖະບານ ໂດຍອີງໃສ່ແນວທາງຂອງພັກທີ່ມີຫຼາຍບັນດານິຕິກຳອັນທີ່ສຳຄັນຫຼາຍ ແມ່ນພັກໄດ້ອອກມະຕິເລກທີ 04/ກມສພ. ນະຄອນຫຼວງວຽງຈັນ, ວັນທີ 11 ເມສາ 2024 ວ່າດ້ວຍການສ້າງເສດຖະກິດເອກະລາດ ເປັນເຈົ້າຕົນເອງໃນໄລຍະໃໝ່. ພ້ອມດຽວກັນນັ້ນ, ທ່ານ ທອງລຸນ ສີສຸລິດ ເລຂາທິການໃຫຍ່ພັກປະຊາຊົນ ປະຕິວັດລາວ ໄດ້ກ່າວໃນກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກປະຊາຊົນ ປະຕິວັດລາວ ຢ່າງລະອຽດ ໄດ້ມີທິດຊີ້ນໍາ ເຮັດແນວໃດ ເພື່ອໃຫ້ມີການຜັນຂະຫຍາຍ ແລະ ການຈັດຕັ້ງປະຕິບັດໃຫ້ເປັນຮູບປະທຳ. ນອກຈາກນີ້, ກໍມີບັນດານິຕິກຳຂອງລັດ ຫຼາຍສະບັບທີ່ເປັນບ່ອນອີງໃຫ້ຫົວໜ່ວຍບໍລິຫານລັດ ທີ່ມີລາຍຮັບວິຊາການໃຫ້ສາມາດເຮັດການບໍລິການ, ບໍລິຫານ ແລະ ຄຸ້ມຄອງ ຈັດສັນງົບປະມານຈາກລາຍຮັບວິຊາການຕາມລະບຽບ ແລະ ວິໃນການເງິນຢ່າງເຂັ້ມງວດ ດ້ວຍຄວາມຮັບຜິດຊອບສູງ. ໂຮງໝໍມິດຕະພາບກຳລັງສຶກສາຄົ້ນຄວ້າຮຽນຮູ້ວິທີການເປັນເຈົ້າຕົນເອງ ສ້າງເສດຖະກິດຕະຫຼາດຕາມທິດສັງຄົມນິຍົມ, ພັດທະ ນາເສດຖະກິດເປັນເຈົ້າຕົນເອງ, ເພິ່ງຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ທີ່ກຳນົດອອກໃນມະຕິ ຂອງຄະນະບໍລິຫານງານສູນກາງພັກ ສະບັບເລກທີ 05/ຄບສພ. ພ້ອມນັ້ນ, ການຫັນປ່ຽນນີ້ຈະສົ່ງຜົນດີຕໍ່ຄຸນນະພາບການປິ່ນປົວ ແລະ ການບໍລິການຄົນເຈັບໃຫ້ດີຂຶ້ນກວ່າເກົ່າ ເປັນຕົ້ນພະນັກງານໃນໂຮງໝໍທັງໝົດຕ້ອງເອົາຄົນເຈັບເປັນໃຈກາງ; ມີຄູ່ມືຕິດຕາມກວດກາ ແລະ ປະຕິບັດໜ້າທີ່ ໃນການດູແລ-ເບິ່ງແຍງ, ບໍລິ ການປິ່ນປົວຄົນເຈັບຂອງພວກເຮົາ; ໄດ້ປັບປຸງເຊັ່ນ: ເພີ່ມການບໍລິການທາງການແພດ, ການບໍລິການທີ່ເປັນທາງເລືອກໃນພະແນກສຸກເສີນ, ກວດເຂດນອກ ແລະ ບາງພະແນກຕຶກນອນ; ໄດ້ເພີ່ມການບໍລິການນອກໂມງໃນບັນດາພະແນກທີ່ຈຳເປັນ ແລະ ມີເງື່ອນໄຂສາມາດເຮັດໄດ້ຈຳນວນໜຶ່ງ ທີ່ເຫັນວ່າເປັນທ່າແຮງໃນການສ້າງລາຍຮັບເຊັ່ນ: ການບໍລິການກວດເຂດນອກ, ກວດສຸກເສີນພິເສດ, ການຜ່າຕັດນອກໂມງ, ໃນທ້າຍອາທິດ ແລະ ອື່ນໆ; ຊຸກຍູ້ພະນັກງານເອົາໃຈໃສ່ຢ່າງແຂງແຮງ ແລະ ເຂັ້ມງວດ ໃນການປະຕິບັດໜ້າທີ່ຕາມນະໂຍບາຍ 5 ດີ 1 ພໍໃຈ (5W1S) ແລະ ອື່ນໆ.

ທ່ານ ສອນໄຊ ລາດຊະວົງ ກ່າວຕື່ມວ່າ: ໃນ 5 ປີຕໍ່ໜ້າ ການຫັນໂຮງໝໍກຸ້ມຕົນເອງຈະສ້າງໃຫ້ສັງຄົມເຊື່ອໝັ້ນຕໍ່ທຸກຮູບແບບການບໍລິການຂອງໂຮງໝໍ ໃນຂະບວນການກວດ, ການບົ່ງມະຕິ ແລະ ປິ່ນປົວພະຍາດທີ່ດີເລີດ; ເພີ່ມສິດ, ບົດບາດອຳນາດ, ຄວາມມີອິດສະຫຼະໃນການຕັດສິນໃຈ ແລະ ດຳເນີນການຈັດ ຕັ້ງປະຕິບັດການເຄື່ອນໄຫວໂຮງໝໍພາຍໃຕ້ລະບຽບກົດໝາຍ ແລະ ນິຕິກຳຕ່າງໆ ໂດຍຄະນະຜູ້ບໍລິຫານໂຮງໝໍເອງຢ່າງເຕັມຮູບແບບ ແລະ ເປັນເອກະລາດຢ່າງເຕັມສ່ວນ ຄືກັບໂຮງໝໍລັດບາງແຫ່ງຢູ່ປະເທດໃກ້ຄຽງ ແລະ ປະເທດອື່ນໆ. ພ້ອມນັ້ນ, ການຫັນເປັນໂຮງໝໍກຸ້ມຕົນເອງ ບໍ່ແມ່ນການຫັນເປັນທຸລະກິດເອກະຊົນ 100% ແຕ່ແມ່ນການບໍລິຫານຄືວິສາຫະກິດ ເປົ້າໝາຍເພື່ອໃຫ້ໂຮງໝໍລັດມີຄວາມຍືນຍົງ ບໍ່ຕັ້ງເກນຫາກໍາໄລໃນໂຮງໝໍລັດເປັນຫຼັກ ແລະ ຍັງປະຕິບັດພາລະບົດບາດທຸກຢ່າງຂອງໂຮງໝໍລັດ ລວມທັງການເຄື່ອນໄຫວດໍາເນີນງານ ທຸກຢ່າງລັດຍັງມີບົດບາດໃນການກຳກັບຕິດຕາມ, ກວດກາ ເພື່ອໃຫ້ຄ່າບໍລິການເໝາະສົມ ແລະ ສົມເຫດສົມຜົນ. ສຳລັບຄົນເຈັບທົ່ວໄປ ລວມທັງປະຊາຊົນຜູ້ມີລາຍຮັບຕ່ຳ ກໍສາມາດເຂົ້າເຖິງການບໍລິການໄດ້. ສິ່ງສໍາຄັນ ຕະຫຼອດໄລຍະຜ່ານມາ, ໂຮງໝໍມິດຕະພາບ ຍັງໄດ້ໃຫ້ການຊ່ວຍເຫຼືອສັງຄົມ ເປັນຕົ້ນໃຫ້ການບໍລິການດູແລ ປິ່ນປົວຄົນທຸກຍາກ, ອານາຖາ ລວມທັງຜູ້ທີ່ບໍ່ມີຍາດພີ່ນ້ອງປະມານ 450 ລ້ານ ຫາ 500 ລ້ານກີບ/ປີ.