 |
ສະຫາຍ ພັນເອກ ຍຸຄອນ ຜາລີເພັງ ໄດ້ຫວນຄືນປະຫວັດຄວາມເປັນມາຂອງວັນນັກຮົບເສຍອົງຄະ ແລະ ເສຍສະຫຼະຊີວິດ ເພື່ອປະເທດຊາດວ່າ: ວັນທີ 21 ມີນາ 1946 ເປັນວັນທີ່ພວກຈັກກະພັດລ່າເມືອງຂຶ້ນ ເຂົາໄດ້ບຸກໂຈມຕີຕົວເມືອງທ່າແຂກທັງ 3 ປີກ ດ້ວຍກໍາລັງປືນໃຫຍ່ໜ້າດິນ, ຖິ້ມລະເບີດ, ຍິງປືນກົນ ກວາດລົງໃສ່ກາງເມືອງ ເຮັດໃຫ້ຕົວເມືອງລຸກເປັນໄຟ, ປະຊາຊົນຫຼາຍຮ້ອຍຄົນເສຍຊີວິດ ແລະ ຖືກບາດເຈັບ, ການຕໍ່ສູ້ຍິ່ງດຸເດືອດຂຶ້ນສູ່ລະດັບສູງ ພວກລ່າເມືອງຂຶ້ນແບບເກົ່າຫວັງຍຶດເອົາຕົວເມືອງທ່າແຂກ ແຕ່ຖືກກຳລັງທະຫານຂອງປະເທດລາວ, ສະກັດກັ້ນຢ່າງເດັດດ່ຽວ, ອົງອາດ, ກ້າຫານ. ແຕ່ຍ້ອນວ່າສະພາບການປຽບດັ່ງ ເຫຼັກຫຼາຍກວ່າຖ່ານ ທະຫານຂອງຝ່າຍປະເທດລາວ ຈຶ່ງບໍ່ສາມາດຮັກສາຕົວເມືອງທ່າແຂກໄວ້ໄດ້. ພາຍຫຼັງທີ່ພວກລ່າເມືອງຂຶ້ນ ແລະ ລູກແຫຼ້ງຕີນມື ເຂົ້າຍຶດຕົວເມືອງທ່າແຂກສຳເລັດ ພວກເຂົາໄດ້ສ້າງໂທດກຳ ທີ່ບໍ່ມີວັນລືມໃຫ້ແກ່ປະຊາຊົນລາວ, ພວກເຂົາໄດ້ເຂັນຂ້າປະຊາຊົນລາວ ແລະ ຊາວຫວຽດນາມຕ່າງດ້າວ, ຜູ້ບໍລິສຸດຢ່າງໂຫດຮ້າຍ, ເຮັດໃຫ້ແມ່ນໍ້າຂອງເຕັມໄປດ້ວຍເລືອດ ແລະ ຊາກສົບຂອງ ປະຊາຊົນ, ແມ່ຍິງ, ເດັກນ້ອຍ ຖືກຂ້າຕາຍ ຈໍານວນ 3,000 ກວ່າຄົນ. ຈາກນັ້ນມາ ໃນວັນທີ່ 21 ມີນາ ຈື່ງກາຍເປັນວັນນັກຮົບເສຍອົງຄະ, ເສຍສະຫຼະຊີວິດ ເພື່ອປະເທດຊາດ ມາຈົນເຖີງປັດຈຸບັນ. ໂອກາດດຽວກັນ, ສະຫາຍ ບັງໄດ້ຍົກໃຫ້ເຫັນເຖິງຕົ້ນກໍາເນີດ, ການຂະຫຍາຍຕົວຂອງພັກປະຊາຊົນ ປະຕິວັດລາວໃນແຕ່ລະໄລຍະ, ວັນທີ 22 ມີນາ 1955 ເປັນເຫດການທາງການເມືອງທີ່ສໍາຄັນອັນຍິ່ງໃຫຍ່, ເປັນບາດລ້ຽວຕັດສິນໃນປະຫວັດສາດແຫ່ງການຄົງຕົວ ແລະ ຂະຫຍາຍຕົວຂອງປະເທດຊາດ, ພາຍຫຼັງທີ່ພັກປະຊາຊົນປະຕິວັດລາວ ໄດ້ສ້າງຕັ້ງຂຶ້ນ ພັກໄດ້ນໍາພາຂະບວນການຕໍ່ສູ້ກູ້ຊາດ ຢ່າງອົງອາດກ້າຫານ, ຜ່ານຜ່າການທົດສອບອັນລະອິດລະອ້ຽວ ຂ້ຽວຂາດ, ເດັດຂາດບໍ່ຍອມຈໍານົນ ຈົນສາມາດເອົາຊະນະສັດຕູ ແລະ ປົດປ່ອຍປະເທດຊາດ ອອກຈາກແອກປົກຄອງຂອງພວກລ່າເມືອງຂຶ້ນຢ່າງສົມບູນ, ນໍາພາປະຊາຊົນ ດຳເນີນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ມາຈົນມາເຖິງປັດຈຸບັນ. ຕະຫຼອດໄລຍະ 71 ປີ ແຫ່ງການສ້າງຕັ້ງ-ນໍາພາ ພາລະກິດປະຕິວັດ, ພັກໄດ້ເປັນກອງນໍາໜ້າທີ່ແຂງແກ່ນ, ເປັນຕົວແທນແຫ່ງຜົນປະໂຫຍດຂອງປະຊາຊົນຊາວຜູ້ອອກແຮງງານ, ເປັນແກນນໍາແຫ່ງລະບອບປະຊາທິປະໄຕ ປະຊາຊົນ, ນໍາພາ ພາລະກິດປ່ຽນແປງໃໝ່ຢ່າງຮອບດ້ານ, ມີຫຼັກການ, ປະຕິບັດນະໂຍບາຍແຕລະດ້ານ ຢ່າງຖືກຕ້ອງລວມທັງການພົວພັນກັບຕ່າງປະເທດ ເພື່ອຍົກສູງບົດບາດຂອງຊາດລາວ ໃຫ້ໄດ້ຮັບການເຊີດຊູໃນເວທີສາກົນ.
(ພາບ-ຂ່າວ: ນາງ ສຸລິຈັນ ພັດທະນາ)
ຄໍາເຫັນ