ໂຮງໝໍແຂວງສະຫວັນນະເຂດ ສາມາດຜະລິດອົກຊີແຊນ ຕອບສະຫຼອງໃຫ້ຄົນເຈັບຜ່ານລະບົບທໍ່ສົ່ງໄດ້ 70%

ໃນວັນທີ 18 ຕຸລາ ຜ່ານມາ, ໂຮງໝໍແຂວງສະຫວັນນະເຂດ ໄດ້ຈັດພິທີຕ້ອນຮັບທ່ານ ນາງ ຈູໂນ້ ຣໍເລັນຈາບເຟີ (Juno Lawrence Jaffer) ຫົວໜ້າຂະແໜງສາທາລະນະສຸກ ແລະ ການປົກຄອງ ອົງການພັດທະນາສາກົນ ປະເທດສະຫະລັດອາເມຣິກາ ປະຈໍາພາກພື້ນ(USAID), ມີທ່ານ ສົມຈັນ ທູນສະຫວັດ ຫົວໜ້າກົມປິ່ນປົວ, ທ່ານ ອາຊາລາ ອັບເພັນດຣາ (Dr. AchalaUpendra) ຜູ້ຕາງໜ້າອົງການອະນາໄມໂລກ ປະຈໍາ ສປປ ລາວ, ໂດຍໃຫ້ກຽດຕ້ອນຮັບຂອງທ່ານ ແສງດາວ ສີດາໄລ ຫົວໜ້າພະແນກສາທາລະນາະສຸກແຂວງ, ມີຜູ້ອໍານວຍການໂຮງໝໍແຂວງ ພ້ອມດ້ວຍແຂກຖືກເຊີນກ່ຽວຂ້ອງເຂົ້າຮ່ວມ.
    ທ່ານ ແສງດາວ ສີດາໄລ ໄດ້ກ່າວສະແດງຄວາມຊົມເຊີຍ ແລະ ຂອບໃຈມາຍັງທ່ານ ນາງ ຈູໂນ້ ຣໍເລັນຈາບເຟີ ພ້ອມຄະນະ ທີ່ໄດ້ໃຫ້ການຊ່ວຍເຫຼືອເຄື່ອງຜະລິດ ແລະ ບັນຈຸອົກຊີແຊນໃຫ້ແກ່ໂຮງໝໍໃນຄັ້ງນີ້ ໂດຍຜ່ານອົງການອະນາໄມໂລກ ຊຶ່ງໃນເມື່ອກ່ອນການສະ  ໜອງອົກຊີແຊນປະກອບມີ 2 ລະບົບຄື: ຜ່ານລະບົບທໍ່ສົ່ງ ແລະ ສົ່ງຈາກຖັງໃຫ້ຄົນເຈັບ, ໃນນີ້ການສົ່ງຜ່ານຖັງໃຫ້ຄົນເຈັບແມ່ນພົບຄວາມທ້າທາຍຫຼາຍຢ່າງເປັນຕົ້ນແມ່ນ: ການສະໜອງອົກຊີແຊນບໍ່ມີຄວາມຕໍ່ເນື່ອງ, ການລໍາລຽງ, ການປ່ຽນຖ່າຍຫຍຸ້ງຍາກ, ປະລິມານການໄຫຼບໍ່ພຽງພໍກັບຄວາມຕ້ອງການ. ການຊ່ວຍເຫຼືອຄັ້ງນີ້ໄດ້ຕິດຕັ້ງລະບົບຈ່າຍອົກຊີແຊນເພີ່ມອີກ 1 ຈຸດ ແລະ ຕິດຕັ້ງທໍ່ສົ່ງໄປຂະແໜງປິ່ນປົວເດັກນ້ອຍ ແລະ ອອກລູກ-ພະຍາດຍິງ ຊຶ່ງປະກອບໄປດ້ວຍຫົວຈ່າຍອົກຊີແຊນ 40 ຈຸດ, ລະບົບຈ່າຍອົກຊີແຊນທີ່ສາມາດບັນຈຸໄດ້ 40 ຖັງ (ຫຼືປະມານ 4 ແສນລິດ) ສາມາດຈ່າຍອົກຊີແຊນຜ່ານລະບົບທໍ່ສົ່ງໃຫ້ແກ່ຄົນເຈັບທົ່ວໂຮງໝໍແຂວງໄດ້ສູງເຖິງ 70% ຂອງຄວາມຕ້ອງການທັງໝົດ, ສ່ວນອີກ 30% ແມ່ນຍັງນໍາໃຊ້ອົກຊີແຊນຈາກຖັງໂດຍກົງ ໂດຍສະເພາະໃນຕຶກປິ່ນປົວພະຍາດຫົວໃຈ ແລະ ວັນນະໂຣກ. ຈາກນັ້ນ, ທ່ານ ແສງດາວ ສີດາໄລ ໄດ້ນໍາພາຄະນະຜູ້ແທນດັ່ງກ່າວຢ້ຽມຊົມການຕິດຕັ້ງລະບົບທໍ່ສົ່ງອົກຊີແຊນພາຍໃນໂຮງໝໍແຂວງ. 
 ຂ່າວ-ພາບ: ສະຫວັນນະເຂດ