 |
ທ່ານ ບຸນຊູ ແກ້ວມະຫາວົງ ຫົວໜ້າຫ້ອງການ ກະຊວງສາທາລະນະສຸກ ກ່າວບາງຕອນວ່າ: ພັກ ແລະ ລັດຖະບານ ຄືກະຊວງສາທາລະນະສຸກ ໄດ້ໃຫ້ຄວາມສຳຄັນກ່ຽວກັບສຸຂະພາບຂອງປະຊົນລາວເຮົາ, ເອົາໃຈໃສ່ເບິ່ງແຍງສຸຂະພາບ ໂດຍຖືເອົາການສົ່ງເສີມສຸຂະພາບ ແລະ ປິ່ນປົວເປັນສຳຄັນ, ນ້ຳນົມແມ່ ແມ່ນສານອາຫານທີ່ຈຳເປັນທີ່ສຸດສຳລັບເດັກອ່ອນ ແລະ ເດັກນ້ອຍ ເພື່ອສ້າງພູມຕ້ານທານຕໍ່ກັບເຊື້ອພະຍາດ ຫຼຸດຜ່ອນອັດຕາການເຈັບເປັນ, ການຕາຍຂອງເດັກຫຼັງເກີດ, ພ້ອມທັງສາມາດຊ່ວຍຫຼຸດຜ່ອນອັດຕາການຂາດສານອາຫານຂອງເດັກນ້ອຍ. ການຈັດຕັ້ງປະຕິບັດການປະເມີນ ແລະ ຮັບຮອງໂຮງໝໍຕົວແບບການລ້ຽງລູກດ້ວຍນ້ຳນົມແມ່ ເປັນບາດກ້າວສຳຄັນໃນການສົ່ງເສີມ ແລະ ປັບປຸງຄຸນນະພາບຂອງການບໍລິການວຽກງານສົ່ງເສີມການລ້ຽງລູກດ້ວຍນ້ຳນົມແມ່ ຢູ່ໃນສະຖານທີ່ບໍລິການສຸຂະພາບໃຫ້ມີການພັດທະນາໄປເທື່ອລະກ້າວ. ທ່ານກ່າວອີກວ່າ: ພິທີປະກາດໂຮງໝໍຕົວແບບການລ້ຽງລູກດ້ວຍນົມແມ່ຄັ້ງນີ້ ຈະເປັນໂຮງໝໍຕົວແບບທີ່ສຳຄັນ ເພື່ອຈະເປັນການຜັນຂະຫຍາຍໃຫ້ໂຮງໝໍປະເພດ ກ ຂັ້ນເມືອງ ທີ່ມີຄວາມພ້ອມເປັນໂຮງໝໍຕົວແບບເຊັ່ນດຽວກັນກັບໂຮງໝໍແຂວງ.
ທ່ານ ນາງ ວັນເພັງ ພັນທະນາໄລ ຫົວໜ້າພະແນກສາທາລະນະສຸກແຂວງວຽງຈັນ ກ່າວວ່າ: ໃນໄລຍະຜ່ານມາ ພະແນກສາທາລະນະສຸກແຂວງ ໄດ້ເອົາໃຈໃສ່ ນຳພາ-ຊີ້ນຳ ແລະ ຊຸກຍູ້ໃຫ້ບັນດາສະຖານທີ່ບໍລິການສາທາລະນະສຸກ ຈັດຕັ້ງປະຕິບັດນະໂຍບາຍແຫ່ງຊາດ ວ່າດ້ວຍການສົ່ງເສີມການລ້ຽງລູກດ້ວຍນົມແມ່ຢ່າງຕັ້ງໜ້າ. ໂດຍສະເພາະແມ່ນການຜັນຂະຫຍາຍ "10 ຂັ້ນຕອນ ສູ່ການລ້ຽງລູກດ້ວຍນົມແມ່ທີ່ສຳເລັດ". ການສ້າງຄວາມເຂັ້ມແຂງໃນການເປັນໂຮງໝໍສົ່ງເສີມລ້ຽງລູກດ້ວຍນົມແມ່ນັບແຕ່ຂັ້ນແຂວງລົງຮອດສຸກສາລາ ແລະ ການມີສ່ວນຮ່ວມຂອງພາກສ່ວນອົງການປົກຄອງທ້ອງຖິ່ນ ອົງການຈັດຕັ້ງມະຫາຊົນໃນການເຜີຍແຜ່ໃຫ້ຊຸມຊົນຮັບຮູ້ຕໍ່ກັບຄວາມສຳຄັນຂອງການໃຫ້ນົມແມ່ແກ່ເດັກແຕ່ແລກເກີດເຖິງ 6 ເດືອນ ແລະ ສືບຕໍ່ຮອດ 2ປີ, ນອກນັ້ນກໍ່ໄດ້ ມີເປົ້າໝາຍຂະຫຍາຍໂຮງໝໍສົ່ງເສີມການລ້ຽງລູກດ້ວຍນົມແມ່ໃນຂັ້ນໂຮງໝໍເມືອງ ໂດຍການຊຸກຍູ້ຕິດຕາມຈາກໂຮງໝໍແຂວງ ທີ່ມີປະສົບການໃນການຈັດຕັ້ງປະຕິບັດຜ່ານມາແລ້ວໂດຍມີແຜນຄາດຄະເນ ໃນປີ 2026 ໃຫ້ໄດ້ 1-2 ເມືອງ ທີ່ເປັນໂຮງໝໍສົ່ງເສີມການລ້ຽງລູກດ້ວຍນົມແມ່ ຂອງແຂວງວຽງຈັນ.
ທ່ານ ນາງ ຈັນຫອມ ຄອນສະຫວັນ ຄະນະອຳນວຍການໂຮງໝໍແຂວງວຽງຈັນ ກ່າວວ່າ: ປີ 2022 ໂຮງໝໍແຂວງວຽງຈັນ ຖືກຮັບຮອງເປັນໂຮງໝໍຕົວແບບການລ້ຽງລູກດ້ວຍນົມແມ່ ຄັ້ງທີ I ແລະ ປີ 2025 ຖືກຮັບຮອງເປັນ ຄັ້ງທີ II. ນັບແຕ່ປີ 2022 ຫາ ປັດຈຸບັນ, ຄະນະກຳມະການຮັບຜິດຊອບວຽກງານການສົ່ງເສີມການລ້ຽງລູກດ້ວຍນົມແມ່ໄດ້ເຄື່ອນໄຫວປົກກະຕິມີການປະເມີນຕາມຕົວຊີ້ວັດເພື່ອພັດທະນາຮັກສາໄວ້ ໃຫ້ໄດ້ຕົວແບບ ຄັ້ງທີ 2. ປັດຈຸບັນ, ຄະນະກຳມະການຮັບຜິດຊອບວຽກງານນົມແມ່ ມີທັງໝົດ 34 ທ່ານ. ຜົນການຈັດຕັ້ງປະຕິບັດໃນ ປີ 2025 ແມ່ຍິງທີ່ມາຝາກທ້ອງທັງໝົດ 3,524 ເທື່ອຄົນ ເກີດລູກທັງໝົດ 1,480 ຄົນ, ກວດເດັກດີທັງໝົດ 15,343 ຄົນ, ເດັກນອນຫ້ອງມໍລະສຸມເດັກເກີດໃໝ່ 275 ຄົນ, ຮັບນົມບໍລິຈາກ ຈຳນວນ 5 ແມ່ 50 ຖົງ, ຮັບນົມຈາກໂຮງໝໍເພື່ອນລາວ ຈຳນວນ 2 ຄັ້ງ 15 ກ່ອງ. ດ້ານການບໍລິການກັບຄົນເຈັບ ມີຜູ້ມານໍາໃຊ້ບໍລິການໃຫ້ຄໍາປຶກສາ ທັງໝົດ 47 ຄົນ, ໄດ້ໃຫ້ຄໍາປຶກສາກັບທີ່ ແລະ ຊ່ວຍແມ່ດ້ວຍວິທີ່ຕ່າງໆ ທີ່ຈໍາເປັນ ຈໍານວນ 503 ຄົນ, ໄດ້ຊ່ວຍແມ່ໃນການເອົາລູກເຂົ້າເຕົ້າ ແລະ ທ່າອຸ້ມຕ່າງໆ ຈໍານວນ 93 ຄົນ, ຊ່ວຍກະຕຸ້ນ, ນວດ, ບີບນໍ້ານົມຊ່ວຍແມ່ ພ້ອມແນະນໍາວິທີເກັບຮັກສານ້ຳນົມແມ່ ຈໍານວນ 185 ຄົນ. ສອນ ແລະ ຊ່ວຍແມ່ວິທີປ້ອນນົມດ້ວຍບ່ວງ, ຈອກ ແລະ ສະແລ້ງ ຈໍານວນ 275 ຄົນ ແລະ ໃນຕໍ່ໜ້າຈະສືບຕໍ່ນະໂຍບາຍ 162 ສາຍໄຍຮັກຈາກແມ່ ຫາ ລູກ; ປະຕິບັດນະໂຍບາຍສົ່ງເສີມການລ້ຽງລູກດ້ວຍນົມແມ່ ແລະ ວຽກໂພຊະນາການ ໃຫ້ມີຄວາມເຂັ້ມແຂງ ແລະ ຕໍ່ເນື່ອງຂຶ້ນ ສືບຕໍ່ປະຕິບັດຕົວຊີ້ວັດໃໝ່ຂອງໂຮງໝໍຕົວແບບສົງເສີມການລ້ຽງລູກດ້ວຍນົມແມ່ໃຫ້ໄດ້ຕາມເປົ້າໝາຍທີ່ວາງໄວ້.
ໂອກາດນີ້, ຍັງໄດ້ມີການມອບປ້າຍໂຮງໝໍຕົວແບບການລ້ຽງລູກດ້ວຍນົມແມ່ ປະຈຳປີ 2025 ໃຫ້ໂຮງໝໍແຂວງວຽງຈັນ ໂດຍການມອບຂອງ ທ່ານ ບຸນຊູ ແກ້ວມະຫາວົງ ແລະ ຮັບໂດຍ ທ່ານ ວົງເທວີ ຈັນຄຳມະວົງ ອຳນວຍການໂຮງໝໍແຂວງວຽງຈັນ.
(ແຫຼ່ງຂ່າວ: ແຂວງວຽງຈັນ)
ຄໍາເຫັນ