 |
ທ່ານ ສອນໄຊ ລາດຊະວົງ ໄດ້ຂຶ້ນລາຍງານການເຄື່ອນໄຫວວຽກງານຂອງໂຮງໝໍມິດຕະພາບວ່າ: ໃນ 1 ປີທີ່ຜ່ານມາ, ໂຮງມິດຕະພາບເຫັນໄດ້ເຖິງການນໍາພາ ພະນັກງານປະຕິບັດວິໄສທັດຂອງໂຮງໝໍ ແລະ ໄດ້ພ້ອມກັນຜ່ານຜ່າເຮັດໜ້າທີ່ການເມືອງ ແລະ ໜ້າທີ່ວິຊາສະເພາະຂອງຕົນຕາມການມອບໝາຍຂອງການຈັດຕັ້ງ. ດ້ານວິຊາການໄດ້ກວດ ແລະ ປິ່ນປົວຄົນເຈັບຢູ່ຫ້ອງກວດເຂດນອກໄດ້ 206,714 ເທື່ອຄົນ, (ໃນນັ້ນກວດເຂດນອກໂຮງໝໍພາກຂະຫຍາຍ 71,495 ເທື່ອຄົນ, ຮັບຄົນເຈັບສຸກເສີນ 51,493 ເທື່ອຄົນ, (ໃນນັ້ນອຸບັດເຫດທ້ອງຖະໜົນເຂົ້າມາສຸກເສີນ 71,341 ກໍລະນີ, ຮັບຄົນເຈັບເຂົ້ານອນ 25,625 ເທື່ອຄົນ, ອັດຕາການໝູນໃຊ້ຕຽງ 60.31% (ໃນ 608 ຕຽງ), ເດັກເກີດໃໝ່ 1,904 ຄົນ, ຜ່າຕັດທັງໝົດ 9,109 ກໍລະນີ, ຟອກໄຂ່ຫຼັງ 8,802 ເທື່ອຄົນ, ຄົນເຈັບສາຍແສງປິ່ນປົວມະເຮັງ 7,918 ເທື່ອຄົນ.
ສໍາລັບວຽກງານປະກັນສຸຂະພາບ ມີຜູ້ປະກັນຕົນມາຮັບບໍລິການທັງໝົດ 96,152 ເທື່ອຄົນ ແລະ ໄດ້ນະໂຍບາຍການປິ່ນປົວໂດຍບໍ່ເສຍຄ່າຜູ້ທຸກຍາກອານາຖາ, ນັກບວດ, ນັກຮຽນ-ນັກສຶກສາ ແລະ ນະໂຍບາຍຫຼຸດຄ່າຟອກເລືອດໃຫ້ຄົນເຈັບຜູ້ທຸກຍາກ ຊຶ່ງລວມນະໂຍບາຍທັງໝົດ 348 ຄົນ, ເປັນເງິນ 348,818,146 ກີບ (ໃນນັ້ນຄົນເຈັບທຸກຍາກອານາຖາ 45 ຄົນ, ເປັນເງິນ 122,980,443 ກີບ). ນອກຈາກນັ້ນ, ໂຮງໝໍຍັງໄດ້ເຮັດໜ້າທີ່ໂຄສະນາສຸຂະສຶກສາ, ໂພຊະນາການກວດສຸຂະພາບແມ່ ແລະ ເດັກ, ສັກຢາກັນພະຍາດ, ສິດສອນນັກສຶກສາ ແພດ-ພະຍາບານ, ບຳລຸງສ້າງພະນັກງານ, ຄົ້ນຄວ້າວິທະຍາສາດ ແລະ ພົວພັນຮ່ວມມືດ້ານວິຊາການ ກັບຄະນະແພດຈາກຕ່າງປະເທດເພື່ອພັດທະນາໂຮງໝໍ ແລະ ໄດ້ຖືເອົາວຽກງານສໍາຄັນຂອງການສຶກສາອົບຮົມແນວຄິດຂອງພະນັກງານ, ຈັນຍາບັນແພດ, ຈັນຍາບັນພະຍາບານ, ໄດ້ປຸກລະດົມຂະບວນການແຂ່ງຂັນຮັກຊາດ-ພັດທະນາ, ປະຕິບັດວິໄສທັດຂອງໂຮງໝໍ ແລະ ໄດ້ປະເມີນການຈັດຕັ້ງປະຕິບັດ ນະໂຍບາຍ 5 ດີ 1 ພໍໃຈ ທີ່ກະຊວງສາທາລະນະສຸກວາງອອກເຂົ້າໃນວຽກງານຕົວຈິງ. ນອກຈາກນັ້ນ, ຍັງໄດ້ຜ່ານແຜນການປີ 2026 ຊຶ່ງໄດ້ກວມເອົາການເມືອງແນວຄິດ, ວຽກງານວິຊາສະເພາະ, ວຽກການພົວພັນຕ່າງປະເທດ ແລະ ອື່ນໆ ເພື່ອເປັນບ່ອນອີງໃຫ້ການຈັດຕັ້ງປະຕິບັດໃນປີ 2026 ນີ້.
 |
ໃນພິທີໄດ້ມອບໃບຍ້ອງຍໍຂອງກະຊວງສາທາລະນະສຸກໃຫ້ພະແນກດີເດັ່ນປີ 2025 ໃນນີ້ເດັ່ນປະເພດ 1 ທັງໝົດ 27 ພະແນກ, ບຸກຄົນດີເດັ່ນປະເພດ 1 ມີ 183 ຄົນ, ປະເພດ II ມີ 117 ຄົນ ແລະ ປະເພດ III ມີ 91 ທ່ານ, ພະນັກງານຈ້າງຕາມສັນຍາບຸກຄົນດີເດັ່ນປະເພດ I ມີ 96 ຄົນ, ປະເພດ II ມີ 95 ຄົນ ແລະ ປະເພດ III ມີ 71 ຄົນ.
ໂອກາດນີ້, ທ່ານ ນາງ ໃບຄໍາ ຂັດທິຍະ ໄດ້ໃຫ້ກຽດໂອ້ລົມເນັ້ນໜັກໃຫ້ພະນັກງານແພດໝໍ ເອົາໃຈໃສ່ໃນໜ້າທີ່ວຽກງານໃນການຈັດຕັ້ງປະຕິບັດແຜນງານສາທາລະນະສຸກ ການຫັນໂຮງໝໍກຸ້ມຕົນເອງໂດຍສະເພາະແມ່ນ ວຽກພັດທະນາການບໍລິການຂອງໂຮງໝໍໃຫ້ດີຂຶ້ນ.
ຂ່າວ-ພາບ: ບຸນຕອມ+ບຸນອູ້ມ
ຄໍາເຫັນ