ຫວຽດນາມຍູ້ແຮງການປະຕິຮູບຮອບດ້ານ ໃນພາລະກິດການປ່ຽນແປງໃໝ່ ໝັ້ນຄົງ ເຂັ້ມແຂງ ສີວິໄລ ແລະ ຈະເລີນຮຸ່ງເຮືອງ

ປະເທດຫວຽດນາມ ໃນມື້ນີ້ກ້າວເຂົ້າສູ່ຍຸກໃໝ່ - ຍຸກແຫ່ງຄວາມຈະເລີນຮຸ່ງເຮືອງ, ສີວິໄລ ແລະ ວັດທະນະທຳທີ່ຮັ່ງມີຂອງຊາດ. ພ້ອມທັງກາລະໂອກາດ ແລະ ສິ່ງທ້າທາຍ ໂດຍສືບທອດບົດຮຽນອັນລ້ຳຄ່າຈາກໄຊຊະນະຂອງການປະຕິວັດເດືອນສິງຫາ 1945, ທົ່ວພັກ, ທົ່ວປວງຊົນ ແລະ ທົ່ວກອງທັບ ຮ່ວມໃຈເປັນໜຶ່ງດຽວ, ມຸ່ງໝັ້ນສ້າງປະເທດທີ່ຮຸ່ງເຮືອງ ແລະ ມີຄວາມສຸກ, ເພື່ອເຮັດໃຫ້ ພິໄນກໍາອັນສັກສິດຂອງປະທານ ໂຮ່ຈິມິນ ກາຍເປັນຈິງທີ່ວ່າ: “ສ້າງປະເທດຫວຽດນາມ ທີ່ສັນຕິພາບ, ເອກະພາບ, ອິດສະລະ, ປະຊາທິປະໄຕ ແລະ ຮັ່ງມີ” ເພື່ອເຮັດໃຫ້ຄວາມປາຖະໜານີ້ເປັນຈິງ ຈຳເປັນຕ້ອງຢຶດໝັ້ນ ແລະພັດທະນາລັດທິ ມາກ-ເລນິນ, ແນວຄິດໂຮ່ຈິມິນ ແລະ ທິດສະດີກ່ຽວກັບແນວທາງການປະຕິຮູບໃໝ່, ຢຶດໝັ້ນເປົ້າໝາຍເອກະລາດຂອງຊາດ ແລະ ສັງຄົມນິຍົມ. ຢຶດໝັ້ນຊຸກຍູ້ການປະຕິຮູບຢ່າງຮອບດ້ານ ເຂົ້າໃນພາລະກິດການປ່ຽນແປງໃໝ່, ຢຶດໝັ້ນຫຼັກການສ້າງພັກ, ປະສານກັນຢ່າງໃກ້ຊິດ ລະຫວ່າງ ການສະຫຼຸບບົດຮຽນຈາກພາກປະຕິບັດ, ການວິໄຈທາງທິດສະດີກັບການສ້າງ ແລະ ປະຕິບັດນະໂຍບາຍຂອງພັກ, ກົດໝາຍຂອງລັດ ເພື່ອສ້າງ ແລະ ປົກປ້ອງປະເທດຊາດຫວຽດນາມ ສັງຄົມນິຍົມ ຢ່າງຮອບດ້ານ.

ໃນຂະນະດຽວກັນ, ຕ້ອງຍູ້ແຮງກໍາລັງການຜະລິດທັງໝົດ ເປີດທາງໃຫ້ແກ່ຊັບພະຍາກອນທຸກດ້ານ ແລະ ນໍາໃຊ້ທ່າແຮງ ພ້ອມກັບທ່າໄດ້ປຽບຂອງປະເທດ ໃຫ້ເກີດປະໂຫຍດສູງສຸດ ຊຶ່ງຕ້ອງສຸມໃສ່ດັ່ງນີ້:

- ສ້າງພື້ນຖານລະບົບການພັດທະນາຢ່າງຄົບຖ້ວນ, ແກ້ໄຂຈຸດຈໍາກັດ ແລະ ອຸປະສັກ. ເປີດທາງ ແລະ ລະດົມຊັບພະຍາກອນທຸກດ້ານ ເພື່ອສ້າງກໍາລັງຂັບເຄື່ອນການພັດທະນາທີ່ກ້າວກະໂດດ ໃຫ້ແກ່ປະເທດ. ຮັບປະກັນຄວາມສອດຄ່ອງ ແລະ ຄວາມກົມກຽວ ລະຫວ່າງ ການປະຕິຮູບ ແລະ ການປັບປຸງສະຖາບັນເສດຖະກິດຕະຫຼາດ ຕາມທິດສັງຄົມນິຍົມ ກັບການປັບປຸງສະຖາບັນການເມືອງ, ພ້ອມທັງປະຕິຮູບ ແລະ ພັດທະນາລະບົບສັງຄົມ, ວັດທະນະທຳ ແລະ ການປົກປ້ອງສິ່ງແວດລ້ອມ, ການປ້ອງກັນຊາດ, ປ້ອງກັນຄວາມສະຫງົບ ແລະ ການຕ່າງປະເທດ ເພື່ອຕອບສະໜອງຄວາມຕ້ອງການໃນການພັດທະນາ ຢ່າງວ່ອງໄວ ແລະ ຍືນຍົງຂອງປະເທດ.

- ສົ່ງເສີມການສ້າງ ແລະ ປັບປຸງພັກ ລວມທັງລະບົບການເມືອງໃຫ້ບໍລິສຸດ, ເຂັ້ມແຂງ. ປະຕິຮູບການປະສານສົມທົບວິທີການ ແລະ ຍົກລະດັບຄວາມສາມາດໃນການຊີ້ນໍາ-ນໍາພາ ຂອງພັກ ຕໍ່ລັດ ແລະ ສັງຄົມ ໂດຍສະເພາະ ການສ້າງລັດອໍານາດຕາມທິດສັງຄົມນິຍົມ. ສຸມໃສ່ການສ້າງອົງການຈັດຕັ້ງ ແລະ ກົນໄກລະບົບການເມືອງທີ່ບໍລິສຸດ, ເຂັ້ມແຂງ, ກະທັດຮັດ ແລະ ປະຕິບັດໜ້າທີ່ໄດ້ຢ່າງມີປະສິດທິພາບ ແລະ ປະສິດທິຜົນ. ສ້າງຖັນແຖວພະນັກງານ ແລະ ສະມາຊິກພັກ ໃນທຸກລະດັບ ໂດຍສະເພາະ ລະດັບຍຸດທະສາດ ທີ່ມີຄຸນສົມບັດ ແລະ ຄວາມສາມາດ ເພື່ອຕອບສະໜອງພາລະກິດ, ເພີ່ມຄວາມເຂັ້ມແຂງ ໃນການຄວບຄຸມອຳນາດພາຍໃນພັກ ແລະ ໃນລັດ. ດຳເນີນການຕໍ່ສູ້ຕ້ານການສໍ້ລາດບັງຫຼວງ, ການຟຸມເຟຶອຍ ແລະ ພຶດຕິກໍາທາງລົບ ຢ່າງຕໍ່ເນື່ອງ, ເສີມສ້າງຄວາມເຊື່ອໝັ້ນ ແລະ ຄວາມຜູກພັນຂອງປະຊາຊົນ ຕໍ່ພັກ, ລັດ ແລະ ລະບອບສັງຄົມນິຍົມ.

- ສົ່ງເສີມການພັດທະນາເສດຖະກິດຕະຫຼາດ ຕາມທິດສັງຄົມນິຍົມ ທີ່ທັນສະໄໝ ແລະ ເຊື່ອມໂຍງເຂົ້າກັບສາກົນ ເພື່ອຕອບສະໜອງຄວາມຕ້ອງການໃນການພັດທະນາກໍາລັງການຜະລິດໃໝ່, ສົ່ງເສີມການປ່ຽນແປງຮູບແບບການເຕີບໂຕ, ປັບໂຄງສ້າງເສດຖະກິດ, ອຸດສາຫະກໍາ ແລະ ຫັນເປັນທັນສະໄໝໂດຍນໍາໃຊ້ວິທະຍາສາດ ແລະ ເຕັກໂນໂລຊີ ລວມທັງນະວັດຕະກໍາ ເປັນກໍາລັງຂັບເຄື່ອນຫຼັກ ເພື່ອຍົກລະດັບຜະລິດຕະພາບ, ຄຸນນະພາບ, ປະສິດທິພາບ ແລະ ຄວາມສາມາດ ໃນການແຂ່ງຂັນເສດຖະກິດ. ເລັ່ງສ້າງ ແລະ ຊຸກຍູ້ຢ່າງມີປະສິດທິຜົນ ຕໍ່ການຫັນປ່ຽນສູ່ດີຈີຕອນ, ການຫັນປ່ຽນສີຂຽວ ແລະ ການຫັນປ່ຽນດ້ານພະລັງງານ. ພັດທະນາເສດຖະກິດດີຈີຕອນ, ເສດຖະກິດສີຂຽວ ແລະ ເສດຖະກິດໝູນວຽນ, ສ້າງລັດຖະບານດີຈີຕອນ ແລະ ສັງຄົມດີຈີຕອນ.

- ສຸມໃສ່ການສ້າງ, ປັບປຸງ ແລະ ຈັດຕັ້ງປະຕິບັດຢ່າງມີປະສິດທິຜົນ ຕາມຍຸດທະສາດການພັດທະນາວິທະຍາສາດ, ເຕັກໂນໂລຊີ ແລະ ນະວັດຕະກໍາ, ປະສານສົມທົບກັບການສ້າງ ແລະ ພັດທະນາສະຖາບັນວິທະຍາສາດ, ເຕັກໂນໂລຊີ ແລະ ນະວັດຕະກໍາ ເພື່ອສ້າງຮາກຖານການພັດທະນາກໍາລັງການຜະລິດໃໝ່ ແລະ ທັນສະໄໝ. ສົ່ງເສີມການກໍ່ສ້າງ ແລະ ການນໍາໃຊ້ຊັບພະຍາກອນມະນຸດ ທີ່ມີຄຸນນະພາບສູງ ແລະ ລະດັບສູງ ເພື່ອສ້າງແຮງຂັບເຄື່ອນຫຼັກ ໃນການຍົກລະດັບຜະລິດຕະພາບ, ຄຸນນະພາບ, ປະສິດທິຜົນ, ຄວາມສາມາດໃນການແຂ່ງຂັນຂອງສິນຄ້າ, ທຸລະກິດ ແລະ ເສດຖະກິດໂດຍລວມ.

- ພັດທະນາຊັບພະຍາກອນມະນຸດ ແລະ ພັດທະນາສັງຄົມ ໃຫ້ກາຍເປັນຮາກຖານທີ່ແທ້ຈິງ, ເປັນພະລັງພາຍໃນ ແລະ ກໍາລັງຂັບເຄື່ອນສຳຄັນ ຕໍ່ການພັດທະນາຢ່າງວ່ອງໄວ ແລະ ຍືນຍົງຂອງປະເທດ. ການປະຕິຮູບແບບປະສານສົມທົບ, ພື້ນຖານ, ຮອບດ້ານ, ຫັນເປັນທັນສະໄໝ ແລະ ຍົກລະດັບຄຸນນະພາບລະບົບການສຶກສາຂອງຊາດທັງໝົດ. ສົ່ງເສີມການປະຕິຮູບວິທີການບໍລິຫານ ຈັດການການພັດທະນາສັງຄົມຢ່າງຍືນຍົງ, ຮັບປະກັນສິດທິມະນຸດ ແລະ ສິດທິພົນລະເມືອງ, ປະຕິບັດນະໂຍບາຍສັງຄົມ, ຄວາມໝັ້ນຄົງທາງສັງຄົມ ແລະ ສະຫວັດດີການສັງຄົມ ຢ່າງມີປະສິດທິພາບ.

- ຊຸກຍູ້ການດຳເນີນວຽກງານການຕ່າງປະເທດ ຢ່າງສົມບູນ, ສ້າງສັນ ແລະ ມີປະສິດທິຜົນ, ຍົກລະດັບ ແລະ ເສີມສ້າງບົດບາດຂອງການທູດພັກ, ການທູດລັດ ແລະ ການທູດປະຊາຊົນ ໃນການສ້າງສະພາບແວດລ້ອມທີ່ສັນຕິ, ໝັ້ນຄົງ, ມິດຕະພາບ ແລະ ການຮ່ວມມື. ສ້າງເງື່ອນໄຂທີ່ເອື້ອອຳນວຍຕໍ່ການພັດທະນາຂອງປະເທດ. ສ້າງກອງທັບປະຊາຊົນ ແລະ ປ້ອງກັນຄວາມສະຫງົບປະຊາຊົນ ທີ່ມີລັກສະນະປະຕິວັດ, ເປັນລະບຽບແບບແຜນ, ມີຄວາມຮູ້ ແລະ ທັນສະໄໝ, ເພື່ອປົກປ້ອງເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນ ແລະ ທະເລເກາະຂອງຊາດ ໃຫ້ໝັ້ນຄົງ.

ໂດຍ: ຫອມໄຊຍະເດດ