ກຳແພງຫີນພູຄັນນາສະຖານທີ່ທ່ອງທ່ຽວ ທີ່ຍັງເປັນປິດສະໜາໃນການກໍ່ກຳເນີດ

ໂດຍ: ກອງຄໍາ
ກຳແພງຫີນສາຍພູຄັນນາ ຕັ້ງຢູ່ບ້ານໃໝ່ໂພສີ ຢູ່ຫ່າງຈາກເທດສະບານເມືອງທ່າແຂກ ແຂວງຄຳມ່ວນ 8 ກິໂລແມັດ, ສາຍພູຄັນນາເປັນກຳແພງຫີນທີ່ກວ້າງ, ສູງ ແລະ ມີຫຼາຍຕອນ ເມື່ອລວມກັນແລ້ວ ຈະມີຄວາມຍາວ ເຖິງ 15 ກິໂລແມັດ, ສະຖານທີ່ສຳລັບຊົມກຳແພງໃຫຍ່ນີ້ດີທີ່ສຸດແມ່ນຢູ່ເຂດບ້ານໂພນສີທ່າ-ບ້ານໃໝ່ໂພສີ, ກຳແພງຫີນໃຫຍ່ໃນຈຸດດັ່ງກ່າວ ເປັນກ້ອນຫີນຍັກໃນຮູບຊົງກຳແພງ ທີ່ບໍ່ທັນແຕກແຍກ ຍາວກວ່າໜູ່ໂດຍມີຄວາມຍາວເຖິງ 75 ແມັດ ແລະ ສູງເຖິງ 16 ແມັດ ຊຶ່ງໄດ້ລີ້ຊ່ອນຢູ່ປ່າດົງອັນຕຶບໜາ ກ່ອນຕົວເມືອງທ່າແຂກ ຍັງບໍ່ທັນໄດ້ຂະຫຍາຍບ້ານເຮືອນອອກມາເຖິງ, ເຂດປ່າຕຶບດົງໜາແຖບນີ້ແມ່ນໄດ້ສ້າງຄວາມຢ້ານກົວໃຫ້ແກ່ຊາວບ້ານ, ຊາວເມືອງຍ້ອນມີຝູງສັດຮ້າຍຫຼາຍຊະນິດເຊັ່ນ: ເສືອ, ຊ້າງ, ໝາປ່າ, ງູໃຫຍ່ ແລະ ສັດອື່ນໆຢ່າງຫຼວງຫຼາຍ.
ອີງຕາມການສັນນິຖານຂອງນັກວິຊາການດ້ານບູຮານວັດຖຸວ່າ: ກໍາແພງນີ້ເປັນຫີນສີລາແລງຍຸກຫີນແຫ່ງສະຕະວັດທີ IV, ການກໍ່ສ້າງກໍາແພງເມືອງ ແມ່ນເຮັດດ້ວຍການເສີມຫີນສີລາແລງປົນກັບສັນພູຫີນທຳມະຊາດ ໃຫ້ເປັນກຳແພງສັນຍາລັກຂອງຕົວເມືອງ ແລະ ບໍ່ໃຫ້ສັດຕູໝູ່ມານມາລ່ວງລໍ້າໄດ້ງ່າຍ, ເຮົາລອງສັງເກດໂດຍງ່າຍບາງຍ່ານຂອງກ້ອນຫີນທີ່ແຕກເປັນກ້ອນນ້ອຍທີ່ໄດ້ຜຸພັງໄປຕາມການເວລາ ເມື່ອເຮົາລອງຈັບຖິ້ມລົງພື້ນດິນ ກ້ອນຫີນກໍຈະແຕກໂດຍງ່າຍດາຍ.
ບັນດານັກບູຮານຄະດີຊີ້ແຈງວ່າ: ແມ່ນກຳແພງທີ່ເກີດຂຶ້ນຈາກທຳມະຊາດ (ບໍ່ແມ່ນຄົນປັ້ນແຕ່ງ) ຊຶ່ງຜ່ານຂະບວນວິວັດທະນາການຫຼາຍລ້ານປີ ຈຶ່ງເກີດເປັນກຳແພງຍັກຫີນຊາຍ, ຢ່າງໃດກໍດີ ຍັງມີທິດສະດີອື່ນອີກທີ່ສັນນິຖານວ່າ ແມ່ນອະຣິຍະທຳແຫ່ງລະບົບປ້ອງກັນທີ່ສ້າງຂຶ້ນໃນສະຕະວັດທີ VIII ພາຍໃຕ້ຍຸກສະໄໝຂອງອານາຈັກສີໂຄດຕະບູນ ເກົ່າແກ່. 
ປັດຈຸບັນທາງພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໄດ້ປະກາດ ແລະ ກຳນົດເອົາສະຖານທີ່ດັ່ງກ່າວເປັນແຫຼ່ງທ່ອງທ່ຽວຂອງແຂວງ, ການເຂົ້າຫາສະຖານທີ່ດັ່ງກ່າວ ເມື່ອທ່ານອອກຈາກເທດສະບານເມືອງທ່າແຂກ ສາມາດຂີ່ລົດໄປຕາມເສັ້ນທາງເລກທີ 13ໄປຫາ ນະຄອນຫຼວງວຽງຈັນ ຮອດກິໂລແມັດທີ 6 ທ່ານກໍຈະແນມເຫັນກຳແພງດັ່ງກ່າວຢູ່ເບື້ອງຊ້າຍມື.
ຂໍ້ມູນຈາກ: ຂະແໜງທ່ອງທ່ຽວ ພະແນກ ຖວທ ແຂວງຄຳມ່ວນ