 |
ໃນພິທີສະເຫຼີມສະຫຼອງວັນຜູ້ບໍລິຈາກເລືອດໂລກ 14 ມິຖຸນາ 2025 (World Blood Donor Day 2025) ພາຍໃຕ້ຄຳຂວັນ: “ໃຫ້ເລືອດ ໃຫ້ຄວາມຫວັງ, ຮ່ວມໃຈກັນຊ່ວຍຊີວິດ” ທີ່ຈັດຂຶ້ນໃນວັນທີ 12 ມິຖຸນາຜ່ານມາ ຢູ່ສູນການຄ້າລາວໄອເຕັກມໍ ນະຄອນຫຼວງວຽງຈັນ; ທ່ານ ຄໍາລາວັນ ຈັນທະລາວັນ ປະທານອົງການກາແດງແຫ່ງຊາດລາວ ທັງເປັນຮອງປະທານ ຄະນະກຳມະການສົ່ງເສີມການບໍລິຈາກເລືອດ-ສົ່ງເລືອດແຫ່ງຊາດ (ຄສລ) ຜູ້ປະຈຳການ, ໃຫ້ສໍາພາດ ວ່າ: ການເຈັບ, ປ່ວຍ, ຖ້າຂາດເລືອດ ກໍຕ້ອງການເລືອດຢ່າງພຽງພໍ, ປັດຈຸບັນຫຼາຍປະເທດ ກໍມີຄວາມກັງວົນກັບພະຍາດຄາລັດຊີເນຍ (ພະຍາດຂາດເລືອດ) ພະຍາດນີ້ຕ້ອງໄດ້ໃສ່ເລືອດຕະຫຼອດຊີວິດ. “ເລືອດ” ບໍ່ມີໂຮງຈັກໂຮງງານໃດຈະຜະລິດອອກມາໄດ້ ມີແຕ່ຄົນເທົ່ານັ້ນຈະສົ່ງເລືອດໃຫ້ຜູ້ທີ່ຂາດເລືອດ; ເມື່ອມີກິດຈະກຳ ບໍລິຈາກເລືອດ ກໍເຊີນຊວນປະຊາຊົນທຸກຊັ້ນຄົນ ຮ່ວມບໍລິຈາກເລືອດດ້ວຍຄວາມສະໝັກໃຈ ເພື່ອຊ່ວຍເຫຼືອສັງຄົມ, ຫາກວ່າທ່ານບໍລິຈາກວັນນີ້ ກໍເພື່ອຕົວທ່ານເອງໃນວັນຂ້າງໜ້າ ຫຼື ເພື່ອພີ່ນ້ອງທີ່ເປັນຄົນເຈັບ ກໍສາມາດເຂົ້າໄປຮັບເລືອດທີ່ສະຖາບັນເລືອດແຫ່ງຊາດໄດ້, ຖ້າຫາກວ່າທ່ານໃດເຂົ້າໄປບໍລິຈາກເລືອດ ຈຶ່ງຈະໄດ້ບັດ (ພາກສ່ວນທີ່ກ່ຽວຂ້ອງ ກໍຄື ສະຖາບັນເລືອດຈະອອກບັດໃຫ້ ແຕ່ຕ້ອງຄົບຕາມມາດຖານທີ່ເພິ່ນໄດ້ກໍານົດໄວ້).
ທ່ານ ເນັກລະຄອນ ພວງພາລາ ພະນັກງານສັງກັດຢູ່ອົງການກາແດງແຫ່ງຊາດລາວ ໃຫ້ສໍາພາດ ວ່າ: ພາກພູມໃຈຫຼາຍ ທີ່ໄດ້ເປັນສ່ວນໜຶ່ງ ປະກອບສ່ວນໃນວຽກງານເລືອດ; ນອກຈາກໄດ້ເຮັດວຽກມະນຸດສະທໍາແລ້ວ, ຍັງເປັນຜູ້ເອົາເລືອດອອກ ຊ່ວຍເພື່ອນມະນຸດດ້ວຍກັນ, ເລືອດຈະຊ່ວຍກອບກູ້ເອົາຊີວິດຄົນອື່ນ ບໍ່ໃຫ້ຈາກໂລກນີ້ໄດ້, ໃນນາມເຮັດວຽກສື່ມວນຊົນໃນອົງການກາແດງແຫ່ງຊາດລາວ ກໍຂໍເຊີນຊວນມວນຊົນທັງພາຍໃນ ແລະ ຕ່າງປະເທດ ໂດຍສະເພາະຜູ້ທີ່ມີສຸຂະພາບແຂງແຮງຊ່ວຍບໍລິຈາກເລືອດ. ເຮົາບໍ່ຮູ້ວ່າຄົນເຈັບຈະເປັນຄົນພາຍໃນ ຫຼື ພາຍນອກທີ່ຕ້ອງການເລືອດ; ດັ່ງນັ້ນ, ຕ້ອງຄິດສະເໝີວ່າຄົນເຈັບທີ່ນອນຢູ່ໂຮງໝໍ ຜູ້ທີ່ຕ້ອງການເລືອດລ້ວນແຕ່ແມ່ນພີ່ນ້ອງຂອງເຮົາທັງນັ້ນ ເພື່ອໃຫ້ເຂົາເຈົ້າເຫຼົ່ານັ້ນໄດ້ເລືອດເຮົາຕ້ອງຊ່ວຍກັນບໍລິຈາກເລືອດ ເພື່ອໃຫ້ເລືອດພຽງພໍ ຊ່ວຍຄົນເຈັບທີ່ຂາດເລືອດ - ຕ້ອງການເລືອດ ໃນໂຮງໝໍແຫ່ງຕ່າງໆ.
ທ່ານ ນາງ ວິໄລວອນ ໄຊຍະຊ່າງ ພະນັກງານສັງກັດຢູ່ໜັງສືພິມປະຊາຊົນ ໃຫ້ສໍາພາດວ່າ: ດີໃຈຫຼາຍ ທີ່ໄດ້ບໍລິຈາກເລືອດ ເພື່ອປະກອບສ່ວນຊ່ວຍການກອບກູ້ຊີວິດ ຄົນເຈັບທີ່ຕ້ອງການເລືອດ ໃຫ້ກັບຄືນມາມີຊີວິດຢູ່ໃນສັງຄົມ ຊຶ່ງຂ້າພະເຈົ້າມີໂອກາດດີ ແລະ ສຸຂະພາບແຂງແຮງ ຈຶ່ງມີຄວາມພ້ອມບໍລິຈາກເລືອດໃນຄັ້ງນີ້ ຊຶ່ງການບໍລິຈາກເລືອດ ແມ່ນເປັນຄັ້ງທີ 9.
 |
ທ່ານນາງ ພູວອນ ອານຸວົງ ພະນັກງານສັງກັດຢູ່ກະຊວງພາຍໃນ ໄດ້ສະແດງຄວາມຮູ້ສຶກອອກມາວ່າ: ຂ້າພະເຈົ້າດີໃຈ, ພູມໃຈຫຼາຍ ທີ່ໄດ້ບໍລິຈາກເລືອດ, ໂດຍປົກກະຕິແລ້ວ ພໍຮອດວັນຜູ້ບໍລິຈາກເລືອດໂລກ 14 ມິຖຸນາ ທຸກໆປີ, ຕົນເອງກໍໄດ້ບໍລິຈາກເລືອດເພື່ອຊ່ວຍເຫຼືອສັງຄົມ; ການບໍລິຈາກເລືອດ ເປັນຄັ້ງທີ 8 ແລ້ວ, 3 ອົງການຈັດຕັ້ງມະຫາຊົນ ທີ່ຂຶ້ນກັບກະຊວງພາຍໃນ ເຂົ້າຮ່ວມບໍລິຈາດເລືອດ ໃນວັນຜູ້ບໍລິຈາກເລືອດໂລກ ຈໍານວນ 15 ຄົນ (15 ຖົງ) ຜູ້ທີ່ບໍລິຈາກເລືອດຄັ້ງນີ້ ແມ່ນຜູ້ທີ່ມີສຸຂະພາບສົມບູນ, ແຂງແຮງດີ.
ທ່ານນາງ ກາເຣຍ ຢ່າງ ນັກສຶກສາຈາກມະຫາວິທະຍາໄລແຫ່ງຊາດ ໃຫ້ສໍາພາດວ່າ: ເປັນຄັ້ງທໍາອິດທີ່ຂ້າພະເຈົ້າໄດ້ບໍລິຈາກເລືອດເພື່ອຊ່ວຍເຫຼືອສັງຄົມ, ຖ້າມີໂອກາດກໍຈະຍາດແຍ່ງເວລາຫວ່າງ ເຂົ້າຮ່ວມບໍລິຈາກເລືອດນໍາອີກ.
ຄໍາເຫັນ