ການນໍາໂຮງໝໍແຂວງຈໍາປາສັກ​ ສະແດງທັດສະນະຕໍ່ກັບວັນແພດລາວ

ເພື່ອເຮັດໃຫ້ພົນລະເມືອງລາວບັນດາເຜົ່າທຸກຊັ້ນຄົນໃນສັງຄົມ, ແພດໝໍ ແລະ ພະນັກງານສາທາລະນະສຸກ ເຫັນໄດ້ການເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ ຂອງວຽກງານສາທາລະນະສຸກ, ຂອງຖັນແຖວແພດໝໍລາວ ໃນແຕ່ລະໄລຍະ; ເພື່ອຈາລຶກຄຸນງາມຄວາມດີຂອງແພດໝໍ ແລະ ພະນັກງານສາທາລະນະສຸກ ທີ່ໄດ້ປະກອບສ່ວນເຂົ້າໃນການຮັກສາສຸຂະພາບປະຊາຊົນ, ພະນັກງານ, ທະຫານ, ຕຳຫຼວດໃນຂະບວນການຕໍ່ສູ້ກູ້ຊາດໃນເມື່ອກ່ອນ ກໍຄືໄລຍະການປົກປັກຮັກສາ ແລະ ສ້າງສາພັດທະນາປະເທດຊາດໃນປັດຈຸບັນ.

ທ່ານ ຄິດສະແຫວງ ສີສຸລາດ ກ່າວຕື່ມວ່າ: ຕະຫຼອດໄລຍະຜ່ານມາ, ໂຮງໝໍໄດ້ສຸມໃສ່ການພັດທະນາ 3 ດ້ານຕົ້ນຕໍ ຄື: ການຍົກລະດັບຄຸນນະພາບການ ບໍລິການ ໂດຍສະເພາະການປິ່ນປົວພະຍາດບໍ່ຕິດຕໍ່, ການພັດທະນາລະບົບດິຈິຕອນ ເພື່ອເພີ່ມປະສິດທິພາບການບໍລິການ ແລະ ການເສີມສ້າງຂີດຄວາມສາມາດຂອງບຸກຄະລາກອນການແພດ. ພ້ອມນັ້ນ, ໂຮງໝໍແຂວງ ຍັງໄດ້ສຸ່ມໃສ່ປະຕິບັດພາລະບົດບາດການເປັນໂຮງໝໍສູນກາງດ້ານການປິ່ນປົວ, ໂຮງໝໍສິດສອນ ແລະ ໂຮງໝໍຮັບສົ່ງຕໍ່ຄົນເຈັບສໍາລັບພາກໃຕ້. ການເຄື່ອນໄຫວວຽກງານ ກໍໄດ້ປະຕິບັດຕາມນະໂຍບາຍຂອງກອງທຶນປະກັນສຸຂະພາບແຫ່ງຊາດ ແລະ ລະບຽບການຂອງກະຊວງສາທາລະນະສຸກ ຢ່າງເຂັ້ມງວດ. ເຖິງແມ່ນວ່າຈະມີຂໍ້ຈຳກັດດ້ານງົບປະມານ ແລະ ຊັບພະຍາກອນ ແຕ່ໂຮງໝໍແຂວງ ສາມາດຮັກສາມາດຕະຖານການບໍລິການ ແລະ ສ້າງຄວາມເຊື່ອໝັ້ນໃຫ້ແກ່ສັງຄົມໄດ້ຢ່າງ ຕໍ່ເນື່ອງ.

ການເຄື່ອນໄຫວແຕ່ລະດ້ານ ຍັງປະຕິບັດຕາມ 5 ໜ້າທີ່ຫຼັກຂອງໂຮງໝໍ ຕົ້ນຕໍແມ່ນວຽກງານກັນພະຍາດ ແລະ ສົ່ງເສີມສຸຂະພາບ, ວຽກງານສັກວັກຊີນກັນພະຍາດ, ວຽກງານສົ່ງເສີມສຸຂະພາບ, ວຽກງານສົ່ງເສີມສຸຂະພາບແມ່ (ແມ່ຍິງຖືພາ ແລະ ຫຼັງເກີດ), ວຽກງານສຸຂະພາບຈະເລີນພັນ ແລະ ວາງແຜນຄອບຄົວ, ວຽກງານສົ່ງເສີມສຸຂະພາບເດັກລຸ່ມ 5 ປີ, ວຽກງານກັນພະຍາດ ແລະ ຄວບຄຸມພະຍາດຕິດຕໍ່, ວຽກງານປິ່ນປົວ ແລະ ຟື້ນຟູໜ້າທີ່ການ, ວຽກງານຊີ້ນໍາໂຮງໝໍຂັ້ນລຸ່ມ, ວຽກງານຄຸ້ມຄອງ - ພັດທະນາພະນັກງານ, ວຽກງານການຮຽນການສອນ ແລະ ຄົ້ນຄວ້າວິທະຍາສາດ. ສໍາລັບບັນດາໜ້າວຽກປິ່ນອ້ອມ 5 ໜ້າທີ່ຫຼັກ ຂອງໂຮງໝໍ ເຊັ່ນ: ວຽກງານຄຸ້ມຄອງຢາ, ຜະລິດຕະພັນການແພດ ແລະ ການພັດທະນາວຽກງານສະໜອງຢາ, ພັດທະນາສ້າງຄວາມເຂັ້ມແຂງວຽກງານບໍລິຫານຄຸ້ມຄອງໂຮງໝໍ, ສ້າງຄວາມເຂັ້ມແຂງວຽກງານການເງິນໂຮງໝໍແຂວງ, ສ້າງຄວາມເຂັ້ມແຂງວຽກງານກວດກາ ແລະ ປະເມີນຜົນ, ວຽກງານຮ່ວມມືສາກົນ ກໍໄດ້ເອົາໃຈໃສ່ເຊັນດຽວກັນ. ສ່ວນການພັດທະນາແພດລາວໃນຕໍ່ໜ້າ ແພດໝໍທີ່ປະຕິບັດໜ້າທີ່ຢູ່ໂຮງໝໍແຂວງຈຳປາສັກ ຈະສືບຕໍ່ປະຕິບັດໜ້າທີ່ຕາມການມອບໝາຍຂອງໂຮງໝໍແຂວງ ພ້ອມທັງຍົກລະດັບຄຸນນະພາບການບໍລິການໃຫ້ດີຂຶ້ນ, ຍົກລະດັບວິຊາການໃນສາຂາວິຊາຕ່າງໆ ຢູ່ພາຍໃນ ແລະ ຕ່າງປະເທດໃຫ້ຫຼາຍຂຶ້ນ ໂດຍສະເພາແມ່ນລົງເລິກວິຊາສະເພາະ ໃຫ້ມີຄວາມຊໍານານງານ ກາຍເປັນມືອາຊີບ.

(ຂ່າວ-ພາບ: ທູນທອງໃຈ)