ບົດລາຍງານຈາກກະຊວງການຄ້າ, ອຸດສາຫະກຳ ແລະ ພະລັງງານ ລະບຸວ່າ: ການສົ່ງອອກ ຊຶ່ງກວມເອົາປະມານເຄິ່ງໜຶ່ງຂອງເສດຖະກິດ ສ ເກົາຫຼີ ໄດ້ຂະຫຍາຍຕົວເຖິງ 29.0% ເປັນ 67.45 ຕື້ໂດລາ ຊຶ່ງເປັນໂຕເລກທີ່ສູງທີ່ສຸດເທົ່າທີ່ເຄີຍບັນທຶກໄວ້ສຳລັບການສົ່ງອອກໃນເດືອນກຸມພາ.
ນອກຈາກນັ້ນ, ເມື່ອພິຈາລະນາເຖິງປະລິມານການສົ່ງອອກສະເລ່ຍຕໍ່ມື້ ພົບວ່າເພີ່ມຂຶ້ນ 49.3% ເປັນ 3.55 ຕື້ໂດລາ ຊຶ່ງຖືເປັນຄັ້ງທຳອິດໃນປະຫວັດສາດທີ່ປະລິມານສະເລ່ຍຕໍ່ມື້ເກີນ 3 ຕື້ໂດລາ.
ໃນດ້ານການນຳເຂົ້າ, ໄດ້ເພີ່ມຂຶ້ນ 7.5% ເປັນ 51.94 ຕື້ໂດລາ ເມື່ອທຽບກັບໄລຍະດຽວກັນໃນປີ 2025 ຊຶ່ງເຮັດໃຫ້ເດືອນກຸມພາ ສ ເກົາຫຼີ ມີການເກີນດຸນການຄ້າ 15.51 ຕື້ໂດລາ.
ຂ່າວລະບຸວ່າ: ໃນບັນດາສິນຄ້າສົ່ງອອກ 15 ລາຍການຂອງປະເທດ ມີ 5 ລາຍການທີ່ມີການເຕີບໂຕຂອງການສົ່ງອອກ ເນື່ອງຈາກຈຳນວນມື້ເຮັດວຽກທີ່ໜ້ອຍລົງຍ້ອນວັນພັກປີໃໝ່ ສ ເກົາຫຼີ.
ສິນຄ້າຫຼັກທີ່ຂັບເຄື່ອນການເຕີບໂຕຂອງການສົ່ງອອກຄື: ເຊມິຄອນດັກເຕີ ເພີ່ມຂຶ້ນ 160.8% ເປັນສະຖິຕິໃໝ່ປະຈຳເດືອນທີ່ 25.16 ຕື້ໂດລາ ແລະ ເປັນເດືອນທີສາມຕິດຕໍ່ກັນທີ່ການສົ່ງອອກຊິບມີມູນຄ່າເກີນ 20 ຕື້ໂດລາ, ໂດຍໄດ້ຮັບແຮງຂັບເຄື່ອນຈາກຄວາມຕ້ອງການທີ່ລົ້ນຕະຫຼາດຈາກການຂະຫຍາຍຕົວຂອງການລົງທຶນດ້ານປັນຍາປະດິດ (AI) ແລະ ການເພີີ່ມຂຶ້ນຂອງລາຄາຊິບໜ່ວຍຄວາມຈຳທົ່ວໂລກ.
ສຳລັບຕະຫຼາດສົ່ງອອກທີ່ສຳຄັນ, ການສົ່ງອອກໄປ ສະຫະລັດ ອາເມຣິກາ ເພີ່ມຂຶ້ນ 29.9% ເປັນ 12.85 ຕື້ໂດລາ, ໂດຍຄວາມຕ້ອງການຊິບທີ່ເພີ່ມຂຶ້ນສາມາດຊົດເຊີຍຜົນກະທົບຈາກພາສີນຳເຂົ້າຂອງ ສະຫະລັດ ອາເມຣິກາ.
ໃນຂະນະດຽວກັນ, ການສົ່ງອອກໄປບັນດາປະເທດອາຊຽນເພີ່ມຂຶ້ນ 30.4% ເປັນ 12.47 ຕື້ໂດລາ ແລະ ການສົ່ງອອກໄປສະຫະພາບເອີຣົບ ເພີ່ມຂຶ້ນ 10.3% ເປັນ 5.60 ຕື້ໂດລາ.
ຄໍາເຫັນ