ໂດຍການເຂົ້າຮ່ວມເປັນສັກຂີພິຍານຂອງ ທ່ານ ພົງໄຊສັກ ອິນຖາລາດ ຮອງລັດຖະມົນຕີກະຊວງ ຮສສ, ມີຫົວໜ້າກົມ-ຮອງກົມ, ບັນດາຜູ້ອຳນວຍການ, ຮອງຜູ້ອຳນວຍການຈາກສູນກວດສຸຂະພາບແຮງານລາວ ແລະ ແຮງງານຕ່າງປະເທດທີ່ເຮັດວຽກຢູ່ສປປ ລາວຈາກ 6 ສູນກວດສຸຂະພາບຄື: ໂຮງໝໍມິດຕະພາບ, ໂຮງໝໍມະໂຫສົດ, ໂຮງໝໍກະເສມລາດ, ໂຮງໝໍຫຼັກໄຊ, ໂຮງໝໍອາດບູລີ-ສາກົນ ແລະ ໂຮງໝໍລາວ-ອາຊຽນ ເຂົ້າຮ່ວມ.
ການເຊັນສັນຍາໃນຄັ້ງນີ້ ເປັນການຮ່ວມມືລະຫວ່າງພາກລັດ ແລະ ເອກະຊົນ ບົນພື້ນຖານປະຕິບັດຕາມກົດໝາຍ ແລະ ລະບຽບການທີ່ວາງອອກ ໂດຍສະເພາະແມ່ນການກວດສຸຂະພາບປະຈໍາ ແລະ ກວດຕາມປັດໃຈສ່ຽງຂອງຜູ້ອອກແຮງງານ ເພື່ອຮັບປະກັນໃຫ້ມີຖານຂໍ້ມູນການກວດສຸຂະພາບຂອງຜູ້ອອກແຮງງານເກັບຮັກສາໄວ້ ເພື່ອເປັນການຕິດຕາມ, ເກັບກຳ, ບັນທຶກຂໍ້ມູນສຸຂະພາບ ແລະ ປະຫວັດການເຮັດວຽກຂອງຜູ້ອອກແຮງງານ ເພື່ອເປັນບ່ອນອີງໃຫ້ແກ່ການວິເຄາະຫາສາເຫດຂອງການເຈັບປ່ວຍ ຫຼື ເສຍຊີວິດ ແລະ ເປັນການຢັ້ງຢືນພະຍາດອາ ຊີບທີ່ເກີດຈາກການເຮັດວຽກ ຊຶ່ງໃນນິຕິກຳໄດ້ກໍານົດວ່າ: ຜູ້ໃຊ້ແຮງງານຕ້ອງໃຫ້ຜູ້ອອກແຮງງານລາວ ແລະ ຕ່າງ ປະເທດໄດ້ຮັບການກວດສຸຂະພາບປະຈຳປີຢ່າງໜ້ອຍປີລະຄັ້ງ, ສຳລັບຜູ້ເຮັດວຽກທີ່ເປັນອັນຕະລາຍ 2 ຄັ້ງ/ປີ ຊຶ່ງບັນດາສູນກວດສຸຂະພາບແຮງງານທີ່ໄດ້ຮັບການອະນຸຍາດຈາກກະຊວງ ຮສສ ໃນການເຄື່ອນໄຫວກວດສຸຂະພາບໃຫ້ຜູ້ອອກແຮງງານມີໜ້າທີ່ສະໜອງການກວດສຸຂະພາບປະຈໍາປີໃຫ້ຜູ້ອອກແຮງງານ ທັງແຮງງານພາຍໃນ ແລະ ຕ່າງປະເທດ ທີ່ອອກແຮງງານຢູ່ ສປປ ລາວ, ແລ້ວລາຍງານຈໍານວນ ແລະ ຜົນການກວດໃຫ້ກົມຄຸ້ມຄອງແຮງງານ ຜ່ານລະບົບລາຍງານອີເລັກໂຕຣນິກ. ຂໍ້ມູນດັ່ງກ່າວນັ້ນຈະລວມສູນຢູ່ຖານຂໍ້ມູູນຂອງກົມຄຸ້ມຄອງແຮງງານ ເພື່ອໃຊ້ໃນການປະເມີນ ແລະ ວິເຄາະມາດຕະຖານດ້ານຄວາມປອດໄພ ແລະ ສຸຂະພາບແຮງງານໃນທຸກໆສະຖານທີ່ເຮັດວຽກ ເພື່ອນຳໃຊ້ເປັນຂໍ້ມູນໃຫ້ແກ່ການກໍານົດ, ສ້າງ ແລະ ປັບປຸງບັນດານິຕິກໍາ, ລະບຽບການຕ່າງໆ ແນໃສ່ສ້າງໃຫ້ທຸກສະຖານທີ່ເຮັດວຽກມີລະບົບການປ້ອງກັນຄວາມສ່ຽງ ຄວາມອັນຕະລາຍຕໍ່ຮ່າງກາຍ ແລະ ຈິດໃຈຂອງຜູ້ອອກແຮງງານ ແລະ ສ້າງວັດທະນະທຳຄວາມປອດໄພ ແລະ ສຸຂະພາບແຮງງານໃຫ້ນັບມື້ປະກົດຜົນເປັນຈິງ.
ຮ່ວມລົງນາມໃນຄັ້ງນີ້ມີ ທ່ານນາງ ບົວວັນ ປັນຍາວົງ ຮອງຫົວໜ້າກົມຄຸ້ມຄອງແຮງງານ ແລະ ຕາງໜ້າສູນກວດສຸຂະພາບຈາກ 6 ສູນມີ ທ່ານນາງ ມະນິລັກ ຈັນທະບູລີ ປະທານສູນກວດສຸຂະພາບແຮງງານໂຮງໝໍມິດຕະພາບ, ທ່ານ ຄໍາມຸງຄຸນ ບຸນເຮືອງຮຸງ ຮອງອຳນວຍການສູນກວດສຸຂະພາບໂຮງໝໍມະໂຫສົດ; ທ່ານ ພົມມະດີ ເວດສະພົງ ຮອງອຳນວຍການໂຮງໝໍກະເສມລາດ ສູນກວດສຸຂະພາບກະເສມລາດ, ທ່ານນາງ ເພັດໂສດາ ສີພັນດອນ ຮອງອຳນວຍການຝ່າຍບໍລິຫານ ສູນກວດສຸຂະພາບໂຮງໝໍຫຼັກໄຊ, ທ່ານ ສີຫາມະໂນ ບັນນະວົງ ຜູ້ບໍລິ ຫານສູງສຸດ ສູນກວດສຸຂະພາບອາດບູລີ-ສາກົນ ແລະ ທ່ານນາງ ມະໂນໃຈ ທ່ຽງເທບວົງສາ ອຳນວຍການໂຮງໝໍລາວ-ອາຊຽນ ສູນກວດສຸຂະພາບໂຮງໝໍລາວ-ອາຊຽນ.
ໂອກາດນີ້, ທ່ານຮອງລັດຖະມົນຕີກະຊວງ ຮສສ ໄດ້ມີຄຳເຫັນໂອ້ລົມຕໍ່ບັນດາສູນກວດສຸຂະພາບແຮງງານ ແລະ ພາກລັດຖະບານ ເພື່ອເຮັດໃຫ້ວຽກງານກວດສຸຂະພາບແຮງງານ ສາມາດຈັດຕັ້ງປະຕິບັດໄດ້ຢ່າງມີປະສິດທິຜົນ ໂດຍສະເພາະແມ່ນການສ້າງຖານເກັບກຳຂໍ້ມູນ, ການວິເຄາະວິໃຈຜົນການກວດສຸຂະພາບແຮງງານມັນເປັນພັນທະ ແລະ ມີຄວາມສຳຄັນຕໍ່ການເຊື່ອມໂຍງໃນຂົງເຂດອາຊຽນ, ພາກພື້ນ ແລະ ສາກົນ ພ້ອມທັງຮຽກຮ້ອງໃຫ້ທາງສູນກວດສຸຂະພາບ ແລະ ພາກລັດ ຮ່ວມມືກັນຢ່າງເຂັ້ມແຂງໃນການຈັດຕັ້ງປະຕິບັດວຽກງານດັ່ງກ່າວ.
ຂ່າວ-ພາບ: ພູວັນ
ຄໍາເຫັນ