ຂ່າວລະບຸວ່າ: ໂຕເລກຄາດຄະເນເສດຖະກິດຂອງ KDI ແມ່ນຮ້າຍແຮງກວ່າການຄາດຄະເນຂອງກອງທຶນເງິນຕາສາກົນ (IMF) ທີ່ຄາດຄະເນວ່າເສດຖະກິດ ສ ເກົາຫຼີ ຈະຂະຫຍາຍຕົວ 1% ໃນປີ 2025 ແລະ ຕ່ຳກວ່າອົງການຮ່ວມມືດ້ານເສດຖະກິດ ແລະ ການພັດທະນາ (OECD) ທີ່ຄາດຄະເນວ່າຈະຂະຫຍາຍຕົວ 1.5%.
KDI ລະບຸໃນບົດລາຍງານທ່າອ່ຽງເສດຖະກິດສະບັບຫຼ້າສຸດທີ່ນຳອອກມາເຜີຍແຜ່ໃນວັນທີ 14 ພຶດສະພາ ຜ່ານມາວ່າ: ເມື່ອພິຈາລະນາຈາກສະພາບການທັງພາຍໃນ ແລະ ຕ່າງປະເທດ ພົບວ່າເສດຖະກິດຂອງ ສ ເກົາຫຼີ ມີທ່າອຽງຂະຫຍາຍຕົວໃນຈັງຫວະຊ້າລົງ. ເນື່ອງຈາກສະພາບການການຄ້າ ແລະ ການສົ່ງອອກທີ່ຊຸດໂຊມລົງ ພ້ອມທັງລະບຸເຖິງສະພາບການຄ້າທີ່ເຄັ່ງຕຶງໃນທົ່ວໂລກເມື່ອບໍ່ດົນມານີ້. ໂດຍຊີ້ອອກວ່າ, ສະຫະລັດ ອາເມຣິກາ ໄດ້ປັບຂຶ້ນອັດຕາພາສີໃນເດືອນເມສາ ຜ່ານມາ ຍິ່ງເພີ່ມຄວາມບໍ່ແນ່ນອນໃຫ້ແກ່ນະໂຍບາຍການຄ້າ
KDI ຍັງລະບຸວ່າ: ເຖິງແມ່ນວ່າອຸດສາຫະກໍາ semiconductor ດຳເນີນງານຂ້ອນຂ້າງດີ, ແຕ່ວ່າການສົ່ງອອກຊ້າລົງໂດຍລວມ. ເນື່ອງຈາກຂະແໜງການອື່ນໆດຳເນີນການຫຼຸດລົງ ພ້ອມກັບຄາດຄະເນວ່າການສົ່ງອອກຈະຊຸດໂຊມລົງໃນຫຼາຍເດືອນຕໍ່ໜ້າຍ້ອນຜົນກະທົບຈາກການຂຶ້ນພາສີ.
ທັງນີ້, KDI ເຕືອນວ່າ: ການປ່ຽນແປງທາງດ້ານປະຊາກອນ ແລະ ຄວາມບໍ່ແນ່ນອນທາງດ້ານເສດຖະກິດທີ່ເພີ່ມຂຶ້ນຈະສ້າງຄວາມກົດດັນໃຫ້ຕະຫຼາດແຮງງານປະເຊີນກັບການຫຼຸດລົງ. ໂດຍຄາດວ່າຈຳນວນປະຊາກອນທີ່ມີວຽກເຮັດງານທຳຈະເພີ່ມຂຶ້ນພຽງ 90,000 ຄົນໃນປີ 2025, ຫຼຸດລົງຈາກ 160,000 ຄົນໃນປີກາຍ ແລະ ຄາດວ່າໂຕເລກດັ່ງກ່າວຈະຫຼຸດລົງເຖິງ 70,000 ໃນປີ 2026, ໃນຂະນະທີ່ອັດຕາການວ່າງງານຄາດວ່າຈະເພີ່ມຂຶ້ນເຖິງ 3% ໃນປີ2025 ແລະ 2026, ຈາກ 2.8% ໃນປີກາຍນີ້.
ນອກຈາກນີ້, KDI ຍັງຄາດຄະເນວ່າ: ອັດຕາເງິນເຟີ້ຈະເພີ່ມຂຶ້ນເລັກນ້ອຍໃນປີນີ້. ເນື່ອງຈາກຄວາມຕ້ອງການພາຍໃນປະເທດທີ່ອ່ອນແອ ແລະ ລາຄານ້ຳມັນທີ່ຫຼຸດລົງ, ດັດຊະນີລາຄາໃຊ້ສອຍ (CPI) ຄາດວ່າຈະເພີ່ມຂຶ້ນ 1.7% ໃນປີ 2025 ແລະ ເພີ່ມຂຶ້ນ 1.8% ໃນປີ 2026.
ຄໍາເຫັນ