ສໍາລັບອາການຂອງພະຍາດໄຂ້ຍຸງລາຍມີ 3 ປະເພດຄື: 1) ໄຂ້ຍຸງລາຍບໍ່ມີອາການເຕືອນ: ພະຍາດໄຂ້ຍຸງລາຍ ໂດຍທົ່ວໄປແມ່ນມີອາການຄ້າຍຄືໄຂ້ຫວັດ ແລະ ມີອາການປະມານ 2-7 ມື້. ຕາມປົກກະຕິແລ້ວຈະສະແດງອາການພາຍຫຼັງຍຸງກັດ 4-10 ມື້ ຊຶ່ງອາການສະແດງອອກຈະມີໄຂ້ສູງ ແລະ ມີຢ່າງໜ້ອຍ 2 ອາການຄື: ເຈັບຫົວ, ເຈັບກະໂບງຕາ, ປວດຮາກ, ຮາກ, ໜ້າຕາແດງ, ຕ່ອມນໍ້າເຫຼືອງໃຫຍ່, ປວດຕາມຂໍ້, ກະດູກ, ກ້າມຊີ້ນ ຫຼື ມີຕຸ່ມຕາມໂຕ; 2) ໄຂ້ຍຸງລາຍມີອາການເຕືອນ: ອາການສະແດງອອກເຈັບທ້ອງແຮງ ຫຼື ທ້ອງເບັງ, ຮາກຕະຫຼອດ, ມີອາການອັ່ງນໍ້າ, ເລືອດອອກຕາມເຫຍື່ອເມືອກ, ງ້ວງຊຶມ, ເມື່ອຍແຮງ ແລະ 3) ໄຂ້ຍຸງລາຍຮ້າຍແຮງ: ເມື່ອກ້າວເຂົ້າສູ່ໄລຍະອັນຕະລາຍ, ໃນໄລຍະນີ້ຈະໃຊ້ ເວລາປະມານ 3-7 ມື້ ພາຍຫຼັງມື້ທຳອິດຂອງອາການໄຂ້. ອາການໄຂ້ຈະເຊົາ ຫຼື ຫຼຸດລົງ ແຕ່ບໍ່ໄດ້ໝາຍຄວາມວ່າຄົນເຈັບຈະເຊົາແລ້ວ. ແຕ່ໃນທາງກົງກັນຂ້າມ ຄົນເຈັບອາດຈະສາມາດເປັນໄຂ້ຍຸງລາຍຮ້າຍແຮງໄດ້ ຕ້ອງໄດ້ເອົາໃຈໃສ່ຕິດຕາມອາການເຕືອນຕ່າງໆ ເຊັ່ນ: ຫາຍໃຈໄວ, ມີອາການເຈັບທ້ອງຮຸ່ນແຮງ, ຮາກຫຼາຍເທື່ອຕໍ່ເນື່ອງ, ເລືອດເຟັນແຂ້ວອອກ, ຮາກອອກເລືອດ, ອິດເມື່ອຍ ຫຼື ເຈັບໜ້າເອິກ.
ຢ່າງໃດກໍຕາມ ພະຍາດໄຂ້ຍຸງລາຍບໍ່ມີຢາປິ່ນປົວໂດຍສະເພາະ. ສະນັ້ນ, ເມື່ອຮູ້ສຶກບໍ່ສະບາຍ ບໍ່ຄວນຊື້ຢາມາກິນເອງ ຄວນໄປພົບແພດໃກ້ບ້ານທ່ານເຊັ່ນ: ໂຮງໝໍເມືອງ, ແຂວງ, ສູນກາງ, ສຸກສາລາ ແລະ ອື່ນໆ ທີ່ໃຫ້ບໍລິການ ເພື່ອປິ່ນປົວໃຫ້ຖືກຕ້ອງ ແລະ ທັນເວລາ. ສິ່ງສໍາຄັນເມື່ອສົງໄສເປັນໄຂ້ຍຸງລາຍຮ້າຍແຮງ, ຄົນເຈັບຕ້ອງໄດ້ຮັບການຕິດຕາມຢ່າງໃກ້ຊິດຈາກແພດໝໍໃນທັນທີ.
(ຂໍ້ມູນ: ກະຊວງສາທາລະນະສຸກ)
ຄໍາເຫັນ