ບົດລາຍງານທີ່ເຜີຍແຜ່ໃນວັນທີ 9 ກຸມພາ ຜ່ານມາ ຊີ້ໃຫ້ເຫັນວ່າ: ໃນປີ 2023, ການບໍລິໂພກນໍ້າຕານໂດຍສະເລ່ຍຕໍ່ຄົນໃນ ສ ເກົາຫຼີ ແມ່ນ 59.8 ກຣາມຕໍ່ມື້, ເພີ່ມຂຶ້ນຈາກ 58.7 ກຣາມໃນປີ 2020. ໃນຂະນະທີ່ໂຕເລກນີ້ຫຼຸດລົງຢ່າງຫຼວງຫຼາຍຈາກ 67.9 ກຣາມໃນປີ 2016, ແຕ່ມັນໄດ້ສະແດງໃຫ້ເຫັນທ່າອ່ຽງທີ່ເພີ່ມຂຶ້ນໃນຊຸມປີມໍ່ໆມານີ້.
ໃນຂະນະດຽວກັນ, ອັດຕາຂອງປະຊາກອນທີ່ບໍລິໂພກນໍ້າຕານຫຼາຍເກີນໄປ ຫຼື ຜູ້ທີ່ໄດ້ຮັບພະລັງງານຈາກນໍ້າຕານຫຼາຍກວ່າ 20% ຂອງປະລິມານພະລັງງານທັງໝົດຕໍ່ມື້ ບັນລຸ 16.9% ໃນປີ 2023, ທຽບກັບ 15.2% ໃນປີ 2020 ແລະ 15.8% ໃນປີ 2021 ແລະ 2022.
ເມື່ອພິຈາລະນາກຸ່ມອາຍຸພົບວ່າ: ເດັກນ້ອຍອາຍຸຕ່ຳກວ່າ 9 ປີມີອັດຕາການບໍລິໂພກນ້ຳຕານຫຼາຍເກີນໄປ ສູງເຖິງ 26.7%, ຕິດຕາມມາດ້ວຍໄວໜຸ່ມ ອາຍຸ 10-18 ປີ ທີ່ 17.4% ແລະ ຜູ້ທີ່ມີອາຍຸ 19-29 ປີ ທີ່ 17%. ຕາມເພດ, ແມ່ຍິງມີອັດຕາສ່ວນການບໍລິໂພກນ້ຳຕານຫຼາຍເກີນໄປ ສູງສຸດເຖິງ 21%, ເມື່ອທຽບກັບຜູ້ຊາຍທີ່ 12.9%.
ສຳລັບແຫຼ່ງທີ່ມາຂອງນ້ຳຕານ ພົບວ່າ: ຊາ ແລະ ເຄື່ອງດື່ມອື່ນໆແມ່ນສາເຫດຫຼັກຂອງການບໍລິໂພກນໍ້າຕານຫຼາຍເກີນໄປ, ຕິດຕາມມາດ້ວຍໝາກໄມ້, ຜະລິດຕະພັນນົມ, ຂອງຫວານແຊ່ແຂງ ແລະ ເຂົ້າຈີ່ ຫຼື ຄຸກກີ້.
ເມື່ອບໍ່ດົນມານີ້, ທ່ານ ລີແຈມຽງ ປະທານາທິບໍດີ ສ ເກົາຫຼີ ໄດ້ສະເໜີໃຫ້ມີການເກັບພາສີນ້ຳຕານ (Sugar Tax) ຊຶ່ງເຮັດໃຫ້ເກີດການຖົກຖຽງກັນໃນຊາວເກົາຫຼີ ວ່າ: ຄວນໃຊ້ພາສີເພື່ອຄວບຄຸມການບໍລິໂພກນ້ຳຕານ ແລະ ນຳລາຍຮັບຈາກພາສີເຫຼົ່ານັ້ນໄປສະໜັບສະໜູນລະບົບບໍລິການດູແລສຸຂະພາບ ຫຼື ບໍ?.
ຄໍາເຫັນ