ກອງປະຊຸມ, ມີເປົ້າໝາຍເພື່ອດູແລແມ່ຍິງຖືພາ ແລະ ແມ່ຍິງລາວ ໃຫ້ມີສຸຂະພາບທີ່ສົມບູນ ດ້ວຍການປິ່ນປົວທີ່ມີຄຸນນະພາບຕາມມາດຕະຖານສາກົນ ເພື່ອຊ່ວຍຫຼຸດຜ່ອນການເຈັບເປັນ ແລະ ເສຍຊີວິດຂອງແມ່ ແລະ ຍັງເປັນບ່ອນທີ່ເພີ່ມພູນຄວາມຮູ້, ຄວາມສາມາດ ໃຫ້ທ່ານໝໍ ທີ່ເຮັດໜ້າທີ່ປິ່ນປົວປະສູດ-ພະຍາດຍິງ ໄດ້ແລກປ່ຽນຄວາມຮູ້, ຖອດຖອນບົດຮຽນ ຊຶ່ງກັນ ແລະ ກັນ ພ້ອມທັງປະສົບການຕ່າງໆທີ່ພົບໃນແຕ່ລະໂຮງໝໍ ໃນທົ່ວປະເທດ. ເນື່ອງຈາກການເສຍຊິວິດຂອງແມ່ຍັງເປັນໜຶ່ງເງື່ອນໄຂ ເຮັດໃຫ້ປະເທດລາວຫຼຸດພົ້ນອອກຈາກຄວາມທຸກຍາກໃນ ປີ 2030 ທີ່ລັດຖະບານໄດ້ວາງໄວ້. ເຖິງວ່າໃນໃລຍະຜ່ານມາອັດຕາການຕາຍຂອງແມ່ຈະຫຼຸດລົງຢ່າງຕໍ່ເນື່ອງກໍຕາມ ແຕ່ຍັງບໍ່ທັນບັນລຸຕາມເປົ້າໝາຍທີ່ກໍານົດໄວ້. ສະນັ້ນ, ວຽກງານການປ້ອງກັນ ແລະ ສົ່ງເສີມສຸຂະພາບແມ່ຍິງ ແລະ ແມ່ຖືພາ ແມ່ນມີຄວາມສຳຄັນຫຼາຍ ເພື່ອເຮັດໃຫ້ແມ່ຍິງລາວເຮົາມີສຸຂະພາບທີ່ດີ ການທີ່ຈະບັນລຸເປົ້າໝາຍດັ່ງກ່າວໄດ້ ຈໍາເປັນຕ້ອງຮຽກຮ້ອງໃຫ້ມີສ່ວນຮ່ວມຂອງທຸກພາກສ່ວນທີ່ກ່ຽວຂ້ອງທັງພາຍໃນ-ສາກົນ ພ້ອມທັງການຮ່ວມມືທີ່ດີຂອງປະຊາຊົນ.
ໂອກາດນີ້, ທ່ານ ນາງ ແກ້ວເກດທອງ ພົງສະຫວັນ ລາຍງານໃຫ້ຮູ້ວ່າ: ແພດປະສູດ-ພະຍາດຍິງ ເຮົາໄດ້ມີການເຕີບໃຫຍ່ຂະຫຍາຍຕົວຢ່າງຕໍ່ເນື່ອງ ຕັ້ງແຕ່ເລີ່ມມີການກໍ່ສ້າງແພດຊ່ຽວຊານປະສູດ-ພະຍາດຍິງ ແຕ່ປີ 2006 ເຖິງ ປີ 2025 ມີແພດຊ່ຽວຊານປະສູດ-ພະຍາດຍິງຂັ້ນ I ທັງໝົດ 117 ຄົນ (ສູນກາງ 85 ຄົນ, ຕ່າງແຂວງ 92 ຄົນ) ແລະ ກໍາລັງຮຽນໃນປີ 2025 ມີ 39 ຄົນ. ສ່ວນແພດຊ່ຽວຊານຂັ້ນ II ແມ່ນກໍາລັງກະກຽມຫຼັກສູດ ແລະ ອາຈານສອນໃນມະຫາວິທະໄລ: ຫຼັກສູດ MFM, ມະເຮັງພະຍາດຍິງ. ໃນທາງດ້ານວິຊາການເຫັນວ່າທ່ານໝໍແພດຊ່ຽວຊານປະສູດ-ພະຍາດຍິງມີຄວາມເຂັ້ມແຂງໃນລະດັບມາດຕະຖານຂອງຂົງເຂດ. ໃນການໃຫ້ບໍລິການປິ່ນປົວຫາກມີກໍລະນີທີ່ຄົນເຈັບມີອາການສຸກເສີນຕ່າງໆ ຊອກຫາບັນຫາທີ່ເປັນສາເຫດຂອງການເຈັບເປັນ ແລະ ເສຍຊິວິດ ເພື່ອນຳມາສູ່ວິທີແກ້ໄຂຊ່ວຍກັນເລິກເຊິ່ງນັບແຕ່ຂັ້ນສູນກາງຈົນຮອດທ້ອງຖິ່ນ ໃຫ້ມີການປະສານງານທີ່ມີຄຸນນະພາບໃນການສົ່ງຕໍ່ຄົນເຈັບ ລະຫວ່າງໂຮງໝໍ ຂັ້ນຕ່າງໆໃຫ້ຖືກຕ້ອງ, ທັນເວລາ ແລະ ຮັບປະກັນຄວາມປອດໄພ ເພື່ອຮັບປະກັນຄຸນນະພາບ ຂອງວຽກງານນາລີເວດ-ສູຕິສາດຂອງລາວເຮົາໃຫ້ທຽບເທົ່າສາກົນ.
(ຂ່າວ: ວັນເພັງ, ຂໍ້ມູນ: ສູນຂ່າວສານການແພດ ກະຊວງສາມາລະນະສຸກ)
ຄໍາເຫັນ