ສະຫາຍ ນາງ ຈັນທະບູນ ໂພສະລາດ ຄະນະປະຈຳພັກແຂວງ, ຫົວໜ້າຄະນະຈັດຕັ້ງແຂວງວຽງຈັນ, ສະຫາຍ ອິນປອນ ມະນີແສງ ກຳມະການພັກແຂວງ, ເລຂາຄະນະພັກຮາກຖານ, ຫົວໜ້າພະແນກສາທາລະນາສຸກແຂວງ, ມີຄະນະພັກຮາກຖານ, ຄະນະຊີ້ນຳການກະກຽມກອງປະຊຸມໃຫຍ່, ພ້ອມດ້ວຍສະມາຊິກພັກສົມບູນເຂົ້າຮ່ວມ ທັງໝົດ 188 ສະຫາຍ, ຍິງ 124 ສະຫາຍ.
ສະຫາຍ ອິນປອນ ມະນີແສງ ກໍາມະການພັກແຂວງ ເລຂາຄະນະພັກຮາກຖານ ຫົວໜ້າພະແນກສາທາລະນາສຸກແຂວງ ໄດ້ຜ່ານຮ່າງລາຍງານການເມືອງ ບາງຕອນວ່າ: ຄະນະພັກຮາກຖານ, ໜ່ວຍພັກ ໄດ້ຖືສຳຄັນວຽກງານສຶກສາອົບຮົມການເມືອງ-ນຳພາແນວຄິດເປັນກົກ ແລະ ສອດຫ້ອຍເຂົ້າໃນທຸກວຽກງານ, ໄດ້ນໍາພາການຈັດຕັ້ງເຊື່ອມຊຶມ ແລະ ຜັນຂະຫຍາຍແນວທາງແຜນນະໂຍບາຍຂອງພັກ, ຄົ້ນຄວ້າຮໍ່າຮຽນທິດສະດີການເມືອງ, ແນວຄິດໄກສອນ ພົມວິຫານ, ບັນດາຂໍ້ກຳນົດກົດໝາຍ ແລະ ລະບຽບການຕ່າງໆ, ເອົາໃຈໃສ່ປັບປຸງກໍ່ສ້າງພັກ ຕາມ 5 ຫຼັກການ 3 ທິດນໍາ ເຮັດໃຫ້ການຈັດຕັ້ງພັກ ມີຄວາມໜັ້ກແໜ້ນ ເຂັ້ມແຂງສາມາດເປັນແກນນໍາໃນລະບົບການເມືອງຢ່າງແທ້ຈິງ, ນຳພາສ້າງແຜນການ ກໍ່ສ້າງໜ່ວຍພັກປອດໃສ ເຂັ້ມແຂງ, ໜັກແໜ້ນ, ດຳເນີນຊີວິດການເມືອງປັບປຸງປົວແປງພັກຢ່າງເປັນປົກກະຕິ.
ສະຫາຍ ນາງ ວັນເພັງ ພັນທະນາໄລ ຄະນະພັກຮາກຖານ, ຜູ້ອຳນວຍການໂຮງໝໍແຂວງ ໄດ້ຂຶ້ນຮ່າງບົດສໍາຫຼວດການນໍາພາລວມຂອງຄະນະພັກຮາກຖານ ວ່າ: ຄະນະພັກຮາກຖານພະແນກສາທາລະນາສຸກແຂວງ ປະກອບມີ 4 ໜ່ວຍພັກຮາກຖານຂຶ້ນກັບຄື: ໜ່ວຍພັກບໍລິຫານ, ໜ່ວຍພັກອານາໄມກັນພະຍາດ ສົ່ງເສີມສຸຂະພາບ, ໜ່ວຍພັກໂຮງຮຽນສາທາລະນະສຸກວຽງຈັນ ແລະ ໜ່ວຍພັກໂຮງໝໍແຂວງ. ຈາກນັ້ນ, ໃນກອງປະຊຸມ ຍັງໄດ້ຮັບຮອງເອົາຄະນະພັກຮາກຖານ ຈໍານວນ 5 ສະຫາຍ ຍິງ 2 ສະຫາຍ ຄື: ສະຫາຍ ນາງ ວັນເພັງ ພັນທະນາໄລ ເປັນເລຂາຄະນະພັກຮາກຖານ, ສະຫາຍ ສີໂຫ ແສງສະຫວ່າງ ເປັນຮອງເລຂາຄະນະພັກຮາກຖານ ແລະ ຮັບຮອງເອົາຜູ້ແທນສົມບູນ ແລະ ສຳຮອງໄປເຂົ້າຮ່ວມກອງປະຊຸມໃຫຍ່ຜູ້ແທນອົງຄະນະພັກແຂວງວຽງຈັນ ຄັ້ງທີ VII ຄື: ສະຫາຍ ນາງ ວັນເພັງ ພັນທະມາໄລ ເປັນຜູ້ແທນສົມບູນ ແລະ ສະຫາຍ ສີໂຫ ແສງສະຫວ່າງ ເປັນຜູ້ແທນສໍາຮອງ.
(ແຫຼ່ງຂ່າວ: ແຂວງວຽງຈັນ)
ຄໍາເຫັນ