ລັດຖະມົນຕີກະຊວງສາທາລະນະສຸກ ຢ້ຽມຢາມໂຮງໝໍຊຸມຊົນ ເມືອງເງິນ

ທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ພ້ອມຄະນະການນຳກະຊວງສາທາລະນະສຸກ ໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ໂຮງໝໍຊຸມຊົນເມືອງເງິນ ແຂວງໄຊຍະບູລີ ຫວ່າງບໍ່ດົນມານີ້, ໂດຍເປັນກຽດຕ້ອນຮັບຂອງທ່ານ ທະວິສັກ ໄຊຍະວົງ ເຈົ້າເມືອງໆເງິນ, ມີຫົວໜ້າພະແນກສາທາລະນະສຸກແຂວງ, ຜູ້ອຳນວຍການໂຮງໝໍແຂວງ, ຫົວໜ້າຫ້ອງການສາທາລະນະສຸກເມືອງ, ຜູ້ອຳນວຍການໂຮງໝໍຊຸມຊົນເມືອງເງິນ ພ້ອມດ້ວຍຄະນະ ແລະ ພະນັກງານ-ລັດຖະກອນແພດໝໍ ເຂົ້າຮ່ວມຕ້ອນຮັບຢ່າງອົບອຸ່ນ.
    ທ່ານ ບຸນເລືອນ ບົວໄລ ຮອງເຈົ້າເມືອງໆເງິນ ຜູ້ຊີ້ນຳຂົງເຂດວັດທະນະທຳ-ສັງຄົມ ກໍໄດ້ລາຍງານຫຍໍ້ ສະພາບການຈັດຕັ້ງປະຕິບັດວຽກງານສາທາລະນະສຸກ ຢູ່ເມືອງເງິນ ຊຶ່ງການນໍາພາ-ຊີ້ນໍາຕໍ່ວຽກງານສາທາລະນະສຸກ ຍາມໃດກໍຖືເປັນວຽກບຸລິມະສິດ, ຄະນະພັກ-ອົງການປົກຄອງເມືອງ ໄດ້ເອົາໃຈໃສ່ຊີ້ນໍາຢ່າງໃກ້ຊິດຕິດແທດ ແລະ ຕິດພັນກັບການຊຸກຍູ້ວຽກວິຊາສະເພາະໄດ້ສຸມໃສ່ການຈັດຕັ້ງປະຕິບັດ ນະໂຍບາຍດ້ານສາທາລະນະສຸກທີ່ວ່າຖືເອົາວຽກງານການອະນາໄມກັນພະຍາດ ແລະ ສົ່ງເສີມສຸຂະພາບເປັນຕົ້ນຕໍໄປພ້ອມກັບການຖືເອົາວຽກງານການປິ່ນປົວ ສະໜອງການບໍລິການ ດ້ານສຸຂະພາບຢ່າງທົ່ວເຖິງ, ມີຄຸນນະພາບ, ຍຸຕິທໍາ ແລະ ສະເໝີພາບ ເປັນສໍາຄັນ ສຸມໃສ່ການປັບປຸງຄຸນນະພາບການບໍລິການປິ່ນປົວຢູ່ໂຮງໝໍແຕ່ລະຂັ້ນ ໃຫ້ເປັນໄປຕາມນະໂຍບາຍ 5 ດີ 1 ພໍໃຈ. ມາຮອດປັດຈຸບັນທົ່ວເມືອງມີບ້ານສາທາລະນະສຸກແບບຢ່າງທັງໝົດ 22 ບ້ານ ເທົ່າກັບ 100% ພິເສດເມືອງເງິນ ສາມາດປະກາດເປັນເມືອງຢຸດຕິການຖ່າຍຊະຊາຍ,ທົ່ວເມືອງມີໂຮງໝໍຊຸມຊົນເມືອງ 1 ແຫ່ງ, ມີໂຮງໝໍນ້ອຍ 6 ແຫ່ງ,ການເຂົ້າເຖິງການບໍລິການໄດ້ປົກຄຸມເອົາ 100%.
ຕອນທ້າຍ, ທ່ານ  ບຸນແຝງ ພູມມະໄລສິດ ກໍໄດ້ມີຄຳເຫັນຊີ້ນຳ ແລະ ເນັ້ນໜັກ ໃຫ້ ບັນດາບຸກຄາລະກອນ ໃຫ້ຖືເອົາວຽກງານການປິ່ນປົວສະໜອງການບໍລິການດ້ານສຸຂະພາບ, ມີຄຸນນະພາບ, ມີຈັນຍາບັນ, ຈັນຍາທໍາ ແລະ ຄວາມສະເໝີພາບ ເປັນສໍາຄັນສຸມໃສ່ການປັບປຸງຄຸນນະພາບການບໍລິການ ປິ່ນປົວຢູ່ໂຮງໝໍ ໃຫ້ເປັນໄປຕາມນະໂຍບາຍ 5 ດີ 1 ພໍໃຈ.ເພື່ອແນໃສ່ເຮັດໃຫ້ວຽກສາທາລະນະສຸກເມືອງເງິນ, ໄດ້ມີທວງທ່າຂະຫຍາຍຕົວ ແລະ ມີຄຸນນະພາບຂຶ້ນໄປເລື້ອຍໆ.
ຈາກນັ້ນ, ທ່ານລັດຖະມົນຕີ ພ້ອມດ້ວຍຄະນະ ກໍໄດ້ລົງກວດເບິ່ງໂຄງການກໍ່ສ້າງ ສະຖານທີ່ບຳບັດນ້ຳເສຍ ຢູ່ໂຮງໝໍຊຸມຊົນເມືອງເງິນ ອີກດ້ວຍ.
ຂ່າວ:ອິນແປງ ແຫວນຄຳ, ພາບ: ສຸລິຍາ ແສງເດືອນ