 |
ໂຄງການດັ່ງກ່າວ, ແມ່ນເພື່ອແນໃສ່ແກ້ໄຂອັດຕາການຕາຍຂອງ ແມ່ ແລະ ເດັກ ທີ່ຂ້ອນຂ້າງສູງຢູ່ໃນເຂດຊົນນະບົດ ຂອງ ສປປ ລາວ ໂດຍຈະຈັດຕັ້ງປະຕິບັດ ຢູ່ເມືອງໄຊບົວທອງ ແຂວງຄໍາມ່ວນ, ງົບປະມານໂຄງການທັງໝົດ 360,000 ໂດລາສະຫະລັດ. ໃນນັ້ນ, ສະໜັບສະໜູນໂດຍອົງການໄອຊັບ ຈໍານວນ 67,500 ໂດລາ ແລະ ອົງການຮ່ວມມືສາກົນຍີປຸ່ນ 292,000 ໂດລາ, ໄລຍະເວລາໃນການຈັດຕັ້ງປະຕິບັດ ນັບແຕ່ເດືອນ ພຶດສະພາ 2026 ຫາ ເດືອນມິຖຸນາ 2029.
ຮ່ວມລົງນາມໃນບົດບັນທຶກດັ່ງກ່າວ ໂດຍທ່ານ ແກ່ນຈັນ ທອງສະຫວັດ ຫົວໜ້າພະແນກສາທາລະນະສຸກແຂວງຄໍາມ່ວນ, ທ່ານ ທະກະເອະສິ ຫົວໜ້າໂຄງການໄອຊັບ ປະຈໍາ ສປປ ລາວ, ໂດຍມີທ່ານ ເດດສັກດາ ມະນີຄໍາ ຮອງປະທານຄະນະກຳມະການປົກຄອງແຂວງຄໍາມ່ວນ, ທ່ານ ອັນໂດະ ຮິຊາໂອະ ຫົວໜ້າອົງການໄອຊັບ ປະຈໍາໂຕກຽວ ປະເທດຍີປຸ່ນ, ມີບັນດາພະແນກການຂັ້ນແຂວງ, ຂະແໜງການກ່ຽວຂ້ອງຂັ້ນເມືອງເຂົ້າຮ່ວມ.
(ຂ່າວ: ກອງຄໍາ)
ຄໍາເຫັນ