 |
ກອງປະຊຸມຄັ້ງນີ້, ເປັນການລິເລີ່ມສ້າງ, ເສີມຂະຫຍາຍ ແລະ ແລກປ່ຽນຮຽນຮູ້ດ້ານການເງິນສາທາລະນະສຸກ ແລະ ເສດຖະສາດສາທາລະນະສຸກ ເປົ້າໝາຍເພື່ອການພັດທະນາຫຼັກສູດການຝຶກອົບຮົມໄລຍະສັ້ນ ແລະ ພິຈາລະນາເຊື່ອມສານເນື້ອໃນດັ່ງກ່າວເຂົ້າໃນຫຼັກສູດລະດັບປະລິນຍາຕີ, ປະລິນຍາໂທ ແລະ ປະລິນຍາເອກ ຂອງ ມວສ. ໃນນັ້ນ, ໄດ້ມີການນໍາສະເໜີສະພາບລວມແຜນການພັດທະນາຫຼັກສູດເສດຖະສາດ-ການເງິນ ສາທາລະນະສຸກ ເປັນ 4 ໂມດູນ (module): ການເງິນສາທາລະນະສຸກແບບປະຍຸກໃຊ້; ເສດຖະສາດສາທາລະນະສຸກແບບປະຍຸກໃຊ້; ການປະເມີນຄວາມຄຸ້ມຄ່າທາງການແພດ ແລະ ສາທາລະນະສຸກ ແລະ ການປະເມີນເຕັກໂນໂລຊີທາງການແພດ. ຫຼັງຈາກນັ້ນ, ໄດ້ມີການເຮັດໝູນວຽນກຸ່ມສົນທະນາ ເພື່ອປຶກສາຫາລື ແລະ ຮ່ວມກັນພັດທະນາຫຼັກສູດຝຶກອົບຮົມໄລຍະສັ້ນ. ພ້ອມນັ້ນ, ໄດ້ການນໍາສະເໜີລາຍວິຊາທີ່ກ່ຽວຂ້ອງກັບເສດຖະສາດ-ການເງິນ ສາທາລະນະສຸກ ທີ່ມີໃນຫຼັກສູດປະລິນຍາໂທ ຂອງຄະນະສາທາລະນະສຸກສາດ ແລະ ເຮັດການໝູນວຽນກຸ່ມສົນທະນາ ເພື່ອປຶກສາຫາລືການເຊື່ອມສານລາຍວິຊາຂອງເສດຖະສາດ-ການເງິນ ສາທາລະນະສຸກ ເຂົ້າໃນຫຼັກສູດລະດັບປະລິນຍາຕີ, ປະລິນຍາໂທ ແລະ ປະລິນຍາເອກ ຂອງ ມວສ.
 |
(ຂ່າວ: ວັນເພັງ, ຂໍ້ມູນ-ພາບ: ກະຊວງສາທາລະນະສຸກ)
ຄໍາເຫັນ