ໂດຍມີທ່ານ ໄພວັນ ແກ້ວປະເສີດ ຮອງລັດຖະມົນຕີກະຊວງສາທາລະນະສຸກ, ທ່ານນາງ ວັນເນສຊາ ເຮກາທີ ເລຂາເອກຈາກສະຖານທູດອົສຕຣາລີປະຈຳລາວ, ມີປະທານສະມາຄົມສົ່ງເສີມສຸຂະພາບຄອບຄົວ ພ້ອມດ້ວຍພາກສ່ວນທີ່ກ່ຽວ ຂ້ອງເຂົ້າຮ່ວມເປັນສັກຂີພິຍານ.
ທ່ານ ໄພວັນ ແກ້ວປະເສີດ ກ່າວວ່າ: ການລົງນາມໃນຄັ້ງນີ້, ເປັນບາດກ້າວສຳຄັນອັນໜຶ່ງໃນການສ້າງຄູ່ຮ່ວມງານລະຫວ່າງລັດຖະບານ ແລະ ອົງການຈັດຕັ້ງທາງສັງຄົມ ໃນການສົ່ງເສີມວຽກງານສຸຂະພາບຈະເລີນພັນ, ການວາງແຜນຄອບຄົວ, ການລຸລູກປອດໄພ ແລະ ການສົ່ງເສີມສິດທິທາງເພດ ເພື່ອປະກອບສ່ວນໃຫ້ບັນລຸຕາມເປົ້າໝາຍການພັດທະນາແບບຍືນຍົງ (SDGs) ຂອງ ສປປ ລາວ ໂດຍສະເພາະແມ່ນເປົ້າໝາຍທີ 3, 5 ແລະ 17. ເປົ້າໝາຍທີ 3: ຮັບປະກັນການມີສຸຂະພາບທີ່ດີ ແລະ ສົ່ງເສີມຊີວິດການເປັນຢູ່ທີ່ດີຂອງທຸກຄົນທຸກເກນອາຍຸ; ເປົ້າໝາຍທີ 5: ບັນລຸຄວາມສະເໝີພາບລະຫວ່າງຍິງ-ຊາຍ, ສ້າງຄວາມເຂັ້ມແຂງໃຫ້ແມ່ຍິງ ແລະ ເດັກຍິງທຸກຄົນ; ເປົ້າໝາຍທີ 17: ສ້າງຄວາມເຂັ້ມແຂງໃຫ້ການຈັດຕັ້ງປະຕິບັດ ແລະ ຟື້ນຟູການເປັນຄູ່ຮ່ວມສາກົນ ເພື່ອການພັດທະນາແບບຍືນຍົງ. ໂຄງການນີ້, ຍັງເປັນທ່າແຮງທີ່ສໍາຄັນໃນການປະກອບສ່ວນຕໍ່ແຜນພັດທະນາເສດຖະກິດ-ສັງຄົມແຫ່ງຊາດ, ການປັບປຸງອັດຕາຂອງການຄຸມກໍາເນີດທີ່ມີປະສິດທິພາບ ໂດຍສະເພາະການຄຸມກຳເນີດໃນກຸ່ມໄວໜຸ່ມທີ່ເປັນມິດປິດລັບ, ການຫັນໄປຊົມໃຊ້ວິທີການຄຸມກຳເນີດທີ່ທັນສະໄໝ, ການຄຸມກຳເນີດທີ່ອອກລິດໄລຍະຍາວ, ການເຂົ້າເຖິງການຝາກທ້ອງ, ການເກີດລູກມີແພດຊ່ວຍ ແລະ ການເຂົ້າເຖິງການບໍລິການລຸລູກປອດໄພ ລວມທັງການຮັບປະກັນການໃຫ້ບໍລິການກໍລະນີແມ່ຍິງ ແລະ ເດັກທີ່ຖືກຄວາມຮຸນແຮງທາງເພດໃຫ້ເຂົ້າເຖິງການຊ່ວຍການບໍລິການທາງດ້ານສຸຂະພາບ ແລະ ການຊ່ວຍເຫຼືອທາງດ້ານສັງຄົມໃຫ້ທັນເວລາ ທັງຫຼຸດຜ່ອນອັດຕາການເສຍຊີວິດຂອງແມ່ ແລະ ເດັກໃນ ສປປ ລາວ ແລະ ສົ່ງເສີມໃຫ້ທຸກຄົນ, ຄອບຄົວຂອງເຂົາເຈົ້າໄດ້ມີຊີວິດທີ່ປອດໄພ ແລະ ມີສຸຂະພາບທີ່ດີ.
(ຂ່າວ: ວັນເພັງ, ພາບ: ກະຊວງສາທາລະນະສຸກ)
ຄໍາເຫັນ