ລົງນາມວ່າດ້ວຍການບໍລິການທາງການແພດແລະປິ່ນປົວສຸຂະພາບ

ໂຮງໝໍມິດຕະພາບໄດ້ຈັດພິທີເຊັນສັນຍາວ່າດ້ວຍການບໍລິການທາງການແພດ ແລະ ປິ່ນປົວສຸຂະພາບ ລະຫວ່າງໂຮງໝໍມິດຕະພາບ ແລະ ບໍລິສັດ ຈົງຈີ ປະກັນໄພ ຈໍາກັດຂຶ້ນໃນວັນທີ 8 ທັນວານີ້ ທີ່ໂຮງໝໍດັ່ງກ່າວ ຕາງໜ້າລົງນາມໃນຄັ້ງນີ້ໂດຍທ່ານ ສອນໄຊ ລາດຊະວົງ ຜູ້ອໍານວຍການໂຮງໝໍມິດຕະພາບ ແລະ ທ່ານ ຈັນດີ ສີສະວາ ຮອງຜູ້ອໍານວຍການບໍລິສັດ ຈົງຈີ ປະກັນໄພ ຈໍາກັດໃຫ້ກຽດເຂົ້າຮ່ວມເປັນສັກຂີພິຍານໂດຍມີຄະນະອໍານວຍການໂຮງໝໍ, ຄະນະພະແນກການຕ່າງໆ ພ້ອມດ້ວຍພະນັກງານທັງສອງຝ່າຍເຂົ້າຮ່ວມ.
ການລົງນາມໃນຄັ້ງນີ້ແນໃສ່ເພີ່ມທະວີຮ່ວມມືເພື່ອບໍລິການທາງດ້ານການແພດ ແລະ ປິ່ນປົວສຸຂະພາບໃຫ້ແກ່ລູກຄ້າທີ່ໄດ້ຊື້ປະກັນໄພສຸຂະພາບກັບບໍລິສັດ ຈົງຈີ ປະກັນໄພ ທັງເປັນການສ້າງຄວາມເຊື່ອໝັ້ນໃຫ້ລູກຄ້າ ຄືກັບການໃຫ້ບໍລິການປິ່ນປົວດ້ານສຸຂະພາບທົ່ວໄປຂອງບັນດາພໍ່ແມ່ປະຊາຊົນ, ຊາວຄ້າຂາຍ ລວມເຖິງພະນັກງານ-ລັດຖະກອນ, ນັກທຸລະກິດທີ່ມາໃຊ້ບໍລິການກວດສຸຂະພາບທົ່ວໄປ ຫຼືປິ່ນປົວພາຍໃນໂຮງໝໍມິດຕະພາບດ້ວຍການບໍລິການທີ່ສະດວກພຽງແຕ່ນໍາໃຊ້ການສະແກນ QR Code ໃນບັດປະກັນສຸຂະພາບ ຫຼື ບັດເອເລັກໂທຣນິກໃນມືຖືກໍສາມາດເບິ່ງເຫັນວົງເງິນການປິ່ນປົວ ແລະ ຂອບເຂດການຄຸ້ມຄອງຂອງລູກຄ້າໄດ້ຢ່າງຄົບຖ້ວນ, ສະດວກ,ວ່ອງໄວ, ທັນໃຈ ແລະ ທັນສະໄໝ.
ໂຮງໝໍມິດຕະພາບ ເປັນໂຮງໝໍສູນກາງປິ່ນປົວທົ່ວໄປ ໂດຍມີຫຼາຍຂະແໜງການເຊັ່ນ: ລະບົບປະສາດ, ພາຍໃນທົ່ວໄປ, ຊຶມເຊື້ອ-ພະຍາດເຂດຮ້ອນ, ປະສູດ-ພະຍາດຍິງ-ແມ່ ແລະ ເດັກ, ຜ່າຕັດທົ່ວໄປ, ຫູ-ດັງ-ຄໍ-ຕາ ແລະ ຄາງໜ້າ, ທັນຕະກໍາ, ຟື້ນຟູຊີບ, ກວດເຂດນອກ, ສຸກເສີນ, ກາຍຍະບຳບັດ, ວິເຄາະ, ລັງສີ-ສູນສາຍແສງ ແລະ ຍັງມີວຽກທີ່ເປັນບຸລິມະສິດໃນການລົງເລິກຊ່ຽວຊານໃນລະດັບສູງຂອງ ສປປ ລາວ ເປັນຕົ້ນ ຂະແໜງກະທົບ-ຜ່າຕັດກະດູກ, ຜ່າຕັດສະໝອງ-ສັນຫຼັງ, ໄຂ່ຫຼັງທຽມ (ຟອກເລືອດ), ການແພດພື້ນເມືອງ ແລະສູນມະເຮັງ. ໃນນັ້ນ, ຜ່ານມາໂຮງໝໍມິດຕະພາບໄດ້ມີການເຊັນສັນຍາການບໍລິການທາງການແພດ ແລະ ປິ່ນປົວສຸຂະພາບດັ່ງນີ້:ບໍລິສັດ ໂຊກໄຊ ປະກັນໄພ; ບໍລິສັດ ພົງສະຫວັນ (ເອພີເອ); ບໍລິສັດ ວຽງຈັນປະກັນໄພ; ບໍລິສັດເທບຈະເລີນ ປະກັນໄພ ຈໍາກັດ; ບໍລິສັດທິບພະຍະປະກັນໄພ; ພາກສ່ວນມະຫາວິທະຍາໄລແຫ່ງຊາດ (ໂດຍສະເພາະແມ່ນນັກສຶກສາຕ່າງປະເທດ); ພາກສ່ວນກູ້ໄພມູນນິທິຈີນ 1628.
(ຂ່າວ-ພາບ: ວັນເພັງ)