ທ່ານ ວຽງສະຫວັນ ກະເສີມສຸກ ຫົວໜ້າອົງການກາແດງແຂວງຫຼວງພະບາງ ໄດ້ໃຫ້ສຳພາດຕໍ່ສື່ມວນຊົນວ່າ: ການຈັດຂະບວນການປຸກລະດົມການບໍລິຈາກເລືອດ ໃນປີນີ້ ພາຍໃຕ້ຄຳຂັວນ “ໜຶ່ງຢອດເລືອດເພື່ອມະນຸດສະທຳ ໃຫ້ເລືອດ ໃຫ້ຊີວິດ” ເພື່ອຊຸກຍູ້ການຂະຫຍາຍຕົວແບບຍືນຍົງ ໃນການບໍລິຈາກເລືອດຢ່າງປົກກະຕິ, ເຮັດໃຫ້ຜູ້ບໍລິຈາກເລືອດ ມີຄວາມສະໝັກໃຈໂດຍບໍ່ຮຽກຮ້ອງສີ່ງຕອບແທນ, ສະໜັບສະໜູນຄວາມສະເໝີພາບ ໃນການເຂົ້າເຖິງລະບົບການບໍລິການເລືອດປອດໄພ ແລະ ລະບົບສາທາລະນະສຸກ; ຜູກຈິດສໍານຶກກ່ຽວກັບຄວາມຈຳເປັນໃນການປະກອບສ່ວນບໍລິຈາກເລືອດ ແລະ ສ້າງແຮງຈູງໃຈໃຫ້ຄົນຮຸ່ນໃຫມ່ປະກອບສ່ວນບໍລິຈາກເລືອດ; ໃຫ້ຜູ້ບໍລິຈາກເລືອດ ເຫັນໄດ້ການປະກອບສ່ວນຂອງເຂົາເຈົ້າມີຄວາມສຳຄັນຕໍ່ການມີຊີວິດ, ວຽກງານສາທາລະນະສຸກ, ການເປັນຢູ່ທີ່ດີຂອງຄົນໃນສັງຄົມ ເຫັນຄຸນຄ່າແຫ່ງຄວາມສາມັກຄີ, ນໍ້າໃຈມະນຸດສະທຳ ແລະ ຄວາມຮັບຜິດຊອບລວມຂອງເຂົາເຈົ້ານຳອີກ.
ພາຍໃນງານຈະມີການເປີດພິທີທາງການ, ຍ້ອງຍໍ-ຊົມເຊີຍ ຜູ້ບໍລິຈາກເລືອດຫຼາຍເທື່ອ ແລະ ອົງການຈັດຕັ້ງ ທີ່ສະຫນັບສະຫນູນການບໍລິຈາກເລືອດ; ຮັບບໍລິຈາກເລືອດແບບເປີດກວ້າງ, ຄາດຄະເນຈະມີຜູ້ເຂົ້າຮ່ວມ ຫຼາຍກວ່າ 500 ຄົນ ແລະ ໄດ້ຮັບເລືອດຢ່າງຫນ້ອຍ 300 ຖົງ, ພ້ອມນັ້ນ ທ່ານໄດ້ຮຽກຮ້ອງໃຫ້ທຸກພາກສ່ວນ ພ້ອມກັນເຂົ້າຮ່ວມຂະບວນການຄັ້ງນີ້ໃຫ້ກວ້າງຂວາງ, ເຮັດໃຫ້ຂະບວນການປະສົບຜົນສຳເລັດຕາມຄາດໝາຍ.
ທ່ານ ວຽງສະຫວັນ ກະເສີມສຸກ ໃຫ້ຮູ້ຕື່ມວ່າ: ທຸກໆປີໃນວັນທີ 14 ມິຖຸນາ, ຖືເປັນວັນສຳຄັນເພື່ອຂອບໃຈການບໍລິຈາກເລືອດແບບສະຫມັກໃຈ ບໍ່ຮຽກຮ້ອງສິ່ງຕອບແທນ ຂອງຜູ້ບໍລິຈາກເລືອດ ທີ່ໄດ້ປະກອບສ່ວນຊ່ວຍຊີວິດເພື່ອນມະນຸດດ້ວຍກັນ, ວັນຜູ້ບໍລິຈາກເລືອດໂລກ ເປັນເຫດການທີ່ເນັ້ນໃຫ້ເຫັນຄວາມຮັບຜິດຊອບຂອງລັດຖະບານ, ພະນັກງານອົງການກາແດງ ແລະ ສາທາລະນະສຸກ ໃນການລົງທຶນສ້າງຄວາມເຂັ້ມແຂງ ໃຫ້ວຽກງານປຸກລະດົມບໍລິຈາກເລືອດ ແລະ ສະໜອງເລືອດທີ່ປອດໄພ ໂດຍສະຫນັບສະຫນູນ ການບໍລິຈາກແບບສະໝັກໃຈບໍ່ຮຽກຮ້ອງສີ່ງຕອບແທນ, ການເຂົ້າເຖິງທີ່ສະເໝີພາບ ແລະ ການປະຕິບັດການສົ່ງເລືອດຢ່າງປອດໄພ, ເຊິ່ງໃນແຕ່ລະປີ ອົງການກາແດງແຂວງຫຼວງພະບາງ ໄດ້ຈັດຕັ້ງຂະບວນການຂຶ້ນ ໂດຍການປະກອບສ່ວນທືນຮອນ-ວັດຖຸປັດໄຈ ຈາກພາກທຸລະກິດຫຼາຍພາກສ່ວນ ແລະ ໃນປີນີ້ ຄາດວ່າຈະມີຂະບວນການຟົດຟື້ນກວ່າປີຜ່ານມາ.
ຂ່າວ:ອາພຸດເດດ ບຸບຜາ
ຄໍາເຫັນ