ມອບລົດກູ້ໄພ ໃຫ້ແກ່ ອົງການກາແດງ ແຂວງຜົ້ງສາລີ 

ໃນວັນທີ 29 ເມສາ ຜ່ານມາທີ່ອົງການກາແດງແຂວງຜົ້ງສາລີ,  ອົງການກາແດງແຫ່ງຊາດລາວ ໄດ້ມອບລົດກູ້ໄພສຸກເສີນ (ລົດໂຕໂຍຕ້າ ແລນຄຸຍເຊີ້) ໃຫ້ແກ່ ອົງການກາແດງ ແຂວງດັ່ງກ່າວ ຈຳນວນ 1 ຄັນ ເປັນມູນຄ່າ 83.000 ໂດລາ ຊຶ່ງໄດ້ຮັບການສະໜັບສະໜູນຈາກ ໂຄງການພັດທະນາແລວທາງເສດຖະກິດອາຊີຕາເວັນອອກສ່ຽງໃຕ້ເພື່ອການເຊື່ອມຈອດ-ເຊື່ອມໂຍງ ແລະ ນຳໃຊ້ລົດຄັນດັ່ງກ່າວເຂົ້າຮັບໃຊ້ໃນການຊ່ວຍເຫຼືອສຸກເສີນ ໂດຍສະເພາະການປະຖົມພະຍາບານ, ຊ່ວຍເຫຼືອຜູ້ປະສົບອຸບັດເຫດ, ອຸປະຕິໄພ ແລະ ໄພພິບັດຕ່າງໆ ທີ່ອາດຈະເກີດຂຶ້ນ ແລະ ນຳສົ່ງຄົນເຈັບໄດ້ທັນການ ຊຶ່ງມອບໂດຍ ທ່ານ ຮອງຈັນ ຈັນທະວົງ ຫົວໜ້າຫ້ອງການອົງການກາແດງແຫ່ງຊາດລາວ ແລະ ຮັບໂດຍ ທ່ານ ນາງ ບົວໄຂ ແກ້ວວິພາກອນ ຫົວໜ້າອົງການກາແດງ ແຂວງຜົ້ງສາລີ ຊຶ່ງໄດ້ຮັບກຽດເປັນສັກຂີພິຍານຂອງ ທ່ານ ຄຳລາວັນ ຈັນທະລາວັນ ປະທານອົງການກາແດງແຫ່ງຊາດລາວ ແລະ ທ່ານ ຄຳເຫຼັກ ໃຈອີສານ ຮອງເຈົ້າແຂວງຜົ້ງສາລີ ແລະ ພາກສ່ວນກ່ຽວຂ້ອງ.
ຫຼັງຈາກສໍາເລັດພິທີມອບ-ຮັບລົດກູ້ໄພສຸກເສີນແລ້ວ ທ່ານປະທານອົງການກາແດງແຫ່ງຊາດລາວ ໄດ້ໃຫ້ກຽດໂອ້ລົມພະນັກງານ-ລັດຖະກອນ ແລະ ອາສາສະໝັກ ທົ່ວອົງການກາແດງ ແຂວງຜົ້ງສາລີ ເພື່ອໃຫ້ທິດຊີ້ນຳໃນການຈັດຕັ້ງປະຕິບັດວຽກງານຂອງອົງການກາແດງ ແຂວງຜົ້ງສາລີ ໃຫ້ມີຜົນສຳເລັດໃນຕໍ່ໜ້າ ພ້ອມທັງໄດ້ລົງຢ້ຽມຢາມສູນເລືອດອົງການກາແດງ ແຂວງຜົ້ງສາລີ.
ຂ່າວ-ພາບ:ວັນທອງ