ມອບວຽກງານປະກັນສຸຂະພາບໃນລະບົບປະກັນສັງຄົມ ມາຂຶ້ນກັບ ຮສສ

ການມອບ-ຮັບວຽກດັ່ງກ່າວໃນຄັ້ງນີ້ ແມ່ນການຈັດຕັ້ງປະຕິບັດຕາມແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ ເພື່ອປັບປຸງກົນໄກການບໍລິຫານຈັດຕັ້ງປະຕິບັດວຽກງານປະກັນສຸຂະພາບໃຫ້ມີຄວາມເປັນເອກະພາບໃນທົ່ວປະເທດ.

ວຽກງານທີ່ສົ່ງມອບໃນຄັ້ງນີ້ລວມມີ: ການຄຸ້ມຄອງວຽກງານປະກັນສຸຂະພາບ, ຫັນການຄຸ້ມຄອງຈາກອົງການປະກັນສັງຄົມແຫ່ງຊາດ ມາຢູ່ພາຍໃຕ້ການຊີ້ນຳໂດຍກົງຂອງກະຊວງແຮງງານ ແລະ ສະຫວັດດີການສັງຄົມ; ກອງທຶນປະກັນສຸຂະພາບ ຊຶ່ງເປັນ 1 ໃນ 5 ກອງທຶນຍ່ອຍຂອງລະບົບປະກັນເຊັ່ນ: ກອງທຶນປະກັນສຸຂະພາບ, ກອງທຶນອຸດໜູນອຸບັດເຫດແຮງງານ ແລະ ພະຍາດອາຊີບ, ກອງທຶນອຸດໜູນໄລຍະສັ້ນ, ກອງທຶນອຸດໜູນວ່າງງານ ແລະ ກອງທຶນອຸດໜູນໄລຍະຍາວ.

ໂຕເລກຜູ້ປະກັນຕົນ ແລະ ຜົນສຳເລັດທີ່ຜ່ານມາ, ປັດຈຸບັນມີຜູ້ປະກັນຕົນທີ່ໄດ້ຮັບຜົນປະໂຫຍດຈາກວຽກງານປະກັນສຸຂະພາບທັງໝົດ 398,243 ທ່ານ; ປະເພດຜູ້ຊົມໃຊ້: ລວມມີພະນັກງານ-ລັດຖະກອນ 192,436 ທ່ານ, ພະນັກງານວິສາຫະກິດ 190,855 ທ່ານ ແລະ ຜູ້ສະໝັກໃຈ 14,952 ທ່ານ (ໂຕເລກໂດຍປະມານ).

ສຳລັບທິດທາງໃນຕໍ່ໜ້າ ທ່ານລັດຖະມົນຕີ ກະຊວງ ຮສສ ຍັງໄດ້ສະແດງຄວາມມຸ່ງໝັ້ນທີ່ຈະສືບຕໍ່ພັດທະນາວຽກງານດັ່ງກ່າວນີ້ໃຫ້ເຂັ້ມແຂງໂດຍເນັ້ນໃສ່ການຫັນເປັນທັນສະ ໄໝໃນການບໍລິການ (e-office ແລະ Mobile App); ການເພີ່ມທະວີປັບປຸງຄຸນນະພາບການປິ່ນປົວໃນໂຮງໝໍຄູ່ສັນຍາ; ຮັບປະກັນຄວາມຍືນຍົງຂອງກອງທຶນ ເພື່ອປົກປ້ອງສິດຜົນປະໂຫຍດຂອງຜູ້ອອກແຮງງານໃນໄລຍະຍາວ; ການຫັນປ່ຽນຄັ້ງນີ້ ຖືເປັນບາດກ້າວສຳຄັນໃນການປະຕິຮູບລະບົບສະຫວັດດີການສັງຄົມ ຂອງ ສປປ ລາວ ເພື່ອໃຫ້ປະຊາຊົນເຂົ້າເຖິງການບໍລິການທີ່ມີຄຸນນະພາບຢ່າງທົ່ວເຖິງ ແລະ ຍຸຕິທຳ.

(ຂ່າວສານຮສສ)